រដ្ឋមន្ត្រី ហេង សួរ៖ ការប្រគំតន្ត្រីរបស់ជប៉ុននៅមជ្ឈមណ្ឌល CJCC ជាឱកាសរឹតចំណងមិត្តភាពរវាងប្រទេសទាំងពីរបន្ថែមទៀត

(ភ្នំពេញ)៖ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានកត់សម្គាល់ឃើញថា ការប្រគំតន្ត្រីអូខេស្ត្រា (Orchestra) ដែលជាសិល្បៈតន្ត្រីរបស់ជប៉ុន នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ជាឱកាសរឹតចំណងមិត្តភាពរវាងប្រទេសទាំងពីរ កម្ពុជា-ជប៉ុន កាន់តែជិតស្និទ្ធមួយកម្រិតបន្ថែមទៀត។

ព្រឹត្តិការណ៍សិល្បៈនេះត្រូវបានប្រារព្ធឡើងនាល្ងាចថ្ងៃទី១៥ ខែកញ្ញា ឆ្នាំ២០២៣នេះ ក្រោមអធិបតីភាព សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងឯកឧត្តម អ៊ូអិណុ អាត់ត្សឹស៊ី ឯកអគ្គរាជទូតជប៉ុនប្រចាំកម្ពុជា ក្នុងគោលបំណងដើម្បីអបអរសាទរខួបលើកទី៧០នៃមិត្តភាពកម្ពុជា-ជប៉ុន សំដៅរឹតចំណងសាមគ្គីភាពរវាងប្រទេសទាំងពីរឱ្យកាន់តែស្និតស្នាល និងទាក់ទាញការចាប់អារម្មណ៍របស់ប្រជាជននិងអ្នកវិនិយោគជប៉ុនឱ្យមកទស្សនាកម្សាន្ត ធ្វើធុរកិច្ច និងវិនិយោគនៅកម្ពុជាកាន់តែច្រើន។

លោករដ្ឋមន្ត្រីបានបញ្ជាក់ថា យុវតន្ត្រីករជប៉ុនពិតជាសម្តែងបានល្អ និងបានថ្លែងអំណរគុណចំពោះគណៈប្រតិភូជប៉ុនដែលបានធ្វើដំណើរដ៏សែនឆ្ងាយ ដើម្បីមកចូលរួមក្នុងការប្រគំតន្ត្រីដ៏វិសេសវិសាលនេះ។

លោករដ្ឋមន្ត្រីក៏បានជូនពរដល់ក្រុមយុវតន្រ្តីករ និងប្រតិភូជប៉ុនសូមទទួលបាននូវសុខភាពល្អ និងរីករាយក្នុងការស្នាក់នៅព្រះរាជាណាចក្រកម្ពុជា។

សូមជម្រាបថា មកដល់ឆ្នាំ២០២៣នេះ កម្ពុជា-ជប៉ុនបានឈានដល់កម្រិតដៃគូយុទ្ធសាស្ត្រគ្រប់ជ្រុងជ្រោយ ជាមួយនឹងការប្ដេជ្ញាបន្តពង្រឹងកិច្ចសហប្រតិបត្តិការឱ្យកាន់តែរឹងមាំថែមទៀតផងដែរ៕

(សូមអានបន្ត)

សម្តេចធិបតី ហ៊ុន ម៉ាណែត បញ្ចប់ដំណើរទស្សនកិច្ចផ្លូវការ បន្តដំណើរចូលរួមពិព័រណ៍អាស៊ាន-ចិនលើកទី២០

(ប៉េកាំង, ចិន)៖ ដំណើរទស្សនកិច្ចជាផ្លូវការលើកដំបូងនៅរដ្ឋធានីប៉េកាំង ប្រទេសចិន របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបិទបញ្ចប់ហើយនៅព្រឹកថ្ងៃទី១៦ ខែកញ្ញា ឆ្នាំ២០២៣នេះ។

បន្ទាប់ពីបញ្ចប់ដំណើរទស្សនកិច្ចផ្លូវការ សម្តេចធិបតី បន្តដឹកនាំគណៈប្រតិភូរាជរដ្ឋាភិបាលកម្ពុជាទៅចូលរួមពិព័រណ៍ចិន-អាស៊ានលើកទី២០ នៅទីក្រុងណាននីង ខេត្តក្វាងស៊ី ប្រទេសចិន។

