នាយឧត្តមសេនីយ៍ វង្ស ពិសេន ផ្ញើសារជូនកងទ័ពទូទាំងប្រទេស ក្នុងឱកាសចូលឆ្នាំសកល២០២៤

(ភ្នំពេញ)៖ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមភូមិន្ទ បានផ្ញើសារលិខិតជូនកងទ័ពនៅទូទាំងប្រទេស នាឱកាសចូលឆ្នាំសកល២០២៤។

តាមរយៈសារជូនពរនេះ នាយឧត្តមសេនីយ៍ វង្ស ពិសេន បានសាកសួរសុខទុក្ខពោពេញដោយមនោសញ្ចេតនា នឹករលឹកស្រឡាញ់យ៉ាងជ្រាលជ្រៅ បំផុតចំពោះនាយទាហាន នាយទាហានរង និងពលទាហានទាំងអស់ នៃកងយោធពលខេមភូមិន្ទ ដែលក្នុងឆ្នាំកន្លងទៅ បានខិតខំពុះពារជម្នះរាល់ការលំបាក ធ្វើពលីកម្មគ្រប់បែបយ៉ាងដើម្បីថែរក្សាសុខសន្តិភាព ស្ថិរភាពសង្គម ការពារបូរណភាពទឹកដី និងអធិបតេយ្យជាតិមាតុភូមិជាទីសេ្នហានៃយើង។

ខាងក្រោមនេះជាសារលិខិតជូនពររបស់នាយឧត្តមសេនីយ៍ វង្ស ពិសេន៖

(សូមអានបន្ត)

លោក ហ៊ុន ម៉ានី អញ្ជើញជាអធិបតីក្នុងពិធីផ្សព្វផ្សាយសេចក្ដីសម្រេចចិត្ត របស់មហាសន្និបាតវិសាមញ្ញតំណាងទូទាំងប្រទេសរបស់គណប្សប្រជាជនកម្ពុជា

(ភ្នំពេញ)៖ លោក ហ៊ុន ម៉ានី សមាជិកគណៈអចិន្ត្រៃយ៍ នៃគណៈកម្មាធិការកណ្ដាលគណប្សប្រជាជនកម្ពុជា នៅរសៀលថ្ងៃទី២៩ ខែធ្នូ ឆ្នាំ២០២៣នេះ បានអញ្ជើញជាអធិបតីក្នុងពិធីផ្សព្វផ្សាយសេចក្ដីសម្រេចចិត្តរបស់មហាសន្និបាតវិសាមញ្ញតំណាងទូទាំងប្រទេសរបស់គណបក្សកាលពីថ្ងៃទី៩ ដល់ទី១០ ខែធ្នូ ឆ្នាំ២០២៣ ជូនដល់សមាជិកសមាជិកាគណបក្សប្រជាជនកម្ពុជា ជាង៦០០នាក់ នៅមន្ទីរគណបក្សប្រជាជនកម្ពុជារាជធានីភ្នំពេញ។

នាឱកាសដ៏ពិសេសនេះ អង្គពិធីបានបង្ហាញការអបអរសាទរជូនចំពោះ សម្ដេចមហាបវរធិបតី ហ៊ុន ម៉ាណែត ដែលត្រូវបានមហាសន្និបាត បោះឆ្នោតជ្រើសតាំងជាអនុប្រធានគណបក្ស និងបានសាទរ លោក ហ៊ុន ម៉ានី ដែលមហាសន្និបាតបោះឆ្នោតជ្រើសតាំងជាសមាជិកអចិន្ត្រៃយ៍ នៃគណៈកម្មាធិការកណ្ដាលគណបក្សប្រជាជនកម្ពុជា។

ក្រោយបានស្តាប់ការអានសេចក្ដីសម្រេចចិត្តរបស់មហាសន្និបាត និងការប្រកាសសមាសភាពដែលត្រូវបានជ្រើសតាំងរួចមក លោក ហ៊ុន ម៉ានី បានថ្លែងរំលឹកពីដំណើរប្រវត្តិសាស្ត្រដែលកម្ពុជា បានឆ្លងកាត់ជាច្រើនដំណាក់កាល គិតចាប់ត្រឹមពីការទទួលបានឯករាជ្យ ការឆ្លងកាត់សម័យសង្គមតរាស្ត្រនិយម សម័យសង្គ្រាម របបប្រល័យពូជសាសន៍ខ្មែរក្រហម និងដំណាក់កាលនៃការតស៊ូ រំដោះប្រទេសពីរបបខ្មែរក្រហម ឈានដល់ដំណើរស្វែងរកសន្តិភាពពេញលេញជូនជាតិ និងប្រជាជនដោយគណបក្សប្រជាជន។

