សម្តេចក្រឡាហោមចាត់ទុកករណីជួញដូរមនុស្សកើតមានឡើងនៅប្រទេសកម្ពុជា គឺមានអង្គការចាត់តាំង ដែលសុទ្ធសឹងជាជនបរទេសទាំងអស់

សម្តេចក្រឡាហោម បានចាត់ទុកករណីជួញដូរមនុស្សកើតមានឡើង នៅប្រទេសកម្ពុជា នារយៈពេលចុងក្រោយនេះ គឺមានអង្គការចាត់តាំង ខណៈមេខ្លោង និងអ្នកប្រព្រឹត្តបទល្មើសនេះ ស្ទើរតែសុទ្ធសឹងគឺជាជន បរទេស៩៩.៩៩ភាគរយ។  ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ នូវសមិទ្ធផលស្នងការដ្ឋាន នគរបាលរាជធានីភ្នំពេញ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានឱ្យដឹងថា បច្ចុប្បន្ននេះមានបទល្មើសថ្មីមួយ លេចឡើងយ៉ាងសាហាវចុងក្រោយនៅកម្ពុជា ដែលមិនមែនជាបទល្មើសប្រពៃណីទេ គឺបទល្មើសឆបោកតាមប្រព័ន្ធទូរគមនាគមន៍ ដែលបានធ្វើឱ្យប្រទេសកម្ពុជា បានក្លាយជាប្រទេសរងគ្រោះដោយសារតែការជួញដូរមនុស្ស ព្រោះអ្នកប្រព្រឹត្តបទល្មើស ដែលជាមេខ្លោងនោះ៩៩.៩៩ភាគរយជាជនបរទេស ហើយការរៀបចំមនុស្សចេញមកពី ប្រទេសខ្លួន

នោះ ក៏មិនមែនជាជនជាតិខ្មែរដែរ។ សម្តេចក្រឡាហោមបន្តថា ករណីនេះត្រូវបានគេចាត់ទុកកម្ពុជា ចូលក្នុងបញ្ជីខ្មៅ និងប្រទេសជាប់លេខ៣ ដែលមានភាពព្រងើយកន្តើយ ក្នុងការទប់ ស្កាត់បទល្មើសមួយនេះ។ សម្តេចក្រឡាហោមបញ្ជាក់ថា សម្រាប់ក្រុមជនប្រព្រឹត្តបទល្មើស និងមេខ្យល់ដែលបញ្ជូនមនុស្សពីប្រទេសរបស់ខ្លួន ដែលសមត្ថកិច្ចបង្ក្រាបបានជាបន្តបន្ទាប់នេះ គឺសុទ្ធតែជនបរទេសដែលបានរៀបចំគម្រោងការបានយ៉ាងល្អ ខណៈជនរងគ្រោះភាគច្រើនគឺយកបម្រើការតាមបនល្បែងទាំងអស់។ សម្ដេចក្រឡាហោម បន្ដថា ចំពោះបទល្មើសឆបោកតាមប្រព័ន្ធទូរគមនាគមន៍ នៅរាជធានីភ្នំពេញ សម្ដេច ក៏បានទទួលពាក្យបណ្ដឹងចំនួន២ ហើយសមត្ថកិច្ចបានធ្វើការស្រាវជ្រាវ ហើយបញ្ជូលជនរងគ្រោះ ទាំងនោះ ត្រឡប់ទៅប្រទេសដើមវិញ។ ដូចហេតុនេះសម្តេចក្រឡាហោម បានធ្វើការអំពាវនាវ ដល់ភាគីពាក់ព័ន្ធទាំងអស់ ត្រូវខិតខំរួមគ្នាឱ្យបានសកម្មបន្ថែមទៀត ក្នុងកិច្ចការទប់ស្កាត់នូវបទល្មើស នៃការជួញដូរមនុស្សនេះ ខណៈបទល្មើសនេះបាននិងកំពុងកើតឡើង នៅលើទឹកដីកម្ពុជា គួរឱ្យព្រួយបារម្ភយ៉ាងខ្លាំង។ សំឡេង៖ «ជនល្មើសមេខ្លោងជួញដូរមនុស្សតាមប្រព័ន្ធ

ទូរគមនាគមន៍នេះ កំពុងតែយកកម្ពុជា ដើម្បីជាកន្លែងប្រព្រឹត្តបទល្មើសនោះ អ៊ីចឹងកម្ពុជាយើងគឺជាកន្លែងរងគ្រោះ ពីព្រោះអ្នកប្រព្រឹត្តបទល្មើសជាមេខ្លោង៩៩.៩៩ភាគរយមិនមែនខ្មែរ ដែលនៅកម្ពុជា ហើយមេខ្យល់ដែលរៀបចំបញ្ជូនមនុស្សចេញពីប្រទេសរបស់ខ្លួននោះ ក៏មិនមែនជាជនជាតិខ្មែរដែរ ឧទាហរណ៍មកពីវៀតណាមគឺមេខ្យល់វៀតណាម ចិនគឺមេខ្យល់មកពីចិន មកពីតៃវ៉ាន់ មេខ្យល់មកពីតៃវ៉ាន់ ម៉ាឡេស៊ីឥណ្ឌូនេស៊ី មេខ្យល់មកពីប្រទេសទាំងនោះ ដែលវាទាក់ពួកនិងមេខ្យល់នៅខាងក្នុងនេះ នាំមកដើម្បី បម្រើការងាល្បែងតាមប្រព័ន្ធទូរគមនាគមន៍ មានអនឡាញអីជាដើម។» 