សូមបញ្ជាក់ថា ក្នុងដំណើរទស្សនកិច្ចជាផ្លូវការនៅក្នុងប្រទេសចិន សម្តេចធិបតីនាយករដ្ឋមន្ត្រីកម្ពុជា បានជួបពិក្សាការងារជាមួយមេដឹកនាំចិន រួមមាន លោក ស៊ី ជិនពិង ប្រធានាធិបតីចិន លោក ចាវ ឡឺជី ប្រធានសភាប្រជាជនចិន លោក លី ឈាង នាយករដ្ឋមន្ត្រីចិន។ ក្នុងដំណើរទស្សនកិច្ចនេះ មានឯកសាររហូតដល់ទៅ១៥ ត្រូវបានចុះហត្ថលេខា ដើម្បីពង្រឹងកិច្ចសហប្រតិបត្តិការផ្នែកសេដ្ឋកិច្ច ពាណិជ្ជកម្ម និងកសិកម្មជាដើម។

ជំនួបទាំងនេះមេដឹកនាំកម្ពុជា និងមេដឹកនាំចិន បានបង្ហាញជំហរនយោបាយទ្វេភាគី តំបន់ និងអន្តរជាតិ ព្រមទាំងប្រកាសបន្តពូនជ្រំទំនាក់ទំនង និងកិច្ចសហប្រតិបត្តិការទាំងឱ្យកាន់តែខ្លាំងក្លាជាប្រយោជន៍ជាតិ និងប្រជាជនប្រទេសទាំងពីរ។ ក្នុងនោះសម្តេចធិបតី ហ៊ុន ម៉ាណែត បានធានាអះអាងបន្តប្រកាន់នយោបាយចិនតែមួយមិនប្រួលប្រែនោះឡើយ។

សម្តេចធិបតី ហ៊ុន ម៉ាណែត បានជ្រើសយកប្រទេសចិន ជាប្រទេសបំពេញទស្សនកិច្ចផ្លូវការនៅក្រៅប្រទេស​លើកដំបូង​ ក្រោយទទួលបានការគាំទ្រពីប្រជាពលរដ្ឋ និងរដ្ឋសភាឱ្យដឹកនាំរាជរដ្ឋាភិបាល។

តាមរយៈការជ្រើសយកប្រទេសចិន ជាគោលដៅទស្សនកិច្ចផ្លូវការលើកដំបូងនេះ នាំឱ្យការវាយតម្លៃថា នយោបាយរបស់សម្តេចធិបតី ហ៊ុន ម៉ាណែត បានផ្តល់សារៈសំខាន់លើទំនាក់ទំនងរវាងកម្ពុជា-ចិន ដែលជាទំនាក់ទំនងដ៏ស្អិតល្មួតជាប្រវេណី ជាទំនាក់ទំនងរឹងមាំដូចដែកថែម ទំនាក់ទំនង ដែលផ្តល់តម្លៃឱ្យគ្នា គោរពគ្នារយៈពេល៦៥ឆ្នាំមកហើយនោះ។

មេដឹកនាំចិន សុទ្ធតែបានវាយតម្លៃខ្ពស់ចំពោះនយោបាយការបរទេសរបស់សម្តេចធិបតី ចំពោះការជ្រើសយកប្រទេសចិន សម្រាប់ដំណើរទស្សនកិច្ចផ្លូវការលើកដំបូងនៅក្នុងអំណាចជានាយករដ្ឋមន្ត្រីរបស់កម្ពុជា៕

(សូមអានបន្ត)

លោក ឃួង ស្រេង ណែនាំពន្លឿនការផ្ទេរមុខងារបំណុល និងធនធានហិរញ្ញវត្ថុ​ ពីរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញ មកជាសហគ្រាសគ្រប់គ្រងសំរាម សំណល់រឹងទីប្រជុំជន​ រាជធានីភ្នំពេញ

(ភ្នំពេញ)៖ លោក ឃួង ស្រេង អភិបាលរាជធានីភ្នំពេញ បានជម្រុញឱ្យមានការផ្ទេរមុខងារ បំណុល និងធនធានហិរញ្ញវត្ថុពីរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញ មកជាសហគ្រាសគ្រប់គ្រងសំរាម សំណល់រឹងទីប្រជុំជនរាជធានីភ្នំពេញ (ស.ស.ភ) ឱ្យបានលឿន ពោលគឺអាចបង្កើតជាសហគ្រាសថ្មីមួយនៅថ្នាក់ក្រោមជាតិបាន នៅក្នុងខែតុលា ឬខែវិច្ឆិកា ឆ្នាំ២០២៣​ ដ៏ខ្លីខាងមុខនេះ ។