មកដល់ចំណុចនេះ លោកបានរំលឹកជូនសមាជិកសមាជិកាបក្ស នូវខួប ៧០ឆ្នាំនៃការទទួលបានឯករាជ្យជាតិ, ខួប ២៥ឆ្នាំ នៃការទទួលបានសន្តិភាពពេញលេញក្រោមនយោបាយឈ្នះ-ឈ្នះ របស់ សម្ដេចតេជោ ហ៊ុន សែន, និងការជិតមកដល់នៃខួប ៤៥ឆ្នាំនៃទិវាជ័យជម្នះ ៧មករាផងដែរ។

ផ្សាភ្ជាប់ចំណុចខាងលើដែរ លោក ហ៊ុន ម៉ានី ក៏បានផ្ដល់ទស្សនទានជុំវិញសណ្ដាប់ធ្នាប់ពិភពលោក ស្ថានភាពប្រកួតប្រជែង ភូមិសាស្ត្រនយោបាយ បរិបទវិបត្តិជំងឺកូវីដ១៩ បញ្ហាបម្រែបម្រួលអាកាសធាតុ និងបញ្ហាសង្គ្រាម ដែលបាន និងកំពុងជះឥទ្ធិពលមកលើសេដ្ឋកិច្ចនិងនយោបាយសកល និងកម្ពុជា។

យ៉ាងណាក្តី លោកបានគូសបញ្ជាក់ថា កម្ពុជានៅតែរក្សាបាននូវភាពធន់ ដោយរក្សាបានសន្តិភាព ស្ថិរភាពនយោបាយ កំណើនសេដ្ឋកិច្ច វឌ្ឍនភាពសង្គម ព្រមទាំងបំពេញបានយ៉ាងល្អប្រសើរនូវកាតព្វកិច្ចកម្ពុជាក្នុងកិច្ចការអន្តរជាតិ និងក្នុងក្របខណ្ឌអាស៊ាន។ ជាមួយគ្នានេះ លោកក៏បានបញ្ជាក់ជូនសមាជិក សមាជិកា ចំពោះជំហានឆ្ពោះទៅមុខ របស់កម្ពុជា ក្នុងការឈានទៅសម្រេចមហិច្ឆតាប្រែក្លាយ ទៅជាប្រទេសមានចំណូលមធ្យមកម្រិតខ្ពស់។

លោក ហ៊ុន ម៉ានី បានណែនាំឲ្យសមាជិក សមាជិកា ទាំងអស់ពង្រឹងភាពជាអ្នកដឹកនាំ និងសមត្ថភាពស្ថាប័នលើគ្រប់វិស័យ ស្របតាមមាគ៌ានយោបាយដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីរួមជាកម្លាំងក្នុងការអភិវឌ្ឍជាតិ ការពាររដ្ឋធម្មនុញ្ញ សន្តិភាព ប្រជាធិបតេយ្យ អធិបតេយ្យភាព ផលប្រយោជន៍ជាតិ និងប្រជាជន ធានាបាននូវកំណើន និងស្ថិរភាពម៉ាក្រូសេដ្ឋកិច្ចព្រមទាំងគោលនយោបាយការបរទេសដ៏ត្រឹមត្រូវ។

លោកបានណែនាំ ដល់សមាជិក សមាជិកា បក្សទាំងអស់ឲ្យចូលរួមបំពេញតួនាទីភារកិច្ចទាំងក្នុងក្របខណ្ឌរាជរដ្ឋាភិបាល និងគណបក្សឲ្យកាន់តែមានប្រសិទ្ធភាពថែមទៀត ស្របតាមគោលនយោបាយរាជរដ្ឋាភិបាល និងគោលនយោបាយគណបក្ស ព្រមទាំងទស្សនវិស័យដឹកនាំរបស់ សម្ដេចធិបតី និងសូមឲ្យធ្វើការបន្តផ្សព្វផ្សាយសេចក្ដីសម្រេចរបស់មហាសន្និបាតវិសាមញ្ញរបស់គណបក្ស ជូនដល់សមាជិក សមាជិកាគណបក្សនៅគ្រប់មូលដ្ឋានទាំងអស់ឲ្យបានជ្រួតជ្រាប៕

(សូមអានបន្ត)

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញអបអរសាទរខួប២៥ឆ្នាំ នៃការបញ្ចប់សង្គ្រាមស៊ីវិលនៅកម្ពុជា ក្រោមនយោបាយឈ្នះ-ឈ្នះ របស់សម្តេចតេជោ ហ៊ុន សែន