នាឱកាសនោះ សម្តេចក្រឡាហោម ស ខេង ក៏បានក្រើនរំលឹកដល់សមត្ថកិច្ចជំនាញពាក់ព័ន្ធទាំងអស់ ត្រូវសហការគ្នាធ្វើយ៉ាងណាទប់ស្កាត់បទល្មើសទាំងនេះឱ្យកាន់តែមានប្រសិទ្ធភាព ដើម្បីលើកមុខមាត់កម្ពុជា ជាពិសេសបន្តបង្ការ ទប់ស្កាត់ និងបង្រ្កាបអំពើអនាចារ ការជួញដូរមនុស្ស ជាពិសេសស្ដ្រីនិងកុមារ អំពើហិង្សាក្នុងគ្រួសារ និងក្មេងទំនើង តាមសង្កាត់ និងខណ្ឌនានាក្នុងរាជធានីភ្នំពេញ។ សូមរំលឹកថា ចាប់ពីថ្ងៃទី០១ ខែមករា ដល់ថ្ងៃទី២០ ខែសីហា ឆ្នាំ២០២២ អាជ្ញាធរមានសមត្ថកិច្ចកម្ពុជា បានរកឃើញ និងជួយសង្គ្រោះជនបរទេស បានចំនួន៨៧ករណី ស្មើនឹងប្រមាណ ៨៦៥នាក់ ព្រមទាំងបានកសាងសំណុំរឿងបញ្ជូនទៅ តុលាការចំនួន១៧ករណី ជនសង្ស័យសរុបចំនួន ៦០នាក់។ ដោយឡែក នាសប្ដាហ៍ទី៤ ខែសីហា ឆ្នាំ២០២២ អាជ្ញាធរមានសមត្ថកិច្ចកម្ពុជា បានបើកកិច្ចប្រតិបត្តិការជួយសង្គ្រោះជនរងគ្រោះ សរុបចំនួន ០៧ករណី ដោយបានសង្គ្រោះជនរងគ្រោះ សរុបចំនួន ២៥នាក់ (មាន ៦ សញ្ញាតិ) និងឃាត់ខ្លួនជនសង្ស័យ សរុបចំនួន ២៣នាក់ (មាន ៤ សញ្ញាតិ) នៅក្នុងខេត្តព្រះសីហនុ ខេត្តពោធិ៍សាត់ ខេត្តស្វាយរៀង និងខេត្តឧត្តរមានជ័យ៕

(សូមអានបន្ត)

រាជរដ្ឋាភិបាលសម្រេចផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក ឆ្នាំ២០២២ សម្រាប់ថ្នាក់ជាតិ

 ភ្នំពេញ ថ្ងៃទី០៩ ខែកញ្ញា ឆ្នាំ២០២២ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានសម្រេចផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២២នេះ សម្រាប់ថ្នាក់ជាតិ។ ដោយឡែក ចំពោះការរៀបចំពិធីបុណ្យអុំទូកកម្សាន្តសប្បាយរបស់ប្រជាជននៅតាមបណ្ដារាជធានី-ខេត្តនានាទូទាំងប្រទេស គឺអាចប្រព្រឹត្តទៅបានតាមលទ្ធភាពជាក់ស្ដែង។

បើតាមសេចក្ដីប្រកាសព័ត៌មាន ស្ដីពីលទ្ធផលនៃសម័យប្រជុំពេញអង្គគណៈរដ្ឋមន្ត្រី ដែលចេញផ្សាយនាព្រលប់ថ្ងៃទី០៩ ខែកញ្ញា ឆ្នាំ២០២២ បានឱ្យដឹងថា រាជរដ្ឋាភិបាលសម្រេចផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២២នេះ សម្រាប់ថ្នាក់ជាតិ។ ដោយឡែក ចំពោះការរៀបចំពិធីបុណ្យអុំទូកកម្សាន្តសប្បាយរបស់ប្រជាជននៅតាមបណ្ដារាជធានី-ខេត្តនានាទូទាំងប្រទេស គឺអាចប្រព្រឹត្តទៅបានតាមលទ្ធភាពជាក់ស្ដែង ដោយគិតទាំងពិធីបុណ្យភ្ជុំបិណ្ឌនៅខែកញ្ញា និងពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅខែវិច្ឆិកា ដើម្បីបង្កភាពសប្បាយរីករាយជូនប្រជាពលរដ្ឋ បង្កើនបរិយាកាសទេសចរណ៍ ក៏ដូចជាផ្ដល់ឱកាសនៃការរកប្រាក់ចំណូលដល់បងប្អូនប្រជាពលរដ្ឋផងដែរ។

នៅក្នុងកិច្ចប្រជុំគណៈរដ្ឋមន្ត្រីនេះដែរ សម្ដេចតេជោក៏បានណែនាំដល់គណៈកម្មាធិការជាតិគ្រប់គ្រងគ្រោះមហន្តរាយ ក្រសួង-ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ ត្រូវបង្កើនការយកចិត្តទុកដាក់ និងប្រុងប្រយ័ត្នខ្ពស់ ឆ្លើយតបនឹងបញ្ហាគ្រោះទឹកជំនន់ដែលបណ្ដាលមកពីជំនន់ទឹកភ្លៀង និងទឹកទន្លេមេគង្គ ដោយត្រូវត្រៀមរៀបចំ និងចាត់វិធានការចាំបាច់នានាដើម្បីជួយសង្គ្រោះអាយុជីវិតប្រជាពលរដ្ឋនៅតាមភូមិសាស្ត្រដែលទទួលខុសត្រូវ ឱ្យបានទាន់ពេលវេលា ព្រមទាំងកាត់បន្ថយឱ្យបានជាអតិបរមានូវការលំបាក និងផលប៉ះពាល់ដល់ទ្រព្យសម្បត្តិ និងអាយុជីវិតរបស់ប្រជាពលរដ្ឋ៕

(សូមអានបន្ត)