ការជម្រុញបែបនេះបានធ្វើឡើង ខណៈលោកអញ្ជើញជាអធិបតីភាពក្នុងកិច្ចប្រជុំពាក់ព័ន្ធនិងការងារនេះ នារសៀលថ្ងៃទី១៤ ខែកញ្ញា ឆ្នាំ២០២៣នេះ នៅសាលារាជធានីភ្នំពេញ ដោយមានការចូលរួមពីលោក ប៉ាក សុខារ៉ាវុត សមាជិកក្រុមប្រឹក្សាភិបាល (ស.ស.ក) និងជាអនុរដ្ឋលេខាធិការក្រសួងបរិស្ថាន តំណាងក្រសួងបរិស្ថាន, តំណាងក្រសួងមហាផ្ទៃ, សមាជិកក្រុមប្រឹក្សាភិបាល (ស.ស.ភ) តំណាងក្រសួងរ៉ែ និងថាមពល, ប្រធានរតនាគាររាជធានីភ្នំពេញ, ប្រធានមន្ទីរសេដ្ឋកិច្ច និងហិរញ្ញវត្ថុរាជធានីភ្នំពេញ និងអគ្គនាយកសហគ្រាសគ្រប់គ្រងសំរាម សំណល់រឹងទីប្រជុំជនរាជធានីភ្នំពេញ (ស.ស.ភ) ។

លោក ឃួង ស្រេង ថ្លែងដូចនេះថា​ ការផ្ទេរមុខងារ បំណុល និងធនធានហិរញ្ញវត្ថុពីរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញ មកសហគ្រាសគ្រប់គ្រងសំរាម សំណល់រឹងទីប្រជុំជនរាជធានីភ្នំពេញ (ស.ស.ភ) នេះ គឺមានគោលបំណងឱ្យដំណើរការនៃការប្រមូល និងការគ្រប់គ្រងសំរាមនៅក្នុងរាជធានីភ្នំពេញ បានកាន់តែល្អប្រសើរជាងមុន ដោយសារថា នៅភ្នំពេញបច្ចុប្បន្ននេះ ប្រជាជនរស់នៅរបៀបស៊ីវីល័យ ដែលទាមទារឱ្យរាជធានីភ្នំពេញ ជាទីក្រុងស្អាត មានបរិស្ថានល្អ មិនមានសំរាមពាសវាលពាសកាល ។

លោក ឃួង ស្រេង បានបន្តទៀតថា កិច្ចប្រជុំខាងលើនេះ គឺដើម្បីស្វែងរកនីតិវិធីនៃការផ្ទេរ មុខងារ បំណុល និងធនធានហិរញ្ញវត្ថុពីរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញ មកសហគ្រាសគ្រប់គ្រងសំរាម សំណល់រឹងទីប្រជុំជនរាជធានីភ្នំពេញ (ស.ស.ភ) ឱ្យបានលឿន យ៉ាងយូរផ្ទេរឱ្យបានរួចរាល់ នៅក្នុងខែតុលា ឬខែវិច្ឆិកា ឆ្នាំ២០២៣ខាងមុខនេះ ។

ដើម្បីឱ្យការងារនេះ ដំណើរការទៅបានលឿន លោក ឃួង ស្រេង ក៏បានជម្រុញឱ្យក្រុមការងារបច្ចេកទេស, រតនាគារ និងក្រុមការងារពាក់ព័ន្ធ ចាប់ដៃគ្នា ទំនុកបំរុងគ្នាធ្វើការនេះ ទើបសហគ្រាសថ្មីរបស់រដ្ឋ នៅថ្នាក់ក្រោមជាតិមួយនេះ នឹងកើតមានឡើងបានលឿន។ សហគ្រាសនេះរកស៊ីបានតែត្រឹមរួចខ្លួនបានហើយ មិនបាច់ចំណេញក៏បានដែរ សំខាន់ឱ្យតែរាជធានីភ្នំពេញស្អាត និងមានបរិស្ថានល្អ ៕

(សូមអានបន្ត)