(ភ្នំពេញ)៖ នៅថ្ងៃសុក្រ ២រោច ខែមិគសិរ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី២៩ ខែធ្នូ ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញ​ជាអធិបតីក្នុងពិធីអបអរសាទរខួប ២៥ឆ្នាំនៃការបញ្ចប់សង្គ្រាមស៊ីវិលនៅ​កម្ពុជា និងការអនុវត្តប្រកបដោយជោគជ័យនយោបាយឈ្នះ-ឈ្នះ និងខួប៥ឆ្នាំ​នៃការកសាងវិមានឈ្នះ-ឈ្នះ។

(សូមអានបន្ត)

រដ្ឋមន្រ្តីក្រសួងព័ត៌មាន ជំរុញឲ្យអាជ្ញាធរគ្រប់លំដាប់ថ្នាក់នៅខេត្ដក្រចេះ បន្តបំរើប្រជាពលរដ្ឋក្នុងមូលដ្ឋាន

(ក្រចេះ)៖ រដ្ឋមន្រ្តី នេត្រ ភក្ត្រា បានថ្លែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីរដ្ឋបាលគ្រប់លំដាប់ថ្នាក់ក្នុងខេត្តក្រចេះ ដែលបំរើសេវាសាធារណៈ ជូនប្រជាពលរដ្ឋបានល្អ ហើយទទួលបានសេចក្តីទុកចិត្ត តាមរយៈការបោះឆ្នោតជ្រើសតាំងតំណាងរាស្រ្តកាលពីខែកក្កដា ឆ្នាំ២០២៣ កន្លងទៅ ដែលផ្តល់ជំនឿទុកចិត្តលើគណបក្សប្រជាជនកម្ពុជា ដើម្បីអោយបន្តដឹកនាំប្រទេសជាតិ ហើយមន្ត្រីគ្រប់ជាន់ថ្នាក់បន្តបំរើប្រជាពលរដ្ឋប្រកបដោយភាពស្មោះត្រង់ និងវិជ្ជាជីវៈខ្ពស់។

ការថ្លែងបែបនេះ របស់លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ក្នុងឱកាសអញ្ជើញជាអធិបតីបិទសន្និបាតបូកសរុបលទ្ធផលការងារ ប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តក្រចេះ នៅរសៀលថ្ងៃទី២៧ ខែធ្នូ ឆ្នាំ២០២៣ នាសាលមហោស្របខេត្តក្រចេះ។

លោក នេត្រ ភក្ត្រា ក្នុងនាមរាជរដ្ឋាភិបាលកម្ពុជា ក្នុងនាមសម្តេចមហាបវរធិបតីនាយករដ្ឋមន្ត្រី និងក្នុងនាមលោកផ្ទាល់ សូមសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ លោក លោកស្រី ដែលជាថ្នាក់ដឹកនាំនៃរដ្ឋបាលគ្រប់លំដាប់ថ្នាក់ និងក្រុមការងាររាជរដ្ឋាភិបាលចុះមូលដ្ឋាន មន្រ្តីរាជការ កងកម្លាំងមានសមត្ថកិច្ចទាំងអស់ដែលបានយកអស់កម្លាំង ប្រាជ្ញា ស្មារតី សហការសាមគ្គីគ្នាបានយ៉ាងល្អនៅក្នុងការបំពេញតួនាទី ភារកិច្ចប្រកបដោយការទទួលខុសត្រូវ រហូតឈានទៅសម្រេចបាននូវសមិទ្ធផលនានាជាច្រើនជូន ប្រជាពលរដ្ឋ ក្នុងទូទាំងខេត្ត។

ជាមួយគ្នានេះ លោក នេត្រ ភក្ត្រា ក៏ជំរុញឲ្យអាជ្ញាធរគ្រប់លំដាប់ថ្នាក់បន្តបំរើប្រជាពលរដ្ឋក្នុងមូលដ្ឋានខេត្តក្រចេះ ដើម្បីបន្តកសាងជំនឿទុកចិត្តរបស់ប្រជាពលរដ្ឋ មកលើការដឹកនាំរបស់រាជរដ្ឋាភិបាល និងអាជ្ញាធរថ្នាក់ក្រោមជាតិ តាមរយៈការដាក់ចុះនូវវិធានការអនុវត្តការងារមួយចំនួនដើម្បីបំរើផលប្រយោជន៍ប្រជាជន ការអនុវត្តកម្មវិធីគោលនយោបាយ ជាអាទិភាពទាំង០៦ របស់រាជរដ្ឋាភិបាល គឺការអនុវត្តកម្មវិធីជាតិជំនួយសង្គម ផ្នែកបណ្តុះបណ្តាលជំនាញវិជ្ជាជីវៈ និងបច្ចេកទេស សម្រាប់យុវជនមកពីគ្រួសារក្រីក្រនិងគ្រួសារងាយរងហានិភ័យ កម្មវិធីគោលនយោបាយអាទិភាពសម្រាប់វិស័យកសិកម្ម កម្មវិធីជំនួយសង្គមក្នុងកញ្ចប់គ្រួសារ និង កម្មវិធី ជាតិស្ដីពីក្របខ័ណ្ឌកិច្ចគាំពារសង្គម ឆ្លើយតបនឹងគ្រោះ អាសន្ន -ល-។