រដ្ឋបាលខេត្តព្រះវិហារ បើកកិច្ចប្រជុំគណៈកម្មាធិការគ្រប់គ្រងដីរដ្ឋ ខេត្តព្រះវិហារ

     

ព្រះវិហារ៖ នៅព្រឹកថ្ងៃទី០៨ ខែកញ្ញា ឆ្នាំ២០២២ រដ្ឋបាលខេត្តព្រះវិហារ បានរៀបចំបើកកិច្ច ប្រជុំគណៈកម្មាធិការគ្រប់គ្រងដីរដ្ឋខេត្តព្រះវិហារ នៅសាលប្រជុំសាលាខេត្ត ក្រោមអធិបតីភាព ឯកឧត្តម គីម រិទ្ធី អភិបាលខេត្តព្រះវិហារ និងមានការ អញ្ជើញចូលរួមពី ឯកឧត្តម លោកជំទាវ ជាអភិបាលរងខេត្ត ថ្នាក់ដឹកនាំមន្ទីរ-អង្គភាពពាក់ព័ន្ធ អភិបាលក្រុង-ស្រុក ព្រមទាំងថ្នាក់ដឹកនាំរដ្ឋបាលសាលាខេត្តជាច្រើនរូបទៀត ។ ឯកឧត្តម គីម រិទ្ធី បានស្នើដល់ ឯកឧត្តម លោកជំទាវ ព្រមទាំងលោក លោកស្រី ជាសមាជិកគណៈកម្មាធិការគ្រប់គ្រងដីរដ្ឋទាំងអស់ ត្រូវចូលរួមពិភាក្សានិងចូលរួមជាគំនិត

យោបល់ល្អៗ ទៅលើការគ្រប់គ្រងដីរដ្ឋ ការងារដីសម្បទានសេដ្ឋកិច្ច ការងារដីសម្បទានសង្គមកិច្ច និងការចុះបញ្ជីដីធ្លីជាដើម ដើម្បីឱ្យ ការងារគ្រប់គ្រងដីរដ្ឋក្នុងខេត្ត ទទួលបានលទ្ធផលកាន់តែល្អប្រសើរ ។ កិច្ចប្រជុំបានស្ដាប់នូវបទបង្ហាញ របស់មន្ទីររៀបចំដែន ដីនគរូបនីយកម្ម សំណង់ និងសុរិយោដី ដែលទាក់ទងទៅនឹងបញ្ហាដីធ្លីក្នុងខេត្ត ព្រមទាំងបានស្ដាប់នូវ របាយការណ៍របស់ លោក អ៊ុង វុទ្ធី អភិបាលរងខេត្ត ស្ដីពីការដោះស្រាយទំនាស់ដីធ្លីក្នុង ភូមិសាស្ត្រខេត្តព្រះវិហារនាពេលកន្លងមក ។ 

កិច្ចប្រជុំក៏បានពិភាក្សាលើបញ្ហាមួយចំនួនទៀត ដូចជាការស្នើសុំដីសម្រាប់ការសាងសង់អគារ ក៏ដូចជា សុំចុះបញ្ជីដីធ្លីរបស់មន្ទីរមួយចំនួន បញ្ហាទំនាស់ដីធ្លីរវាងមន្ទីរស្ថាប័នរដ្ឋ និង ស្ថាប័នរដ្ឋដូចគ្នា នឹងរវាងស្ថាប័នរដ្ឋ និងឯកជន ព្រមទាំងបញ្ហាសំណើសុំកំណត់អត្តសញ្ញាណ ដីដែលជាជនជាតិដើមភាគតិចកួយ ស្នើសុំជួយសម្រប សម្រួល កាត់ដីដែលពាក់ព័ន្ធ ជាមួយ ក្រុមហ៊ុនហ្គ្រីន  ឈ័យ ខេមបូឌា ខូអិលធីឌី  ដែលបានចូលក្នុងព្រំដីសហគមន៍ជនជាតិដើមភាគតិចកួយ ដើម្បីចុះបញ្ជីដីសហគមន៍ជាកម្មសិទ្ធិសមូហភាព ព្រមទាំងបញ្ហាផ្សេងៗជាច្រើន ទៀតដែលទាក់ទងទៅនឹងដីធ្លី ៕: មន្ទីរព័ត៌មានខេត្តព្រះវិហារ

(សូមអានបន្ត)

គណៈប្រតិភូសាលារាជធានីភ្នំពេញបានត្រឡប់មកដល់រាជធានីភ្នំពេញវិញហើយ ជាមួយនឹងលទ្ធផលយ៉ាងត្រចះត្រចង់

ភ្នំពេញ៖ ដំណើរទស្សនកិច្ចផ្លូវការ របស់គណៈប្រតិភូសាលារាជធានីភ្នំពេញ នៅសាធារណរដ្ឋ សង្គមនិយមវៀតណាម ដឹកនាំដោយ ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកជំទាវ ត្រូវបានបញ្ចប់និងបានត្រឡប់មកដល់រាជធានីភ្នំពេញវិញហើយ កាលពីព្រលប់ថ្ងៃទី៨កញ្ញា ដោយបាននាំមកនូវលទ្ធផលយ៉ាងត្រចះត្រចង់ ។ 