សម្តេចធិបតី ហ៊ុន ម៉ាណែត ចង់ឃើញក្រុមហ៊ុន Huawei វិនិយោគផលិតសម្ភារៈគ្រឿង​បង្គំអេឡិច​ត្រូនិក និងបណ្តុះបណ្តាលផ្នែកឌីជីថល

 (ប៉េកាំង, ចិន)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញ​បំណងចង់ឃើញក្រុមហ៊ុន Huawei ដែលជាក្រុមហ៊ុនបច្ចេកវិទ្យាខ្នាតយក្សរបស់ចិន វិនិ​យោគផលិតសម្ភារៈគ្រឿងបង្គំអេឡេិចត្រូនិក និងបណ្តុះបណ្តាលផ្នែកបច្ចេកវិទ្យាឌីជីថល​នៅ​កម្ពុជា។

បំណងរបស់សម្តេចធិបតីនាយករដ្ឋមន្ត្រី បានធ្វើឡើងនៅក្នុងជំនួបជាមួយលោក​ លាំង ហ័រ (Liang Hua) ប្រធានក្រុមប្រឹក្សាភិបាលក្រុមហ៊ុន Huawei Technology Co., Ltd. នៅរសៀលថ្ងៃព្រហស្បតិ៍ ទី១៤ ខែកញ្ញា ឆ្នាំ២០២៣ នាទីរដ្ឋធានីប៉េកាំង ប្រទេសចិន។

ឈរលើស្មារតីកៀរគរការវិនិយោគ ដើម្បីជំរុញសេដ្ឋកិច្ចជាតិ និងការងារជូនប្រជាពលរដ្ឋនោះ សម្តេចធិបតី ហ៊ុន ម៉ាណែត ក្រោយពេលអញ្ជើញដល់ប្រទេសចិនភ្លាម មិនបានបង្អែ​បង្អង់​នោះ​ឡើយទោះបីចំណាយពេលលើយន្តហោះច្រើនម៉ោងយ៉ាងណាក្តី សម្តេចធិបតី បានជួប​ជា​​មួយនឹងក្រុមវិនិយោគធំៗរបស់ចិនជាបន្តបន្ទាប់។ ក្រុមហ៊ុនវិនិយោគធំៗរបស់ចិនចំនួន៤ ត្រូវបានសម្តេចធិបតី ហ៊ុន ម៉ាណែត ជួបជាបន្តបន្ទាប់។ ក្នុងនោះមានក្រុមហ៊ុន Huawei ដែលជាក្រុមហ៊ុនបច្ចេកវិទ្យាដ៏ល្បាញល្បីមួយរបស់ចិនផងដែរ។

នៅក្នុងជំនួបនោះ លោក​ លាំង ហ័រ បានថ្លែងអំណរគុណសម្ដេចធិបតី ដែលអនុញ្ញាតឱ្យ​រូប​លោក និងគណៈប្រតិភូ​ក្រុម​ហ៊ុន បានចូលជួបសម្តែងការគួរសម និងពិភាក្សាការងារ។ លោក លាំង ហ័រ ​​ក៏បាន​អបអរ​សា​ទរ​ជូនសម្ដេចធិបតី ​ត្រូវបានប្រជាពលរដ្ឋ និងរដ្ឋសភា បោះឆ្នោតគាំទ្រជានាយករដ្ឋមន្ត្រីនីតិកាលទី៧ នៃរដ្ឋសភា​។

ប្រធានក្រុមហ៊ុនរូបនេះ ក៏បានអរគុណសម្ដេចធិបតី ក៏ដូចជារាជរដ្ឋាភិបាលកម្ពុជា តែងតែយក​ចិត្តទុកដាក់ និងគាំទ្រក្រុមហ៊ុន Huawei។ លោក​ ​លាំង ហ័រ ក៏​បាន​គោរពរាយការណ៍ជូន​សម្ដេច​ធិបតី​ អំពីសមិទ្ធផលជាច្រើនដែលក្រុមហ៊ុន Huawei បានសហការជាមួយ​ក្រុមហ៊ុន និងដៃគូនានា នៅក្នុងប្រទេសកម្ពុជា ក្នុងរយៈ​ពេល​ ២៥​ឆ្នាំ​កន្លងមកនេះ ក្នុងការអភិវឌ្ឍ​ហេដ្ឋារចនាសម្ព័ន្ធឌីជីថល ប្រព័ន្ធទូរគមនាគមន៍ និងប្រព័ន្ធឆ្លាតវៃ។​

