ឧត្តមសេនីយ៍ទោ សេង ធារិន នាំយកអំណោយរបស់ឯកឧត្តម ហ៊ុន ម៉ាណែត និងលោកជំទាវ ជូនពលរដ្ឋ លោកគ្រូ អ្នកគ្រូ និងសិស្សានុសិស្សសាលាបឋមសិក្សាកំពង់ឆ្លង ចំនួន៣០០នាក់ ក្នុងស្រុកបាណន់

កាលនៅថ្ងៃទី០៤ ខែវិច្ឆិកា ឆ្នាំ២០២២នេះលោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ តំណាងលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក អមដំណើរដោយលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងលោកឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើជើងលេខ៥១ ក្នុងពិធីសំណេះសំណាលសួរសុខទុក្ខ និងចែកអំណោយរបស់លោក ហ៊ុន ម៉ាណែត និងលោកស្រី ជូនលោកតា លោកយាយ លោកគ្រូ អ្នកគ្រូ សិក្សានុសិស្ស ចំនួន៣០០នាក់ នៅសាលាបឋមសិក្សាកំពង់ឆ្លង ឃុំឈើទាល ស្រុកបាណន់ ខេត្តបាត់ដំបង។

ក្នុងឱកាសនោះ លោកឧត្តមសេនីយ៍ទោ សេង ធារិន បាននាំការផ្ដាំផ្ញើសួរសុខទុក្ខ ជូនប្រជាពលរដ្ឋ លោកគ្រូ អ្នកគ្រូ សិស្សានុសិស្ស ពីសំណាក់លោក ហ៊ុន ម៉ាណែត និងលោកស្រី ដែលតែងតែបានយកចិត្តទុកដាក់អំពីសុខទុក្ខរបស់ លោកយាយលោកតាប្រជាពលរដ្ឋ ដែលជួបការលំបាក។

លោកឧត្តមសេនីយ៍ទោ សេង ធារិន សូមប្រកាសគាំទ្រលោក ហ៊ុន ម៉ាណែត ជាបេក្ខភាពនាយករដ្ឋមន្រ្តី នាពេលអនាគត ព្រោះលោកពិតជាឥស្សរជនដែលស័ក្តិសមជាអនាគតនាយករដ្ឋមន្រ្តី នៃកម្ពុជា បន្តវេនដឹកនាំការពារបូរណភាពទឹកដី សុខសន្តិភាព និងស្ថិរភាពសង្គម ការលើកកម្ពស់កិត្យានុភាពជាតិ និងការអភិវឌ្ឍជាតិឲ្យកាន់តែមានភាពរីកចម្រើនលើគ្រប់វិស័យ ដើម្បីវិបុលភាព សេចក្តីសុខ និងសុភមង្គលរបស់ប្រជាជនកម្ពុជា។

លោក សេង ធារិន ក៏បានផ្តាំផ្ញើដល់ប្រជាពលរដ្ឋ លោកគ្រូ អ្នកគ្រូ សិស្សានុសិស្សទាំងអស់ សូមបន្តរក្សាអនាម័យ រស់នៅស្អាត និងបន្តអនុវត្តវិធានការ ៣ការពារ ៣កុំ ដើម្បីការពារជំងឺកូវីដ-១៩បន្តទៀត និងត្រូវចូលរួមអប់រំកូនចៅ និងក្រុមគ្រួសារឲ្យគោរពច្បាប់ចរាចរណ៍ និងត្រូវចៀសឆ្ងាយពីគ្រឿងញៀនឲ្យបានដាច់ខាត៕

(សូមអានបន្ត)

ឧបនាយករដ្ឋមន្រ្តី អូន ព័ន្ធមុនីរ័ត្ន ជួបពិភាក្សាការងារជាមួយ ឯកអគ្គរាជទូតអូស្រ្តា​លីប្រចាំនៅក​ម្ពុ​ជាដើម្បីពង្រឹងកិច្ចសហប្រតិបត្តិការ​ទ្វេភាគី