លោកថា ហេតុនេះ រដ្ឋបាលខេត្ត ក្រុង ស្រុក ឃុំ សង្កាត់ មន្ទីរ និងអង្គភាពជំនាញ ត្រូវចូលរួមសហការនិងគាំទ្រដល់អនុវត្តកម្មវិធីគោលនយោបាយទាំងនេះក្នុងមូលដ្ឋានរបស់ខ្លួន ប្រកបដោយការទទួល ខុស ត្រូវខ្ពស់ ដើម្បីបម្រើប្រជាពលរដ្ឋប្រកបដោយតម្លាភាព និងគណនេយ្យភាព៕

(សូមអានបន្ត)

រដ្ឋមន្រ្តីក្រសួងបរិស្ថាន៖ ការយកចិត្តទុកដាក់បម្រើប្រជាពលរដ្ឋ ផ្តោតលើការងារអាទិភាព ចំណេញធនធាន និងទទួលបានប្រសិទ្ធភាពការងារខ្ពស់

(ត្បូងឃ្មុំ)៖ ការយកចិត្តទុកដាក់ក្នុងការបម្រើប្រជាពលរដ្ឋរបស់យើងតាមគោលការណ៍អាទិភាពរបស់រាជរដ្ឋាភិបាលកម្ពុជា គឺចំណេញធនធាន និងទទួលបានប្រសិទ្ធភាពការងារខ្ពស់។ នេះជាការផ្តាំផ្ញើរបស់លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ជូនចំពោះមន្រ្តីរាជការគ្រប់ជាន់ថ្នាក់ នៅក្នុងសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តត្បូងឃ្មុំ នារសៀលថ្ងៃទី២៦ ខែធ្នូ ឆ្នាំ២០២៣ ។

ជាមួយគ្នានេះ លោកបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ បានរាយការណ៍អំពីសមិទ្ធផលការងារដែលខេត្តសម្រេចបានរួមមានការការពារ ពង្រឹងថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជំរុញអនុវត្តចលនាគោលនយោបាយ «ភូមិ ឃុំ-សង្កាត់ មានសុវត្ថិភាព» និងបានអភិវឌ្ឍន៍ ស្តារ ជួសជុល ថែទាំជាបន្តបន្ទាប់ នូវហេដ្ឋារចនាសម្ព័ន្ធ រូបវន្តនានា ប្រព័ន្ធធារាសាស្ត្រ ប្រព័ន្ធបណ្តាញទឹកស្អាត ពង្រីកការផ្គត់ផ្គង់ និងការប្រើប្រាស់ថាមពលអគ្គិសនី ក្នុងន័យជំរុញ និងលើកស្ទួយជីវភាពប្រជាពលរដ្ឋឱ្យល្អប្រសើរ និងឈានឆ្ពោះទៅប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជាដំណាក់កាលទី១ និងជាផែនការបន្តទៀតក្នុងឆ្នាំ២០២៤ ខេត្តត្បូងឃ្មុំនឹងសម្រេចឲ្យបាន៖

ទី១៖ ធានាឱ្យបានសន្តិសុខ សុវត្ថិភាពសាធារណៈសង្គម និងផ្សព្វផ្សាយគោលនយោបាយ ភូមិ ឃុំ សង្កាត់ មានសុវិត្ថិភាព។

ទី២៖ ពង្រឹង និងពង្រីកកិច្ចសហប្រតិបត្តិការ ជាមួយដៃគូពាក់ព័ន្ធលើគ្រប់វិស័យ។

ទី៣៖ ត្រួតពិនិត្យ និងចាត់វិធានការគ្រប់គ្រងជនបរទេសដែលស្នាក់នៅ និងធ្វើការក្នុងភូមិសាស្ត្រខេត្ត។

ទី៤៖ បង្កើនប្រសិទ្ធភាពនៃការផ្ដល់សេវាសាធារណៈ និងការដោះស្រាយទៅតាមតម្រូវការរបស់ប្រជាពលរដ្ឋ។