សម្ដេចអធិបតីនាយករដ្ឋមន្ត្រី បានស្វាគមន៍​យ៉ាងកក់ក្តៅចំពោះ លោក លាំង ហ័រ និងគណៈ​ប្រតិភូ​ក្រុមហ៊ុន និង​បានថ្លែងអំណរគុណចំពោះ​ក្រុមហ៊ុន Huawei ដែល​សហការ​ជាមួយ​ក្រសួង ស្ថាប័នពាក់ព័ន្ធ ជួយកសាង និង​អភិវឌ្ឍន៍ហេដ្ឋារចនាសម្ព័ន្ធ ទូរគមនាគមន៍ និ​ងបាន​ជួយអភិវឌ្ឍវិស័យទូរគមនាគមន៍នេះ ក្នុង​រយៈពេល​ជា​ង២ទសវត្សរ៍​មក​​នោះ។

សម្ដេចអធិបតី​ សង្ឃឹមថាក្រុមហ៊ុន Huawei នឹងបន្តនាំចូលបច្ចេកវិទ្យាថ្មីៗ និងទំនើបពី​ប្រ​ទេ​ស​​ចិន មកកាន់​កម្ពុជា និងបានគូសបញ្ជាក់ថា រាជរដ្ឋាភិបាលកម្ពុជា នៅតែរក្សា​គោលនយោ​បាយ​នៃទំនាក់ទំនង និង​កិច្ចសហប្រតិបត្តិការល្អ​រវាងកម្ពុជា-ចិន និងបន្តគាំទ្រសម្របសម្រួល និង​លើកទឹកចិត្តឱ្យ​មានការវិនិយោគកាន់តែច្រើនមកកម្ពុជា។ សម្ដេចអធិបតី ក៏បានបញ្ជាក់​អំពី​សារៈសំខាន់នៃ​សុខសន្ដិភាព និង​ស្ថិរភាពនយោបាយនៅកម្ពុជា ដែលជាមូលដ្ឋានគ្រឹះ​នៃ​ការ​បង្កើន​ទំនុកចិត្តដល់វិនិយោគិន​នៅកម្ពុជា។

សម្ដេចធិបតី ហ៊ុន ម៉ាណែត បានគូសរំលេចថា ការអភិវឌ្ឍលើហេដ្ឋារចនា​សម្ព័ន្ធ​ឌីជីថល​ គឺ​មានសារៈសំខាន់ណាស់ ដែល​ទាម​ទារ​ឱ្យ​រាជរដ្ឋាភិបាល និងវិស័យឯកជន​ធ្វើការ​រួម​គ្នានៅ​ក្នុង​ការអភិវឌ្ឍវិស័យនេះឱ្យ​កាន់តែរីកចម្រើនថែមទៀត។ សម្តេចធិបតី បាន​​ស្វា​គមន៍ក្រុមហ៊ុន Huawei ចំពោះ​ការវិនិយោគលើ​បច្ចេកវិទ្យាថ្មីៗ និង​ការ​វិនិយោគ​លើ​ការ​អភិវឌ្ឍ​​ហេដ្ឋារចនា​សម្ព័ន្ធ​ឌីជីថល។ សម្ដេចអធិបតី ក៏បានលើកទឹកចិត្តឱ្យ​ក្រុមហ៊ុន Huawei ពិនិត្យលទ្ធភាព​វិនិ​យោគលើវិស័យផ្សេងៗទៀត​ ដូចជា​ការវិនិយោគ​ការផលិត​សម្ភារ​គ្រឿង​បង្គុំ​អេឡិក​​ត្រូនិកជា​ដើម។

សម្ដេចធិបតី និង​​លោក​ លាំង ហ័រ ក៏​បានពិភាក្សា​អំពីការ​បណ្ដុះបណ្ដាលធនធានមនុស្ស​លើ​ជំនាញឌីជីថល ដោយក្រុមហ៊ុន Huawei បានបង្ហាញចំណាប់អារម្មណ៍លើ​ការ​បណ្ដុះ​បណ្ដាល​​ជំនាញនេះ ដោយចាប់ផ្តើម​ពីកម្រិតបឋមសិក្សា​​ រហូត​ដល់កម្រិត​សាកល​វិទ្យាល័យ ​​។ ​កន្លង​មកនេះ ​ក្រុមហ៊ុន​ Huawei ក៏​បាន​សហការ​ជាមួយ​ដៃគូនៅតាមសាកលវិទ្យាល័យ​មួយចំនួននៅកម្ពុជា​ ​លើការងារបណ្ដុះបណ្ដាលធនធានមនុស្សលើ​វិស័យ​ឌីជីថលផងដែរ​។