 ភ្នំពេញ៖ កាលថ្ងៃទី០៤ ខែវិច្ឆិកា ឆ្នាំ២០២២​ នៅទីស្តីការ​ក្រសួងសេដ្ឋកិច្ច និងហិរញ្ញវត្ថុ, ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នាព្រឹកថ្ងៃទី០៣ ខែវិច្ឆិកា ឆ្នាំ២០២២ បានទទួល​ជួបពិភាក្សាការងារជាមួយឯកឧត្តម Pablo Kang ឯកអគ្គរាជទូតវិសាមញ្ញ និងពេញសមត្ថភាព នៃប្រទេសអូស្រ្តាលីប្រចាំនៅកម្ពុជា ស្ដីពីកិច្ចសហប្រតិបត្តិការ​ទ្វេភាគីរវាងប្រទេសទាំងពីរ ក្នុងក្របខ័ណ្ឌគោលនយោបាយ​ជំនួយអភិវឌ្ឍន៍ទូទៅ​របស់ប្រទេ ស​អូស្រ្ដាលីនៅ​កម្ពុជា ​និង​ក្នុង​​កម្មវិធីភាពជាដៃគូ កម្ពុជា-អូស្ត្រាលី​ សម្រាប់ការអភិវឌ្ឍសេដ្ឋកិច្ចប្រ​ក​ប​​ដោយ​ភាពធន់ (CAP-RED) ក្រោម​ក្របខ័ណ្ឌហិរញ្ញប្បទានឥតសំណងរបស់រដ្ឋាភិបាលអូស្ត្រាលី ​។

ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី បានសម្តែងនូវក្តីសោមនស្សរីករាយ និងថ្លែងអំ​ណ​រគុណយ៉ាងជ្រាលជ្រៅចំពោះរដ្ឋាភិបាល និងប្រជាជន​អូស្រ្តាលី ដែលតែងតែបន្តផ្ដល់​នូវ​ការគាំទ្រ​ទាំងផ្នែកបច្ចេកទេស និងហិរញ្ញវត្ថុសម្រាប់ការអភិវឌ្ឍនៅកម្ពុជាស្ទើរគ្រប់វិស័យ និងថ្មីៗនេះ តា​ម​រយៈ​កម្មវិធីភាពជាដៃគូ កម្ពុជា-អូស្ត្រាលី​ ​ CAP-RED ដែល​បាន​សម្ពោធដាក់ឱ្យដំណើរការកាលពី​​​​ថ្ងៃទី​១៧ ខែកញ្ញា ឆ្នាំ ២០២២​។ ការដាក់ឱ្យ​ដំណើរការ​កម្មវិធី CAP-RED នេះ គឺមិនត្រឹមតែស្រ​ប​​ពេ​លនឹងខួបគម្រប់ទី ៧០ ឆ្នាំ នៃទំនាក់ទំនង​ការទូត​របស់ កម្ពុជា-អូស្ត្រាលី ប៉ុណ្ណោះទេ តែស្របទៅ​នឹងព្រឹត្តិការណ៍ដែលប្រទេសកម្ពុជា បាន និងកំពុង​ធ្វើជាប្រធានអាស៊ានប្តូរវេន និង​កំពុង​រៀបចំខ្លួ​ន​​ដើម្បីធ្វើជាម្ចាស់ផ្ទះសម្រាប់ ​​កិច្ចប្រជុំកំពូលអាស៊ាន​ដែល​គ្រោងនឹងប្រព្រឹត្តទៅចាប់ពី​ថ្ងៃទី ​១០ -១​៣ ខែ វិច្ឆិកា ឆ្នាំ២០២២ ខាងមុខនេះ ​។