ទី៥៖ ផ្ដល់សេវាសាធារណៈជូនប្រជាពលរដ្ឋ ស្របតាមច្បាប់ និងលិខិតបទដ្ឋានគតិយុត្តជាធរមាន។

ទី៦៖ ជំរុញដោះស្រាយវិវាទក្រៅប្រព័ន្ធតុលាការ និងវិវាទដីធ្លីតាមយន្តការជាលក្ខណៈប្រព័ន្ធជូនប្រជាពលរដ្ឋឱ្យបានឆាប់រហ័ស។

ទី៧៖ បង្ការ ការពារ និងទប់ស្កាត់នូវរាល់សកម្មភាពបទល្មើសធនធានធម្មជាតិឱ្យបានតឹងរ៉ឹង និងម៉ឺងម៉ាត់តាមវិធានការច្បាប់។

ទី៨៖ លើកកម្ពស់របបសន្តិសុខសង្គមដល់នយោជិតសេដ្ឋកិច្ចក្នុង និងក្រៅប្រព័ន្ធ ដើម្បីការពារសុខភាព និងការគាំពារសង្គមតាមបទដ្ឋានគតិយុត្ត។

ទី៩៖ លើកទឹកចិត្តការវិនិយោគជាតិ អន្តរជាតិ ដើម្បីជំរុញការអភិវឌ្ឍខេត្តឱ្យបានជឿនលឿនលើគ្រប់វិស័យ។

ទន្ទឹមនឹងការថ្លែងឡើងនូវផែនការ៩ចំនុចនេះ លោកបណ្ឌិត អ៊ាង សុផល្លែត បានផ្តល់អនុសាសន៍ថា ការកំណត់លើទិសដៅអាទិភាពការងារ គឺជាស្នូលនៃភាពជោគជ័យ ហើយដើម្បីសម្រេចបាននូវផែនការទាំងនេះ ចាំបាច់ត្រូវតែសម្រួចទិសដៅរបស់ខ្លួនឱ្យចំនឹងអាទិភាពការងារ ជាឧទាហរណ៍ជាក់ស្តែងក្រសួងបរិស្ថាន មានយុទ្ធសាស្ត្រចក្រា ដែលយុទ្ធសាស្រ្តគន្លឹះនេះជួយឱ្យក្រសួងសម្រេចបាននូវភាពស្អាត ហើយគោលការណ៍ស្អាតនេះ ទទួលបានការគាំទ្រយ៉ាងខ្លាំងពីអន្តរជាតិ រហូតទទួលស្គាល់កម្ពុជាជាជើងឯកក្នុងវិស័យបរិស្ថាន ដែលជាមទោនភាពរបស់ប្រជាពលរដ្ឋកម្ពុជាគ្រប់រូប។

សូមរម្លឹកជូនថា ខេត្តត្បូងឃ្មុំ មានផ្ទៃដីសរុប ៥,២៥០.៥១គីឡូម៉ែត្រក្រឡា មាន ០១ក្រុង ០៦ស្រុក ០២សង្កាត់ ៦២ឃុំ និងមាន ៨៧៥ភូមិ ប្រជាពលរដ្ឋសរុបប្រមាណ ៨៧៤.១៩៩នាក់។ ខេត្ត ពឹងផ្អែក លើវិស័យកសិកម្ម វិស័យឧស្សាហកម្ម សេវាកម្ម និងមានច្រកចំនួន ០៧ច្រក គឺច្រកអន្តរជាតិ០១, ច្រកទ្វេភាគី ០២, និងច្រកតំបន់០៤ ដែលមូលដ្ឋានក្នុងការជំរុញកំណើនសេដ្ឋកិច្ចខេត្តឱ្យមានការកើនឡើងយ៉ាងឆាប់រហ័ស៕

(សូមអានបន្ត)

ឯកឧត្តមឃួង ស្រេងជំរុញអភិបាលខណ្ឌមានជ័យថ្មីត្រូវខិតខំដឹកនាំខណ្ឌមានជ័យឲ្យទទួលបានលទ្ធផលល្អ