នៅក្នុងដំណើរទស្សនកិច្ចកាលពីថ្ងៃទី៥កញ្ញានោះ ប្រតិភូសាលារាជធានីភ្នំពេញដឹកនាំដោយ ឯកឧត្ដម ឃួង ស្រេង បានដឹកនាំប្រតិភូជាន់ខ្ពស់រាជធានីភ្នំពេញ ធ្វើទស្សនកិច្ច និងសិក្សាគម្រោងរោងចក្រកែច្នៃសំរាម ជាថាមពលអគ្គិសនីសុកសឺន។ បន្ទាប់មក គណៈប្រតិភូបានបន្តទស្សនកិច្ចអាងប្រព្រឹត្តិកម្មទឹកកខ្វក់ ហើយនៅរសៀលថ្ងៃដដែល គណៈប្រតិភូបានចូលជួបសម្ដែងការគួរសម និងពិភាក្សាការងារ ដើម្បីពង្រឹង កិច្ចសហប្រតិបត្តិការរវាងទីក្រុងនិងទីក្រុងជាមួយ ឯកឧត្ដម TRAN SY THANH សមាជិកគណៈកម្មាធិការ កណ្ដាល និងជាប្រធានគណៈកម្មាធិការបក្សទីក្រុងហាណូយ រួមជាមួយប្រតិភូជាន់ខ្ពស់រដ្ឋធានីហាណូយ។ បន្ទាប់មក គណៈប្រតិភូកម្ពុជាបានបន្តជួបសម្ដែងការគួរសមជាមួយឯកឧត្ដម DING TIEN DUNG សមាជិកការិយាល័យនយោបាយបក្សកុម្មុយនិស្តវៀតណាម និងជាលេខាគណៈកម្មាធិការបក្ស រដ្ឋធានី ហាណូយ។ បន្ទាប់មកទៀត

 ឯកឧត្ដមឃួង ស្រេង ក្នុងជំនួបសំដែងការគួរសមនិងពិភាក្សាការងារជាមួយ លោកជិន ស៊ីថាញ់ សមាជិកគណៈកម្មាធិការកណ្តាល អនុប្រធានគណៈកម្មាធិការបក្សទីក្រុង ហាណូយ នៃសាធារណៈរដ្ឋសង្គមនិយមវៀតណាមនៅទីក្រុងហាណូយ ឯកឧត្ដមបានជំរុញឱ្យមានការផ្សព្វផ្សាយ ពីច្បាប់វិនិយោគនៃប្រទេសទាំង២ ទៅដល់អ្នកវិនិយោគនៃទីក្រុងទាំង២ឲ្យបានយល់កាន់តែច្បាស់ ងាយស្រួលក្នុងការដាក់ទុនវិនិយោគ និងពង្រឹងការទប់ស្កាត់អំពើល្មើសច្បាប់នានាសម្រាប់ទីក្រុងទាំង២។ គណៈប្រតិភូក្រុងភ្នំពេញ ក៏បានចូលជួបសំដែងការគួរសមចំពោះ ឯកឧត្ដម ឌិញ ទៀនហ្សុង សមាជិក គណៈកម្មាធិការកណ្តាល អនុប្រធានគណៈកម្មាធិការបក្សទីក្រុងហាណូយ នៃសាធារណរដ្ឋសង្គមនិយម វៀតណាម ដើម្បីរឹតចំណងមិត្តភាព សាមគ្គីភាព និងកិច្ចសហប្រតិបត្តិការរវាងទីក្រុងទាំង២ ភ្នំពេញ- ហាណូយ ដែលជាទីក្រុងសម្ពន្ធ័ភាពនឹងគ្នា។ នៅរសៀលថ្ងៃទី៦ ខែកញ្ញា គណៈប្រតិភូរដ្ឋបាលរាជធានីភ្នំពេញដឹកនាំដោយ ឯកឧត្ដម ឃួង ស្រេង បានអញ្ជើញចូលជួបសំដែងការគួរសម ជាមួយឯកឧត្ដម

 Pham Minh Chinh នាយករដ្ឋមន្ត្រីនៃ សាធារណរដ្ឋសង្គមនិយមវៀតណាម ហើយបន្ទាប់មកនៅរសៀលថ្ងៃទី៦ ខែកញ្ញាដដែល ឯកឧត្ដម ឃួង ស្រេង ដឹកនាំគណៈប្រតិភូជាន់ខ្ពស់សាលារាជធានីភ្នំពេញជួបសំដែងការគួរសមជាមួយ ឯកឧត្ដម វឿង ឌីញ ហឺ(VUONG DINH HUE) ប្រធានរដ្ឋសភានៃសាធារណរដ្ឋសង្គមនិយមវៀតណាម នៅវិមានរដ្ឋសភានាទី​ក្រុងហាណូយ។ នៅថ្ងៃទី៨ខែកញ្ញា ឯកឧត្ដមអភិបាលនិងលោកជំទាវរួមទាំងប្រតិភូរួមដំណើរ បានចូលរួមក្នុងពិធីសម្ពោធ ពិព័រណ៍ផ្សារណាត់ទេសចរណ៏អន្តរជាតិ(ITE)លើកទី១៦នៅទីក្រុងហូជីមិញ ។ ឯកឧត្ដម ឃួង ស្រេង ក៏បានជួបពិភាក្សាការងារជាមួយ លោកPHAN VAN MAI ប្រធានគណៈកម្មាធិការប្រជាជនទីក្រុ ហូជីមីញ ផងដែរ។ លោកPHAN VAN MAI ក៏បានជំរុញឱ្យមានការកើនឡើងបន្ថែមទៀត រវាងទីក្រុងទាំង២