ឯកឧត្តមឯកអគ្គរាជទូតអូស្រ្តាលី បានកោតសរសើរ និងថ្លែងអំណរគុណយ៉ាងជ្រាលជ្រៅ​ក្រសួងសេ​ដ្ឋកិច្ច និងហិរញ្ញវត្ថុ ដែលបានដើរតួនាទី និង​ប្ដេជ្ញា​យ៉ាងមុតមាំ ក្នុងកិច្ច​សហការ​ជាមួយភាគីភាគី​ពាក់ព័ន្ធនានា ដែល​អនុវត្តគម្រោង​ក្រោម​ជំនួយអភិវឌ្ឍន៍​របស់ប្រទេស​​អូស្ត្រាលីនាពេលកន្លងម​ក​។ ឆ្នាំ ២០២២ នេះ គឺ​ជាខួបគម្រប់ទី ៧០ ឆ្នាំ នៃ​​ទំនាក់ទំនង​ការទូត និងកិច្ចសហប្រតិបត្តិការ​ដ៏​​ជិតស្និទ្ធរវាង​ប្រទេសទាំងពីរ កម្ពុជា-អូស្រ្តាលី ។ ឯកឧត្តមឯកអគ្គរាជទូត បានផ្ដល់​ដំណឹងថា រដ្ឋា​ភិបាលអូស្ត្រាលី នឹងបន្ត​ពង្រីកចំណង​កិច្ចសហប្រតិបត្តិការរវាង​ប្រទេសទាំងពីរអោយកាន់តែស៊ី​ជម្រៅ ហើយគ្រោងនឹង​ផ្ដល់នូវ​ជំនួយអភិវឌ្ឍន៍ដល់ប្រទេសកម្ពុជា ​ប្រមាណ ៨១ លានដុល្លារអូស្រ្ដា​លី សម្រាប់ឆ្នាំ ២០២២-២០២៣ ដើម្បី​ជួយគាំទ្រកម្ពុជាឆ្លើយតបនឹង​វិបត្តិកូវីដ-១៩ និងស្ដារសេ​ដ្ឋកិច្ចកម្ពុជា​ឡើងវិញក្នុងអន្តរកាល​ ប្រកបដោយភាពធន់ និង​បរិយាប័ន្ន ដើម្បី​ឈានទៅកាន់ប្រ​ទេសដែលមានចំណូល​មធ្យមត្រឹមឆ្នាំ ២០៣០។ ​

ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី បានថ្លែងអំណរគុណចំពោះកិច្ចខិតខំប្រឹងប្រែង​រ​ប​ស់ ឯកឧត្តមឯកអគ្គរាជទូត ក្នុងការជួយជំរុញអោយមាន​វឌ្ឍនភាព​ប្រកបដោយផ្លែផ្កានៃ​កម្មវិធី C​AP-RED ក្រោមកិច្ចសហការពី​ភាគីពាក់ព័ន្ធនានា និងបានវាយតម្លៃខ្ពស់​ចំពោះ​បច្ចុប្បន្នភាព​អា​ទិភាព​គោលនយោបាយ​ជំនួយអភិវឌ្ឍន៍​របស់រដ្ឋាភិបាល អូស្រ្ដាលីសម្រាប់កម្ពុជា ដែលមាន​ល​ក្ខណៈ​ស្របគ្នានឹង​អាទិភាព​គោលនយោបាយអភិវឌ្ឍន៍​សេដ្ឋកិច្ចនិងសង្គមកម្ពុជា នាពេលបច្ចុ​ប្បន្ន និងសង្ឃឹមជឿជាក់ថាអាទិភាព​​គោលនយោបាយជំនួយអភិវឌ្ឍន៍ដែលស្របទៅនឹងទ​ស្ស​ន​​វិស័យ​រួម កម្ពុជា-អូស្ត្រាលី នឹង​ជួយជំរុញកិច្ចសហប្រតិបត្តិការរវាងប្រទេសទាំងពីរឱ្យសម្រេចបា​ននូវផលទ្ធផលកាន់តែល្អប្រសើរ។

ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី អូន ព័ន្ធមុនីរ័ត្ន និង​ ឯកឧត្តមឯកអគ្គរាជទូត P​a​b​lo Kang បានសម្តែងនូវសុទិដ្ឋិនិយម​ចំពោះ​ការ​បន្ត​ពង្រឹងកិច្ចសហប្រតិបត្តិការទ្វេភាគី កម្ពុជា-អូស្ត្រា​​លី ​លើ​គ្រប់វិស័យ ជាពិសេស ​រួមសហការ​គ្នា​អនុវត្ត​កម្មវិធី​ភាពជាដៃគូ កម្ពុជា-អូស្ត្រាលី​ សម្រា​ប់​ការអភិវឌ្ឍសេដ្ឋកិច្ចប្រកប​ដោយ​ភាពធន់ (CAP-RED) ឱ្យអនុវត្តទៅប្រកបដោយភាពជោគជ័យ និ​ងទទួលបានលទ្ធផល​ជាផ្លែផ្កា​គួរ​ជាទីមោទនៈ៕

ដោយ៖ គង់ សិរីរ័ត្នសម្រួលដោយ៖ដារ៉ា

(សូមអានបន្ត)

ឧបនាយករដ្ឋមន្រ្តី អូនព័ន្ធ មុនីរ័ត្ន ផ្ដល់ពូជស្រូវជាង១៦៥តោន ដល់ពលរដ្ឋស្រុកស្អាង និងស្រុកកណ្ដាលស្ទឹង