ឯកឧត្តមឃួង ស្រេង អភិបាលរាជធានីភ្នំពេញ បានជំរុញឲ្យលោកសេង គន្ធ ដែលជាអភិបាលខណ្ឌមានជ័យថ្មី ត្រូវយកអស់កម្លាំងកាយចិត្ត ចំណេះដឹងនិងឲ្យអស់ពីសមត្ថភាព ដើម្បីដឹកនាំខណ្ឌមានជ័យឲ្យទទួលបានលទ្ធផលល្អប្រសើរ។ពិសេសគឺអនុវត្តតាមអាទិភាពទាំង៦និងគន្លឹះទាំង៥ របស់រាជរដ្ឋាភិបាលក្រោមការដឹកនាំរបស់សម្ដេចបវរធិបតី ហ៊ុន ម៉ាណែត នាយកមន្ត្រីនៃព្រះរាជាណាចក្រកម្ពុជា។ ការជំរុញនេះធ្វើឡើងក្នុងពិធីប្រកាសចូលកាន់តំណែងអភិបាលនៃគណៈអភិបាលខណ្ឌមានជ័យ ក្រោមអធិបតីភាព ឯកឧត្ដមឃួង ស្រេងអភិបាលរាជធានីភ្នំពេញនៅរសៀលថ្ងៃទី២៥ ខែធ្នូ ឆ្នាំ២០២៣នៅសាលាខណ្ឌមានជ័យ។ ឯកឧត្ដមជំរុញការថែរក្សាសន្តិសុខ សុវត្ថិភាពជូនប្រជាពលរដ្ឋនៅក្នុងមូលដ្ឋាន ពិសេសគឺអនុវត្តឲ្យបាននូវគោលនយោបាយភូមិសង្កាត់មានសុវត្ថិភាព ។

 ជំរុញការរឹតបន្តឹងច្បាប់ចរាចរណ៍ គ្រឿងញៀនជាដើម ។ បន្ថែមពីនេះទៀតត្រូវផ្ដល់កិច្ចសហការគ្រប់ថ្នាក់ គ្រប់ស្ថាប័ន ដើម្បីបម្រើប្រជាពលរដ្ឋ ពិសេសគឺការដោះស្រាយទំនាស់ដីធ្លីក្រៅប្រព័ន្ធតុលាការដោយអនុវត្តតាមគោលនយោបាយឈ្នះ ឈ្នះ គឺឈ្នះទាំងសងខាង។ ឯកឧត្ដមឃួង ស្រេង បានបញ្ជាក់ថា អភិបាលខណ្ឌ បើទោះបីជាពូកែយ៉ាងណាក៏ដោយបើមិនមានការចូលរួមសហការ ពីមេប៉ុស្តិ៍ អធិការនិងចៅសង្កាត់ទេ គឺមិនអាចទទួលបានជោគជ័យលើកិច្ចការងារបម្រើរាជរដ្ឋាភិបាលនិងប្រជាពលរដ្ឋឡើយ ដូច្នេះត្រូវតែសហការជាមួយគ្នាឲ្យបានខ្លាំក្លាទើបសម្រេចបានលទ្ធផលល្អប្រសើរ។

បន្ថែមពីនេះ ថ្នាក់ដឹកនាំគេ ត្រូវតែចេះកោតសរសើរ និងចេះដាក់ពិន័យ ចំពោះមន្ត្រីដែលអនុវត្តខុស។ធ្វើមេកើយរបស់គេ ដាច់ខាតមិនត្រូវមានគំនិតគុំកួននោះទេ ។ កុំយកតាមពាក្យស្លោកមួយថា ទឹកឡើងត្រីស៊ីស្រមោច ទឹកខោចស្រមោចស៊ីត្រី ឱ្យសោះ ព្រោះកើតជាមនុស្សនរណាក៏កំហុសឆ្គងដែរ។បន្ថែមទៀតត្រូវចេះកោតសរសើរចំពោះមន្ត្រីរាជការ ក៏ដូចជាកងកម្លាំងប្រដាប់អាវុធខណ្ឌមានជ័យ ដែលបានយកអស់កម្លាំងកាយចិត្ត ក្នុងកិច្ចការងារបម្រើផលប្រយោជន៍ប្រជាពលរដ្ឋកន្លងមកបានល្អ។

ឯកឧត្ដមបន្តថាការតែងតាំងនេះគឺធ្វើឡើងជាធម្មតារបស់មន្ត្រីរាជការ ស៊ីវិល ជាក់ស្ដែងការតែងតាំងលោក សេង គន្ធ ជាអភិបាលខណ្ឌមានជ័យថ្មី ជំនួសលោក ហែម ដារិទ្ធ ដែលត្រូវបានតែងតាំងជាអភិបាលរងខេត្តព្រះសីហនុ នេះជារឿងធម្មតា ដើម្បីជំរុញឲ្យមានប្រសិទ្ធភាពការងារ កាន់តែល្អប្រសើរថែមទៀត។ លោកសេងគន្ធអភិបាលខណ្ឌមានជ័យបានថ្លែងថា ដើម្បីបន្តនិរន្តរភាពការងារនិងដើម្បីឆ្លើយតបទៅនឹងទំនុកចិត្តរបស់ប្រមុខរាជរដ្ឋាភិបាលកម្ពុជា ថ្នាក់ដឹកនាំក្រសួងមហាផ្ទៃ ក៏ដូចជាអភិបាលនៃគណៈអភិបាលរាជធានីភ្នំពេញ ប្រធានក្រុមប្រឹក្សារាជធានីភ្នំពេញ 