 ហូជីមីញ.ភ្នំពេញលើវិស័យសេដ្ឋកិច្ចពាណិជ្ជកម្ម,វិនិយោគ,ទេសចរណ៍,សុខាភិបាល អប់រំ ជាដើម ទាំងផ្លូវគោក និងផ្លូវទឹកក្នុងនាមទីក្រុងសម្ពន្ធ័ភាព។ នៅថ្ងៃដដែលនោះដែរ គណៈប្រតិភូរាជធានីភ្នំពេញ បានបន្តជួបសំដែងការគួរសម និងពិភាក្សាការងារជាមួយលេខាគណៈកម្មាធិការបក្សទីក្រុងហូជីមីញ និងចូលជួបសំដែងការគួរសមជាមួយថ្នាក់ដឹកនាំនៃទីក្រុងហូជីមីញ ដោយមានការចូលរួមពីលោកសុខ ដារ៉េត អគ្គកុងស៊ុលនៃព្រះរាជាណាចក្រកម្ពុជាប្រចាំទីក្រុងហូជីមីញផងដែរ មុនធ្វើមាតុភូមិនិវត្តមកកាន់រាជធានី ភ្នំពេញវិញ។ ឯកឧត្ដមអភិបាលរាជធានីភ្នំពេញ បានលើកឡើងពីលទ្ធផលក្នុងដំណើរទស្សនកិច្ច ប្រកបដោយផ្លែផ្ការបស់គណៈប្រតិភូសាលារាជធានីភ្នំពេញនៅសាធារណរដ្ឋសង្គមនិយមវៀតណាម ពិសេសនៅទីក្រុងហាណូយ និងទីក្រុងហូជីមីញ ដែលជាសម្ពន្ធ័ភាពនឹងគ្នា៕

(សូមអានបន្ត)

អាល្លឺម៉ង់ផ្តល់ហិរញ្ញប្បទានឥតសំណងទ្វេភាគីដល់កម្ពុជា ប្រមាណ ៦៧០ លានដុល្លារអាមេរិក ក្នុងរយៈពេលជិត៣០ឆ្នាំ

ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំអន្តរក្រសួង ត្រៀមសម្រាប់ កិច្ចពិគ្រោះយោបល់ ស្តីពីកិច្ចសហប្រតិបត្តិការអភិវឌ្ឍន៍ឆ្នាំ២០២២ រវាងរាជរដ្ឋាភិបាលកម្ពុជា និង រដ្ឋាភិបាលសាធារណរដ្ឋសហព័ន្ធអាល្លឺម៉ង់ កាលពីថ្ងៃទី០៧ ខែកញ្ញា ឆ្នាំ២០២២ ។

កិច្ចប្រជុំនេះដឹកនាំដោយ ឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ គណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា ដោយមានការចូលរួមពី សំណាក់ឯកឧត្តម លោកជំទាវ លោក លោកស្រី ដែលជាតំណាងជាន់ខ្ពស់មកពីក្រសួងស្ថាប័នពាក់ព័ន្ធ របស់រាជរដ្ឋាភិបាលចំនួន ២៣ ដែលពាក់ព័ន្ធនឹងកិច្ចសហប្រតិបត្តិការជាមួយសហព័ន្ធអាល្លឺម៉ង់។គោលដៅ ចម្បងនៃកិច្ចប្រជុំនេះ គឺដើម្បីពិភាក្សានិងឯកភាពទម្រង់ដំណើរការ និងរបៀបវារៈសម្រាប់កិច្ចប្រជុំ ពិគ្រោះ យោបល់ និងត្រៀមលើកសំណើគម្រោងសុំអនុវត្តបន្ត និង/ឬ សំណើគម្រោងថ្មីទៅកាន់ភាគីអាល្លឺម៉ង់ ។

ភាគីកម្ពុជា និងភាគីអាល្លឺម៉ង់បានឯកភាពលើការរៀបចំទម្រង់ និងរបៀបវារៈសម្រាប់កិច្ចប្រជុំពិគ្រោះ យោបល់ ឆ្នាំ២០២២ នាពេលខាងមុខ ដោយបែងចែកជា ២ កម្រិត ទី ១-ការពិភាក្សាតាមវិស័យ ដើម្បី ពិភាក្សាអំពីវឌ្ឍនភាព បញ្ហាប្រឈម និងទិសដៅ ក៏ដូចជាលទ្ធផលនៃការអនុវត្តន៍គម្រោងកន្លងមក និងការលើកសំណើគម្រោងថ្មី ដែលនឹងប្រព្រឹត្តទៅចាប់ពីថ្ងៃទី១៧-១៩ ខែតុលា ឆ្នាំ២០២២ និង ២-ការពិភាក្សាកម្រិតនយោបាយ នាថ្ងៃទី១៩-២០ ខែតុលា ឆ្នាំ២០២២ ដើម្បីពិភាក្សាលើទិដ្ឋភាពនានា ដែល ពាក់ព័ន្ធនឹងកិច្ចសហប្រតិបត្តិការកម្ពុជា-អាល្លឺម៉ង់ ។

កិច្ចសហប្រតិបត្តិការអភិវឌ្ឍន៍កម្ពុជា-អាល្លឺម៉ង់ ផ្តោតចម្បងលើវិស័យអាទិភាពចំនួន៤ គឺ ១-សុខាភិបាល និងគាំពារសង្គម, ២- អភិវឌ្ឍន៍ជនបទ, ៣- អភិបាលកិច្ច និង ៤-ថាមពល និងអាកាសធាតុ ដែលមាន សង្គតិភាពយ៉ាងល្អប្រសើរទៅនឹងអាទិភាពជាតិរបស់រាជរដ្ឋាភិបាលកម្ពុជា និងរបៀបវារៈឆ្នាំ២០៣០ របស់អាល្លឺម៉ង់ ។

គិតចាប់ពីឆ្នាំ១៩៩៤-២០២១ ភាគីអាល្លឺម៉ង់បានផ្តល់ហិរញ្ញប្បទានឥតសំណងទ្វេភាគី ប្រមាណ ៦៧០ លាន ដុល្លារអាមេរិក ស្មើនឹងប្រមាណ ២.៦% នៃទំហំហិរញ្ញប្បទានទាំងអស់ ដែលផ្ដល់ដោយដៃគូអភិវឌ្ឍន៍ មកកម្ពុជា ។ ទំហំហិរញ្ញប្បទាននេះមិនរាប់បញ្ចូលហិរញ្ញប្បទានសហប្រតិបត្តិការ ដែលភាគីអាល្លឺម៉ង់ផ្តល់ ដល់កម្ពុជាតាមរយៈគម្រោង ថ្នាក់តំបន់ និងសកល ព្រមទាំងតាមរយៈស្ថាប័នហិរញ្ញវត្ថុអន្តរជាតិ, អង្គការសហប្រជាជាតិ និងសហភាពអឺរ៉ុប ៕