 ឯកឧត្តមអគ្គបណ្ឌិតសភាចារ្យ អូនព័ន្ធ មុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងប្រធានក្រុមការងារថ្នាក់ជាតិចុះជួយខេត្តកណ្ដាល បានផ្ដល់ពូជស្រូវចំនួន១៦៥តោន ៥០០គីឡូក្រាម តាមរយ:អាជ្ញាធរខេត្តកណ្ដាល ដើម្បីស្ដារឡើងវិញនូវផ្ទៃដីបង្កបង្កើនផលដែលរងការខូចខាតដោយសារគ្រោះមហន្តរាយ ជំនន់ទឹកភ្លៀង និងទឹកទន្លេ។

ការផ្ដល់ជូននេះធ្វើឡើងនៅថ្ងៃទី១ ខែវិច្ឆិកា ឆ្នាំ២០២២ ដឹកនាំដោយឯកឧត្តម ហ៊ួត ប៊ុនណារី រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម គង់ សោភ័ណ្ឌ អភិបាលខេត្តកណ្ដាល រួមជាមួយក្រុមការងារធ្វើជាតិ ចុះមូលដ្ឋានស្រុកស្អាង អាជ្ញាធរស្រុកស្អាង និងកងកម្លាំងមានសមត្ថកិច្ច ដែលធ្វើឡើងនៅបរិវេណវត្តសាលាអណ្ដែត ហៅវត្តអណ្ដូង ស្ថិតនៅឃុំក្រាំងយ៉ូវ ស្រុកស្អាង ខេត្តកណ្ដាល។

ឯកឧត្តម គង់ សោភ័ណ្ឌ បានលើកឡើងថា ឆ្នាំនេះខេត្តកណ្តាល ក៏ដូចជាបណ្តាខេត្ត បានរងផលប៉ះពាល់ដោយជំនន់ទឹកភ្លៀង និងជំនន់ទឹកទន្លេមេគង្គ ក្នុងនោះក្រុមការងារក្រសួងកសិកម្ម បានសហការជាមួយគណៈកម្មការគ្រប់គ្រង គ្រោះមហន្តរាយខេត្ត បានចុះពិនិត្យ តាមដាន វាយតម្លៃ លើការខូចខាតដំណាំស្រូវ និងដំណាំរួមផ្សំ ដោយគិតត្រឹមថ្ងៃទី១៧ ខែតុលា ឆ្នាំ២០២២ មានស្រុកចំនួន៤ រងផលប៉ះពាល់ដោយជំនន់ទឹកភ្លៀង ចំនួន៤ស្រុក ក្នុងនោះមាន៖ ស្រុកកណ្តាលស្ទឹង ស្រុកខ្សាច់កណ្តាល ស្រុកពញាឮ និង៤ស្រុកស្អាង បានប៉ះពាល់សរុប ៩៣ភូមិ ស្មើនឹងឃុំចំនួន១៩ ក្នុងនោះគ្រួសារទទួលរងផលប៉ះពាល់សរុបចំនួន ១,៦៥៥ គ្រួសារ ផ្ទៃដីប៉ះពាល់សរុប ចំនួន ១,៣១៩ ហិកតាផ្ទៃដី ខូចខាត អាចមានលទ្ធភាពស្តារឡើងវិញ សរុបចំនួន ៩៣៦ ហិកតា។

ឯកឧត្តមអភិបាលខេត្តបន្តថា គណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា បានធ្វើការវាយតម្លៃផលប៉ះពាល់ ឯកភាពជាគោលការណ៍ផ្ដល់នូវគ្រាប់ពូជស្រូវចំនួន ១៦៥តោន ៥០០គីឡូក្រាម សម្រាប់ប្រជាកសិករចំនួន ១,៦៥៥ គ្រួសារ ដើម្បីស្ដារឡើងវិញនូវផ្ទៃដីបង្កបង្កើនផលដែលរងការខូចខាតដោយសារគ្រោះមហន្តរាយ ជំនន់ទឹកភ្លៀង និងទឹកទន្លេ។

ក្នុងនោះស្រុកស្អាង និងស្រុកណ្តាលស្ទឹង ចំនួន ៧២១ គ្រួសារ លើផ្ទៃដីខូចខាតដែលអាចស្តារបានវិញ ចំនួន ៤៣១ ហិកតា ត្រូវការគ្រាប់ស្រូវពូជ ចំនួន ៧២ ១០០គីឡូក្រាម ដែលក្នុងមួយគ្រួសារៗ ទទួលបានគ្រាប់ស្រូវពូជ ចំនួន ១០០ គីឡូក្រាម និងអំណោយបន្ថែមលើពូជស្រូវរួមមាន៖ ត្រីខ ១ យួរ មី ១ កេសតូច និងទឹកត្រី ១យួរ៕