សម្តេចធិបតី បានគូសបញ្ជាក់ជាថ្មីនូវជំហរស្វាគមន៍ និងការគាំទ្ររបស់រាជរដ្ឋាភិបាល ចំពោះ​ដំណើរការអាជីវកម្ម និងវិនិយោគរបស់ក្រុមហ៊ុននៅកម្ពុជា ដែលស្របតាមតម្រូវ​ការសង្គម​សេដ្ឋ​កិច្ចរបស់កម្ពុជា និងគោលនយោបាយរបស់រាជរដ្ឋាភិបាល៕

(សូមអានបន្ត)

រដ្ឋមន្ដ្រីសុខាភិបាល ដាក់ចេញនូវយុទ្ធសាស្ដ្រ ៩ចំណុច ជំរុញលើកកម្ពស់គុណភាពថែទាំសុខភាពសេវាសាធារណៈ និងឯកជន រួមទាំងពង្រឹងនិយ័តកម្មសេវាសុខាភិបាល

(ភ្នំពេញ)៖ ដើម្បីឆ្លើយតបកាន់តែមានប្រសិទ្ធភាព និងជំរុញការចូលរួមអនុវត្តឱ្យទទួលបានជោគជ័យនូវកម្មវិធីគោលនយោបាយអាទិភាពចំនួន៦ របស់រាជរដ្ឋាភិបាល ក្នុងនីតិកាលទី៧ នៃរដ្ឋសភា លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានដាក់ចេញនូវយុទ្ធសាស្ត្រ សំខាន់ៗចំនួន ៩ចំណុច ជំរុញលើកកម្ពស់គុណភាពថែទាំសុខភាព ទាំងសេវាសាធារណៈ និងឯកជន ជាមួយនឹងការពង្រឹងនិយ័តកម្មសេវាសុខាភិបាល។

លោករដ្ឋមន្ត្រីក៏បានដាក់ការងារបន្ទាន់នេះ ជូនលោកសាស្រ្តាចារ្យ ហ៊ុន ចំរើន ទីប្រឹក្សាសម្តេចធិបតីនាយករដ្ឋមន្រ្តី ដើម្បីដឹកនាំប្រជុំ ដែលធ្វើឡើងនៅរសៀលថ្ងៃទី១៣ ខែកញ្ញា ឆ្នាំ២០២៣នេះ នាទីស្តីការក្រសួងសុខាភិបាល។

កិច្ចប្រជុំនេះក៏មានការអញ្ជើញចូលរួមពីលោក ស៊ិក ប៊ុណ្ណា រដ្ឋលេខាធិការក្រសួងសុខាភិបាល,លោក ង៉ូវ កាង រដ្ឋលេខាធិកាក្រសួងសុខាភិបាល និងថ្នាក់ដឹកនាំអគ្គនាយកដ្ឋានបច្ចេកទេសសុខាភិបាល និងមន្រ្តីបច្ចេកទេស រួមទាំងលោក រស់ ប្រាជ្ញ ពន្លឺ ទីប្រឹក្សាក្រសួងសុខាភិបាល និងជាតំណាងគណៈគ្រូពេទ្យកម្ពុជា។

បើតាមការបញ្ជាក់របស់លោក ហ៊ុន ចំរើន ការចូលរួមពីគណៈគ្រូពេទ្យកម្ពុជានេះ ដើម្បីពិនិត្យមើល «ប្រកាស ស្តីពីការផ្សព្វផ្សាយលក្ខណៈវិជ្ជាជីវៈសុខាភិបាល» ក្នុងគោលបំណង ធ្វើឲ្យសាធារណៈជន បានទទួលនូវព័ត៌មានដែលអាចជឿជាក់បានយកទៅពិចារណា ក្នុងការស្វែងរកសេវាសុខាភិបាលសមស្របណាមួយ ទៅតាមសេចក្តីត្រូវការ និងដើម្បីធ្វើឲ្យអ្នកប្រកបវិជ្ជាជីវៈសុខាភិបាលទាំងអស់មានសេចក្តីថ្លៃថ្នូរ គោរពអនុវត្តតាមលិខិតបទដ្ឋានគតិយុទ្ធដែលចូលជាធរមាន។