(សូមអានបន្ត)

ប្រកាសចូលកាន់មុខតំណែងថ្មី អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ

ភ្នំពេញ: ថ្ងៃទី០៨ ខែកញ្ញា ឆ្នាំ២០២២ រសៀលថ្ងៃ១២កើត ខែភទ្របទ ឆ្នាំខាល ចត្វាស័កព.ស. ២៥៦៦ ត្រូវនឹងថ្ងៃពុធ ទី០៧ ខែកញ្ញា ឆ្នាំ២០២២ លោក កើត ឆែ អភិបាលរងរាជធានីភ្នំពេញ តំណាងឱ្យឯកឧត្តម ឃួង ស្រេង អភិបាលរាជធានីភ្នំពេញ បានអញ្ជើញក្នុងពិធីប្រកាសចូលកាន់មុខតំណែង អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ នៅទីស្នាក់ការរដ្ឋាករស្វយ័តដឹកជញ្ជូនសាធារណៈរថយន្តក្រុង។

សូមបញ្ជាក់ថា លោក កែវ ចាន់ណារិទ្ធ អតីតប្រធានទីលានចាក់សំរាមដង្កោ និង អភិបាលរងរដ្ឋាករសំណល់រឹង និង សំរាម ត្រូវបានតែងតាំងជាអភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញថ្មី ជំនួសលោក អ៊ាង សុខឃីម ដែលត្រូវបានតែង តាំងជាអភិបាលរងខណ្ឌ។

នៅក្នុងកម្មវិធីប្រកាសនេះ លោក កើត ឆែ អភិបាលរងរាជធានីភ្នពេញ បានផ្តាំផ្ញើទៅកាន់លោកអភិបាលរដ្ឋាករថ្មី ឱ្យបន្តនិរន្តរភាពការផ្តល់សេវាដឹកជញ្ជូនសាធារណៈរថយន្តក្រុង (City Bus), ការផ្តល់សេវាដឹកជញ្ជូនតាមកាណូតសាធារណៈ (Taxi Boat) និងថែរក្សាសមិទ្ធផលនានារបស់រដ្ឋាករ ដែលចាប់តាំងពីឆ្នាំ២០១៥មក បានផ្តល់សេវាដឹកជញ្ជូនសាធារណៈជូនបងប្អូនប្រជាពលរដ្ឋ ប្រកបដោយស្មារតីទទួលខុសត្រូវខ្ពស់ ប្រសិទ្ធភាព និងគុណភាព។

លោកអភិបាលរងរាជធានីភ្នំពេញ ក៏បានជម្រាបជូនអង្គពិធីទាំងមូលឱ្យបានជ្រាបថា ការរីកចម្រើននៃវិស័យដឹកជញ្ជូនសាធារណៈជាបន្តបន្ទាប់ ក្នុងរាជធានីភ្នំពេញ អាចធ្វើទៅបានគឺដោយសារការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានផ្តល់នូវសន្តិភាព ដល់បងប្អូនប្រជាពលរដ្ឋកម្ពុជាគ្រប់រូប អាចទទួលបាននូវការអភិវឌ្ឍលើគ្រប់វិស័យ និយាយជារួម និងនិយាយដោយឡែក គឺការទទួលបានសេវាដឹកជញ្ជូនសាធារណៈ ប្រកបដោយប្រសិទ្ធភាពទំនើប និងគុណភាព។ ដូចនេះ ដើម្បីបន្តទទួលបានការអភិវឌ្ឍសេវាដឹកជញ្ជូនសាធារណៈ និងសមិទ្ធផលថ្មីៗទៀតនោះ យើងត្រូវការពារសន្តិភាពនេះទោះក្នុងតម្លៃណាក៏ដោយ ព្រោះសន្តិភាពជារបស់មានតម្លៃ ដែលមិនអាចកាត់ថ្លៃបាន៕ដោយសួស សំរិត សម្រួលផ្សាយដោយ៖ dara

(សូមអានបន្ត)

ក្រសួងវប្បធម៌រៀបចំទទួលទានអាហារពេលល្ងាច ដើម្បីបង្កើនកិច្ចសហប្រតិបត្តិការល្អ ក្នុងការអភិរក្ស និងការពារបេតិកភណ្ឌវប្បធម៌

ភ្នំពេញ :ថ្ងៃទី០៧ ខែកញ្ញា ឆ្នាំ២០២២ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានរដ្ឋមន្ត្រីអាស៊ានទទួលបន្ទុកវប្បធម៌ និងសិល្បៈ (AMCA) កាលពីល្ងាចថ្ងៃទី០៦ ខែកញ្ញា ឆ្នាំ២០២២ បានរៀបចំកម្មវិធីទទួលទានអាហារពេលល្ងាចដើម្បីបង្កើនកិច្ចសហប្រតិបត្តិការល្អ ក្នុងការអភិរក្ស និងការពារបេតិកភណ្ឌវប្បធម៌ នៅប្រាសាទក្រវ៉ាន់ ទឹកដីអង្គរ ខេត្តសៀមរាប ក្នុងឱកាសដែលកម្ពុជាធ្វើជាម្ចាស់ផ្ទះរៀបចំសន្និសីទអន្តរជាតិស្តីពី ការការពារ និងទប់ស្កាត់ការចរាចរ ជួញដូរសម្បត្តិវប្បធម៌ខុសច្បាប់៖ ទស្សនៈពីអាស៊ាន។