(សូមអានបន្ត)

សម្តេចតេជោ ហ៊ុន សែន អបអរសាទរ វីរកីឡាការិនី ខាន់ ចេសា ដណ្ដើមបានមេដាយមាសកីឡាជឺជីតស៊ូជើងឯក ពិភពលោក នៅអារ៉ាប់រួម

 ភ្នំពេញ ៖កាលថ្ងៃទី០២ ខែវិច្ឆិកា ឆ្នាំ២០២២-ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានសម្តែងការអបអរសាទរកីឡាការិនីជឺជីតស៊ូកម្ពុជា ខាន់ ចេសា ដែលដណ្ដើមបានមេដាយមាស នៃការប្រកួតកីឡាជឺជីតស៊ូជើងឯកពិភពលោក Ju-Jitsu World Championship - Abu Dhabi 2022 ហើយ ក្រោយយកឈ្នះកីឡាការិនីអេស្ប៉ាញ Matthews Martin Naiomi ក្នុងវគ្គផ្ដាច់ព្រ័ត្រ នៅទីក្រុងអាប៊ូដាប៊ី ប្រទេសអារ៉ាប់រួម។

នៅលើផេកផ្លូវការនាយប់ថ្ងៃទី០២ ខែវិច្ឆិកា ឆ្នាំ២០២២ សម្តេចតេជោបានសរសេរថា សម្រាប់ការប្រកួតលើវិញ្ញាសា Jiu Jitsu (Newaza) ទម្ងន់ក្រោម ៥២គីឡូក្រាម ធ្វើបានយ៉ាងល្អ ក្នុងនាមកីឡាការិនីឈរចាំនៅជុំទី២ ដោយកញ្ញាបានយកឈ្នះគូប្រកួត ដោយផ្ដួលឱ្យបោះបង់ការប្រកួតចំនួន ៣ប្រកួតជាប់គ្នា ពោលគឺ ចេសា បានផ្ដួលកីឡាការិនីហ្វីលីពីន Baluyot Ashley Jeraine នៅជុំទី២ (១៦នាក់ចុងក្រោយ), ផ្ដួលកីឡាការិនីម្ចាស់ផ្ទះអារ៉ាប់រួម Shraim Maitha នៅជុំទី៣ (វគ្គ ៨នាក់ចុង ក្រោយ) និងផ្ដួលកីឡាការិនីអ៊ីស្រាអ៊ែល Aronov Pnina នៅវគ្គពាក់កណ្ដាលផ្ដាច់ព្រ័ត្រ កាលពីថ្ងៃមិញ។

សម្តេចតេជោបានថ្លែងថា ឈានដល់វគ្គផ្ដាច់ព្រ័ត្រ កីឡាការិនីកូនកាត់ ៣សាសន៍ (ខ្មែរ-អាមេរិក-ម៉ិកស៊ិក) នៅតែរក្សាភាពខ្លាំងរបស់ខ្លួន ដោយ ខាន់ ចេសា បានប្រើស្នៀតពិសេស ចាប់ឃ្លេកីឡាការិនីជើងខ្លាំងអេស្ប៉ាញ Matthews Martin Naiomi ជាប់ពេញរយៈពេល ៦នាទី ដែលនាំឱ្យគណៈកម្មការផ្ដល់ជ័យជម្នះដល់កីឡាការិនីវ័យ ២១ឆ្នាំរបស់កម្ពុជា ដើម្បីគ្រងមេដាយមាស នៃការប្រកួតជើងឯកពិភពលោក ឆ្នាំ២០២២ ជូនប្រទេសកម្ពុជា៕ដោយ៖ ជឹម ណារីសម្រួលដោយ៖ដារ៉ា

(សូមអានបន្ត)

ជំនួបតាមទូរស័ព្ទរវាង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម វ៉ូឡូឌីមៀ ហ្ស៊ែលឡិនស្គី ប្រធានាធិបតីនៃប្រទេសអ៊ុយក្រែន