សូមជម្រាបថាក្នុងពេលថ្មីៗនេះ លោកសាស្រ្តាចារ្យរដ្ឋមន្រ្តី បានចេញបទបញ្ជាយ៉ាងម៉ឺងម៉ាត់ ដល់មូលដ្ឋានសុខាភិបាលទាំងអស់ ត្រូវអនុវត្តបទដ្ឋានបច្ចេកទេស គោរពក្រមសីលធម៌វិជ្ជាជីវៈ និងលិខិតបទដ្ឋានគតិយុទ្ធជាធរមាន ក្នុងការផ្តល់សេវាសុខាភិបាលជូនអ្នកជំងឺ ក៏ដូចជាប្រជាពលរដ្ឋទូទៅប្រកបដោយគុណភាព សុវតិ្តភាព ប្រសិទ្ធភាព និងសមធម៌៕

(សូមអានបន្ត)

រដ្ឋមន្រ្តីក្រសួងបរិស្ថាន អនុញ្ញាតឲ្យនាយកគ្រប់គ្រងក្រុមហ៊ុន HEINEKEN Cambodia ចូលជួបសម្តែងការគួរសម

 (ភ្នំពេញ)៖ ជំនួបសម្តែងការគួរសមរបស់ក្រុមហ៊ុន HEINEKEN Cambodia ជូនចំពោះលោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ត្រូវបានរៀបចំឡើង នៅទីស្តីការក្រសួងបរិស្ថាន នារសៀលថ្ងៃពុធ ទី១៣ ខែកញ្ញា ឆ្នាំ២០២៣។

លោក Andy HEWSON នាយកគ្រប់គ្រងក្រុមហ៊ុន HEINEKEN Cambodia បានថ្លែងអបអរសាទរជូន ចំពោះលោកបណ្ឌិត អ៊ាង សុផល្លែត ដែលត្រូវបានរាជរដ្ឋាភិបាលកម្ពុជា នាអាណត្តិទី៧ តែងតាំងជារដ្ឋមន្រ្តី ក្រសួងបរិស្ថាន ហើយជាការឆ្លើយតប លោករដ្ឋមន្ត្រី បានស្វាគមន៍យ៉ាងកក់ក្តៅ ចំពោះទំនាក់ទំនង និងកិច្ចសហការដ៏ល្អ ជាមួយគ្នានេះផងដែរ។

លោករដ្ឋមន្រ្តីបរិស្ថាន ក៏បានផ្សព្វផ្សាយនូវសកម្មភាពចម្បងៗ របស់ក្រសួងបរិស្ថាន ដែលបច្ចុប្បន្នកំពុងអនុវត្តយុទ្ធនាការ កាត់បន្ថយកាប្រើប្រាស់ប្លាស្ទិកជាមួយសិស្សានុសិស្ស នៅតាមសាលារៀនទូទាំងប្រទេស ចាប់ពីថ្ងៃទី០១ ខែកញ្ញា ឆ្នាំ២០២៣មក។ 

ជាលទ្ធផលក្រសួងបរិស្ថានទទួលបានសាលារៀនចូលរួមចំនួន ៥ខេត្ត និងមានសិស្សានុសិស្សជិត ៣ម៉ឺននាក់ចូលរួមប្តេជ្ញាមិនប្រើប្លាស្ទិក ១ថ្ងៃក្នុង១សប្តាហ៍។

យល់ស្របទាំងស្រុងជាមួយនឹងសកម្មភាពរបស់ក្រសួងបរិស្ថាន លោក Andy HEWSON បានថ្លែងថា ក្រុមហ៊ុនរបស់លោក មិនប្រើប្រាស់ប្លាស្ទិកទេ ហើយបានប្រើដប និងអាលុយមីញ៉ូមជំនួសវិញ រួមទាំងគោរពបាននូវគោលការណ៍ 4Rs របស់ក្រសួងបរិស្ថានដែលបានដាក់ចេញ ដែលរួមមាន៖ បដិសេធមិនប្រើប្លាស្ទិក កាត់បន្ថយការប្រើប្រាស់ប្លាស្ទិក ប្រើប្រាស់ឡើងវិញ និងកែច្នៃឡើងវិញ៕

(សូមអានបន្ត)