 លោកជំទាវបានមានប្រសាសន៍ថា៖ សំណាង ជោគជ័យ សុភមង្គល ជ័យជំនះ ! ពាក្យទាំងនេះជាពរជ័យដែលបានដកស្រង់ចេញពី សិលាចារឹករបស់ព្រះមហិន្ទ្រវរ្ម័ន ដែលជាអ្នកបង្កើតប្រាសាទក្រវ៉ាន់នេះ ជូនពរយើងទាំងអស់គ្នាឱ្យទទួលបាននូវពរជ័យគ្រប់ប្រការ ខណៈដែលយើងកំពុងស្ថិតនៅក្នុងឧទ្យានបុរាណវិទ្យាអង្គរ ដែលជាតំបន់បេតិកភណ្ឌពិភពលោក មានប្រាសាទបុរាណដ៏អស្ចារ្យជាច្រើនដូចជា អង្គរវត្ត បាយ័ន និងតាព្រហ្ម…ជាដើម ។ ប្រាសាទទាំងនោះធ្វើឱ្យភ្ញៀវទេសចរមកពីជុំវិញពិភពលោកមានការកោតស្ញប់ស្ងែងយ៉ាងខ្លាំង តាំងពីអតីតកាលរហូតមកដល់បច្ចុប្បន្ន ។ 

 នាឱកាសនោះ លោកជំទាវបាន មានប្រសាសន៍លើកទឹកចិត្តដល់គណៈប្រតិភូ និងក្រុមការងារទាំងអស់ ប្រសិនបើគ្រប់គ្នាមិនទាន់បានទស្សនាប្រាសាទទាំងនោះ និងមិនទាន់បានស្វែងយល់អំពីវប្បធម៌ក្នុងស្រុកនៅឡើយទេ សូមគ្រប់គ្នាគួរទៅទស្សនា ឬទស្សនាសារជាថ្មី ព្រោះថា ប្រាសាទទាំងនោះមានលក្ខណៈពិសេស និងមានប្រវត្តិផ្ទាល់ខ្លួនដោយឡែកពីគ្នា។ លោកជំទាវរដ្ឋមន្ត្រីមានប្រសាសន៍បន្តថា តាមបទពិសោធន៍ យើងអាចរៀនអ្វីដែលថ្មីជាមួយនឹងការកត់សម្គាល់តាមរយៈការទស្សនា។

 លើសពីនេះ ការទៅទស្សនាប្រាសាទទាំងនោះអាចធ្វើឱ្យចិត្តរបស់យើងស្ងប់ ហើយនាំឱ្យយើងអាចប្រើការស្រមើស្រមៃ ប្រមើលមើល និងធ្វើដំណើរចូលទៅកាន់ពិភពដ៏អស្ចារ្យនៃស្នាដៃដ៏ល្អឯកពីអតីតកាលរបស់បុព្វបុរសកម្ពុជា។ ក្នុងរាត្រីសមោសរនោះ ក្រុមគណៈប្រតិភូ បានស្តាប់ និងទស្សនាការប្រគំតន្ត្រីខ្មែរ និងការសម្តែងសិល្បៈ ដូចជារបាំក្ងោកប៉ៃលិន គោះត្រឡោក កន្សែងស្នេហ៍ មុនីមេខលា និងល្ខោនខោលរឿងរាមកេរ្តិ៍ ត្រង់វគ្គ ចម្បាំងពេលយប់ ជាដើម អមជាមួយនឹងអាហារចម្រុះរសជាតិបែបខ្មែរផងដែរ។ សូមបញ្ជាក់ថា ចាប់ពីថ្ងៃទី០៥ ដល់ថ្ងៃទី០៨ ខែកញ្ញា ឆ្នាំ២០២២ ក្រសួងវប្បធម៌ និងវិចិត្រសិល្បៈ បានសហការជាមួយអង្គការ Antiquities Coalition រៀបចំ សន្និសីទអន្តរជាតិស្តីពី ការការពារ និងទប់ស្កាត់ការចរាចរ ជួញដូរសម្បត្តិវប្បធម៌ខុសច្បាប់៖ ទស្សនៈពីអាស៊ាន នៅលើទឹកដីអង្គរនៃខេត្តសៀមរាប៕ដោយ ហេង បញ្ញា សម្រួលផ្សាយដោយ៖ dara

(សូមអានបន្ត)

ឯកឧត្តម គួច ចំរើន ចុះពិនិត្យការងារជីកសាច់ផ្លូវ ដើម្បីកែសម្រួលពង្រីកប្រអប់តំណខ្សែ (Turn Manhole)

ព្រះសីហនុ: ថ្ងៃទី០៧ ខែកញ្ញា ឆ្នាំ២០២២
រសៀលថ្ងៃ១១កើត ខែភទ្របទ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃអង្គារ ទី០៦ ខែកញ្ញា ឆ្នាំ២០២២ ឯកឧត្តម គួច ចំរើន អភិបាល នៃគណ:អភិបាលខេត្តព្រះសីហនុ និងលោក ប្រាង ជលសា អគ្គនាយករងអគ្គិសនីកម្ពុជា និងមន្រ្តីមន្ទីរ អង្គភាពជំនាញក្នុងខេត្តព្រះសីហនុ បានអញ្ជើញចុះពិនិត្យការងារជីកសាច់ផ្លូវ ដើម្បីកែសម្រួលពង្រីកប្រអប់តំណខ្សែ (Turn Manhole) នៅតាមបណ្តោយផ្លូវ ២៨មិថុនា ស្ថិតក្នុងសង្កាត់លេខ៣ ក្រុងព្រះសីហនុ។