លោកបានប្តេជ្ញាចិត្តបំពេញការងារឲ្យខ្លាំងក្លាទ្វេដង ដើម្បីបំពេញការងារជូនរាជរដ្ឋាភិបាលរដ្ឋបាលរាជធានីភ្នំពេញ ដោយប្តេជ្ញាចិត្ត គោរពរដ្ឋធម្មនុញ្ញ ច្បាប់ ព្រះរាជក្រឹត អនុក្រឹត្យ សារាចរ ប្រកាស ដីកា សេចក្តីសម្រេច បទបញ្ជានិងលិខិតបទដ្ឋានគតិយុត្តជាធរមានរបស់រាជរដ្ឋាភិបាលកម្ពុជា ដើម្បីធានាការពារសន្តិភាព ស្ថេរភាពនយោបាយ។ ប្តេជ្ញា ធានាការពាររាជរដ្ឋាភិបាល ស្របច្បាប់ដោយមិនអនុញ្ញាតឲ្យកម្លាំងណាមួយធ្វើឲ្យប៉ះពាល់ដល់ដំណើរការដឹកនាំជាតិមាតុភូមិបានឡើយ បើទោះបីក្នុងតម្លៃណាក៏ដោយ ។

ប្តេជ្ញាការពារដាច់ខាតនៅរាល់សមិទ្ធផលនានារបស់រាជរដ្ឋាភិបាល ។ យកចិត្តទុកដាក់ដោយស្មារតីទទួលខុសត្រូវខ្ពស់ កម្មវិធីនយោបាយនិងយុទ្ធសា ស្ត្របញ្ចកោណដំណាក់កាលទីមួយរបស់រាជរដ្ឋាភិបាលជាពិសេសគឺកម្មវិធីគោលនយោបាយអាទិភាពទាំង៦និងវិធានការគន្លឹះទាំង៥ចំណុចរបស់សម្ដេចបវរធិបតីហ៊ុន ម៉ាណែតឲ្យទទួលបានលទ្ធផលប្រសើរ ៕

(សូមអានបន្ត)

សម្តេចក្រឡាហោម ស ខេង ជំរុញសមត្ថកិច្ចនៅខេត្តបាត់ដំបងពង្រឹងគោលនយោបាយភូមិឃុំមានសុវត្ថិភាព ដើម្បីលើកកម្ពស់ការចូលរួមរបស់ពលរដ្ឋ

(បាត់ដំបង)៖ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តបាត់ដំបង បានជំរុញកម្លាំងសមត្ថកិច្ច អាជ្ញាធរពាក់ព័ន្ធនៅខេត្តបាត់ដំបង សូមបន្តពង្រឹងគោលនយោបាយភូមិឃុំមានសុវត្ថិភាព ដើម្បីលើកកម្ពស់ការចូលរួមរបស់ប្រជាពលរដ្ឋ។

ការជំរុញនេះធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការអគារ

សិក្សា១ខ្នង៤ជាន់៣០បន្ទប់នៃវិទ្យាល័យព្រះមុនីវង្ស និងជូនរង្វាន់ម៉ូតូដល់សិស្សប្រឡងជាប់សញ្ញាបត្រមធ្យមសិក្សាទុតិយភូមិទទួលបាននិទ្ទេសAចំនួន៧០រូប។

សម្តេចក្រឡាហោម ស ខេង បានផ្ដាំផ្ញើសូមបន្តចូលរួមពង្រឹង និងថែរក្សាសន្តិភាព ស្ថិរភាពនយោបាយ បូរណភាពទឹកដី អធិបតេយ្យជាតិ ការពារព្រះមហាក្សត្រ ព្រមទាំងបន្តលើកកម្ពស់លទ្ធិប្រជាធិបតេយ្យ សេរី ពហុបក្ស សិទ្ធិសេរីភាពប្រជាពលរដ្ឋ និងពង្រឹងនីតិរដ្ឋស្របតាមរដ្ឋធម្មនុញ្ញ។

សម្តេចក្រឡាហោម ស ខេង បានជំរុញការអនុវត្តគោលនយោបាយ ភូមិ ឃុំ សង្កាត់មានសុវត្ថិភាព ដើម្បីលើកកម្ពស់ការចូលរួមរបស់ប្រជាពលរដ្ឋ និងបង្ការ ទប់ស្កាត់ និងបង្ក្រាបបទល្មើសនានា ពិសេសសកម្មភាពជួញដូរចែកចាយប្រើប្រាស់គ្រឿងញៀន បទល្មើសលួច ឆក់ ប្លន់ល្បែងស៊ីសងខុសច្បាប់តាមមូលដ្ឋានអំពើហិង្សាក្នុងគ្រួសារ និងក្រុមក្មេងទំនើង។