រាជធានីភ្នំពេញ: ថ្ងៃទី២ ខែតុលា ឆ្នាំ២០២២ លទ្ធផល ជំនួបតាមទូរស័ព្ទរវាង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម វ៉ូឡូឌីមៀ ហ្ស៊ែលឡិនស្គី ប្រធានាធិបតីនៃប្រទេសអ៊ុយក្រែន នៅថ្ងៃទី០១ ខែវិច្ឆិកា ឆ្នាំ២០២២

ដោយ៖ AKP, សម្រួលផ្សាយ៖ dara

(សូមអានបន្ត)

ឯកឧត្តម ឃួង ស្រេង ជំរុញអាជ្ញាធរខណ្ឌ សង្កាត់ ត្រូវចុះរៀបចំសណ្ដាប់ធ្នាប់សាធារណៈឱ្យបានស្អាត និងត្រូវរៀបចំគោលដៅការងារមូលដ្ឋានរបស់ខ្លួនឱ្យបានច្បាស់លាស់

ភ្នំពេញ ថ្ងៃទី០២ ខែវិច្ឆិកា ឆ្នាំ២០២២​ អភិបាលរាជធានីភ្នំពេញ ឯកឧត្តម ឃួង ស្រេង បានជំរុញឱ្យអាជ្ញាធរខណ្ឌ សង្កាត់ បើកកិច្ចប្រជុំគណៈបញ្ជាការឯកភាពរដ្ឋបាលខណ្ឌ សង្កាត់ ជាប្រចាំរាល់ខែ ដោយដាក់ទិសដៅការងារឱ្យបានច្បាស់លាស់ បញ្ហាប្រឈមនានា សំដៅធ្វើយ៉ាងណាឱ្យការងាររបស់ខ្លួន ដំណើរការទៅដោយរលូន រក្សាបានសន្តិសុខ សណ្តាប់ធ្នាប់និងបរិស្ថានល្អ។

ឯកឧត្តម ឃួង ស្រេង បានជំរុញបែបនេះនៅរសៀលថ្ងៃអង្គារ ៨កើត ខែកត្តិក ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០១ ខែវិច្ជិកា ឆ្នាំ២០២២ ក្នុងពិធីប្រគល់វិញ្ញាបនបត្រ កម្មវិធីពានរង្វាន់សេវាសង្គម សម្រាប់រដ្ឋបាលថ្នាក់ក្រោមជាតិ ជូនរដ្ឋបាលខណ្ឌ សង្កាត់ ប្រចាំឆ្នាំ២០២០-២០២១ ក្រោមអធិបតីភាពឯកឧត្តម ម៉ប់ សារិន ប្រធានក្រុមប្រឹក្សារាជធានី និងលោកឃួង ស្រេង អភិបាល នៃគណ:អភិបាលរាជធានីភ្នំពេញ នៅសាលារាជធានីភ្នំពេញ។

ឯកឧត្តម ឃួង ស្រេង មានប្រសាសន៍ថា ក្នុងនាមអាជ្ញាធរខណ្ឌ សង្កាត់ ត្រូវរួមគ្នាសហការគ្នា ធ្វើយ៉ាងណាឱ្យរាជធានីភ្នំពេញរបស់យើង មានទាំងសន្តិសុខ សណ្ដាប់ធ្នាប់ សោភណ ភាព និងបរិស្ថានល្អពិសេស ការពិនិត្យទៅលើមូលដ្ឋានរបស់ខ្លួន ពាក់ព័ន្ធនឹងសំរាម ធូលីជាដើម ដោយធ្វើការរាយការណ៍ ក៏ដូចជាអន្តរាគមន៍ដើម្បីយកសំរាមនិងធូលីចេញពីដងផ្លូវនានា នៅក្នុងមូលដ្ឋានរបស់ខ្លួនឱ្យអស់។

ឯកឧត្តមបានបញ្ជាក់ថា កន្លងមកនេះ ពិសេសក្នុងដំណាក់កាល នៃការរីករាលដាលជំងឺកូវីដ-១៩ ទាំងខណ្ឌ ទាំងសង្កាត់ និងមន្ទីរពាក់ព័ន្ធ បានយកចិត្តទុកដាក់ខ្លាំងណាស់ ដោយបំពេញការងារនេះ មិនថាថ្ងៃ ឬយប់ឡើយ រហូតទទួលបានជោគជ័យ និងបានបើកដំណើរការ សេដ្ឋកិច្ចប្រទេសឡើងវិញ ដែលគិតមកដល់ពេលនេះ ភាពជោគជ័យក្នុងការទប់ស្កាត់ជំងឺកូវីដ -១៩ មានរយៈពេលមួយឆ្នាំគត់។