ក្នុងឱកាសចុះពិនិត្យការងារជីកសាច់ផ្លូវ ដើម្បីកែសម្រួលពង្រីកប្រអប់តំណខ្សែTurn Manhole ឯកឧត្តម គួច ចំរើន អភិបាលខេត្តព្រះសីហនុ បានគាំទ្រដំណើរការពង្រីកប្រអប់តំណខ្សែ Turn Manhole នៅក្នុងក្រុងព្រះសីហនុ ព្រមទាំងបានធ្វើការណែនាំដល់អគ្គិសនីកម្ពុជា និងក្រុមការងារបច្ចេកទេស ក្នុងការជីកកាយសាច់ផ្លូវ ត្រូវធ្វើយ៉ាងណាឱ្យបានលឿនហើយមុនថ្ងៃទី១៥ ខែវិច្ឆិកា ឆ្នាំ២០២២ខាងមុខ ដើម្បីបញ្ចៀសការកកស្ទះចរាចរណ៍។ ម្យ៉ាងទៀតនៅពេលបញ្ចប់កាយសាច់ផ្លូវ ត្រូវធ្វើការជួសជុលឱ្យបានល្អស្អាតដូចដើម ដូចជាការចាក់បេតុង ចាក់អ៊ុតកៅស៊ូ ការគូសគំនូសចរាចរណ៍ផ្លូវជាដើម។

លោក ប្រាង ជលសា អគ្គនាយករងអគ្គិសនីកម្ពុជា បានឱ្យដឹងថា ខេត្តព្រះសីហនុជាប៉ូលសេដ្ឋកិច្ចទី២ បន្ទាប់ពីរាជធានីភ្នំពេញ ជាតំបន់ឧស្សាហកម្ម ទេសចរណ៍ និងតំបន់ប្រើប្រាស់ច្រើនយ៉ាង កាលពីមុនយើងមានអនុស្ថានីយនៅឃ្លាំងលើ សម្រាប់ផ្គត់ផ្គង់ក្នុងក្រុងព្រះ សីហនុ ។ ដោយសារតែតម្រូវអភិវឌ្ឍន៍រីកចម្រើន រាជរដ្ឋាភិបាលបានធ្វើការវិនិយោគអូសខ្សែចូលមកតំបន់អូត្រេះ បន្តមកអាងប្រព្រឹត្តិកម្មទឹកកខ្វក់ អនុស្ថានីយនៅសុខា បានដាក់ឱ្យដំណើរការមានកម្លំាង ១១៥គីឡូវ៉ុល ។ ឥឡូវយើងកំពុងតែពង្រីកខ្សែបណ្តាញមកតំបន់នេះដោយមានគម្រោងសាងសង់អនុស្ថានីយបន្ថែមទៀត ដែលកំពុងធ្វើការជជែកគ្នារវាងអគ្គិសនីកម្ពុជា និងក្រសួងរ៉ែ និងថាមពល ដើម្បីចរចាជាមួយរដ្ឋាភិបាលកូរ៉េខាងត្បូង ដើម្បីខ្ចីឥណទានសាងសង់អនុស្ថានីយ តភ្ជាប់ទៅស្ថានីយឃ្លាំងលើ ដើម្បីឱ្យមានខ្សែបណ្តាញព័ទ្ធជុំវិញក្រុង នៅពេលមានដាច់ខ្សែណាមួយ យើងមានភ្លើងប្រើប្រាស់សម្រាប់ក្រុងព្រះសីហនុ។ យើងមានខ្សែកប់ក្រោមដី ហើយការជីកសាច់ផ្លូវ ដើម្បីកែសម្រួលពង្រីកប្រអប់តំណខ្សែ Turn Manhole តាមបណ្តោយផ្លូវ ២៨មិថុនា ក្នុងសង្កាត់លេខ៣ ក្រុងព្រះសីហនុ។

លោក អគ្គនាយករងអគ្គិសនីកម្ពុជា បានបន្តថា ការពង្រីកប្រអប់ខ្សែតំណ Turn Manhole ប្រើរយៈពេលពីរសប្តាហ៍ ដើម្បីកាត់បន្ថយការកកស្ទុះចរាចរណ៍ នៅតាមបណ្តោយផ្លូវ ២៨មិថុនា។ អគ្គិសនីកម្ពុជា មានគម្រោងសាងសង់អនុស្ថានីយចំនួន ៥បន្ថែមទៀត ដែលមានអនុស្ថានីយផ្លូវ ២៨មិថុនា, អនុស្ថានីយអូរត្រេះ, អនុស្ថានីយជិតកំពង់ផែស្វយ័តក្រុងព្រះសីហនុ, អនុស្ថានីយនៅអូរត្រជាក់ចិត្ត, និងអនុស្ថានីយវាលរេញ ។ បច្ចុប្បន្ននៅក្រុងព្រះសីហនុ មានអនុស្ថានីយអគ្គិសនីចំនួន៤ ក្នុងនោះ អនុស្ថានីយឃ្លាំងលើ, អនុស្ថានីយនៅតំបន់សេដ្ឋកិច្ចពិសេសបិតត្រាំង, អនុស្ថានីយនៅជិតអាងប្រព្រឹត្តិកម្មទឹកកខ្វក់, អនុស្ថានីយឆ្នេរសុខា, និងកំពុងបន្តសាងសង់អនុស្ថានីយនៅឆ្នេរមាស ឆ្នេរប្រាក់ ស្ថិតនៅឃុំរាម ស្រុកព្រៃនប់ខេត្តព្រះសីហនុ ៕ ដោយ ងូ សុមុនី សម្រួលផ្សាយដោយ៖dara

(សូមអានបន្ត)