ឯកឧត្តមឃួង ស្រេង ក៏បានជំរុញឱ្យអាជ្ញាធរខណ្ឌ សង្កាត់ បន្តបម្រើប្រជាពលរដ្ឋបន្ថែមទៀត ពិសេសការផ្តល់សេវាសង្គមជូនប្រជាពលរដ្ឋ ដើម្បីទទួលបានការគោរពស្រឡាញ់ និងជឿទុកចិត្តពីប្រជាពលរដ្ឋ រហូតដល់ពួកគាត់បោះឆ្នោតឱ្យយើង នៅឆ្នាំ២០២៣ខាងមុខ។ ការផ្តល់សេវានៅទីណាល្អ ទីនោះប្រជាពលរដ្ឋកាត់បន្ថយបាននូវភាពក្រីក្រ និងកាត់បន្ថយអំពើហិង្សាផងដែរ។ អាជ្ញាធរខណ្ឌ សង្កាត់ ត្រូវបន្តយកចិត្តទុកដាក់បន្ថែមទៀត ដើម្បីបានពិន្ទុច្រើន ឈាន់ទៅទទួលបានចំណាត់ថ្នាក់ផ្កាយច្រើន។ លើកកម្ពស់សេវាសង្គម ជួយប្រជាពល រដ្ឋរងគ្រោះ និងងាយរងគ្រោះ អាជ្ញាធរខណ្ឌ សង្កាត់ ត្រូវជំរុញប្រជាពលរដ្ឋគ្រប់អាយុបោះឆ្នោត ទៅចុះឈ្មោះបោះឆ្នោតឱ្យបានគ្រប់ៗគ្នា និងទាន់ពេលវេលា ។

គួរបញ្ជាក់ថា លទ្ធផលនៃការអនុវត្ត កម្មវិធីពានរង្វាន់សេវាសង្គម សម្រាប់រដ្ឋបាលថ្នាក់ក្រោមជាតិ ផ្អែកតាមលទ្ធផលដែលក្រសួងមហាផ្ទៃ បានធ្វើការពិនិត្យវាយតម្លៃ សម្រាប់រដ្ឋបាលថ្នាក់ក្រោមជាតិឆ្នាំ២០២០-២០២១ គឺរាជធានីភ្នំពេញ ទទួលបានពាន់រង្វានជើងឯកចំនួន ២ខណ្ឌ និង២សង្កាត់ រួមមាន៖ រដ្ឋបាលខណ្ឌមានជ័យ ទទួលបានជ័យលាភីជើងឯកលេខ២។ រដ្ឋបាលខណ្ឌកំបូល ទទួលបានជ័យលាភីជើងឯកលេខ៣។ រដ្ឋបាលសង្កាត់បឹងកេងកងទី១ ទទួលបានជ័យលាភីជើងឯកលខ១។ រដ្ឋបាលសង្កាត់បឹងកេងកងទី២ ទទួលបានជ័យលាភីជើងឯកលេខ៤ (បានប្រគល់ជូនរួចដោយក្រសួងមហាផ្ទៃកាលពីថ្ងៃទី២២ ខែកញ្ញា ឆ្នាំ២០២២ នៅសណ្ឋាគាររ៉េស៊ីដង់សុខាភ្នំពេញ) ។ ចំពោះពានរង្វាន់ផ្កាយសេវាសង្គម ដែលត្រូវធ្វើពិធីប្រគល់ជូននេះ រួមមាន៖ រដ្ឋបាលរាជធានីភ្នំពេញ ទទួលបានពានរង្វាន់ផ្កាយ៣, រដ្ឋបាលខណ្ឌចំនួន៩ ទទួលបានផ្កាយ៣, រដ្ឋបាលខណ្ឌចំនួន៣ ទទួលបានផ្កាយ២ ។ ចំណែករដ្ឋបាលសង្កាត់ចំនួន២៨ ទទួលបានផ្កាយ៣, រដ្ឋបាលសង្កាត់ចំនួន១៥ទទួលបានផ្កាយ២,និងរដ្ឋបាលសង្កាត់ចំនួន៨ទៀត ទទួលបានផ្កាយ១ ទាបជាងគេ ៕

ដោយសួស សំរិតសម្រួលដោយ៖ដារ៉ា

(សូមអានបន្ត)