បន្តជំរុញសកម្មភាពត្រួតពិនិត្យនិងផ្សព្វផ្សាយអប់រំឱ្យបានទូលំទូលាយពីការជួញដូរ និងការប្រើប្រាស់គ្រឿងញៀនតាមគោលការណ៍ «បីកុំ មួយរាយការណ៍»។

សូមឱ្យអាជ្ញាធរពាក់ព័ន្ធ និងកងកម្លាំងមានសមត្ថកិច្ចបង្កើនវិធានការអប់រំដោយដើរទន្ទឹមនឹងការរឹតបន្តឹងការអនុវត្តច្បាប់ចរាចរណ៍ផ្លូវគោក សំដៅធ្វើយ៉ាងណាកាត់បន្ថយអត្រាគ្រោះថ្នាក់ចរាចរណ៍ឱ្យនៅក្នុងកម្រិអប្បបរមា ខណៈបញ្ហាគ្រោះថ្នាក់ចរាចរណ៍នៅតែជាបញ្ហាប្រឈមក្នុងសង្គមដែលបណ្ដាលឱ្យមានមនុស្សស្លាប់ និងរងរបួសជារៀងរាល់ថ្ងៃ។

ត្រូវយកចិត្តទុកដាក់និងត្រៀមជួយប្រជាពលរដ្ឋរងគ្រោះដោយគ្រោះធម្មជាតិ និងគ្រោះថ្នាក់ផ្សេងៗ ប្រជាពលរដ្ឋដែលមានការខ្វះខាត និងជនងាយរងគ្រោះនានា ដើម្បីលើកកម្ពស់សមធម៌ និងសុខុមាលភាពល្អប្រសើរ។

ផ្សព្វផ្សាយអប់រំឱ្យប្រជាពលរដ្ឋ ថែរក្សាសុខភាព អនាម័យ ហូបស្អាត ផឹកស្អាត និងរស់នៅស្អាតឱ្យបានជាប់ជាប្រចាំក្នុងជីវភាពរស់នៅប្រចាំថ្ងៃ។

ក្នុងឱកាសនោះ សម្តេចក្រឡាហោម ស ខេង បានប្រគល់ម៉ូតូ១គ្រឿង និងបណ្ណសរសើរចំនួន១ជូនសិស្សដែលទទួលបាននិទ្ទេស A ចំនួន៧៧នាក់ ដែលការប្រឡងសញ្ញាបត្រមធម្យមសិក្សាទុតិយភូមិឆ្នាំ២០២៣៕

(សូមអានបន្ត)

ធនាគារជាតិ​នៃកម្ពុជា និងក្រុមហ៊ុន​ UnionPay International របស់ចិន​ ដាក់ឱ្យប្រើប្រាស់ជាផ្លូវការ​ ការទូទាត់ឆ្លងដែនតាមប្រព័ន្ធ QR Code

(ភ្នំពេញ)៖​ ធនាគារជាតិ​ និងក្រុមហ៊ុន​ UnionPay International បានដាក់ឱ្យប្រើប្រាស់ជាផ្លូវការ ការទូទាត់ឆ្លងព្រំដែន តាមប្រព័ន្ធ​ QR Code​ ដើម្បីចូលរួមចំណែកយ៉ាងសំខាន់​ ក្នុងការលើកកម្ពស់ពាណិជ្ជកម្ម សកម្មភាពទេសចរណ៍ និងការដាក់បញ្ចូលហិរញ្ញវត្ថុ។

ការដាក់ឲ្យប្រេីប្រាស់ជាផ្លូវការនេះ​ ធ្វេីឡេីងនៅថ្ងៃទី២២​ ខែធ្នូឆ្នាំ២០២៣​ ក្រោមការចូលរួមពីលោកស្រីបណ្ឌិត ជា សេរី ទេសាភិបាលធនាគារជាតិនៃកម្ពុជា លោក វ៉ាង វិន ធៀន ឯកអគ្គរដ្ឋទូតសាធារណៈរដ្ឋប្រជាមានិតចិន ប្រចាំកម្ពុជា​ និងលោក តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍។

លោកស្រីបណ្ឌិត ជា​ សិរី​ បានថ្លែងថា​ ដើម្បីបង្កើនការតភ្ជាប់ប្រព័ន្ធទូទាត់សកល ធនាគារជាតិនៃកម្ពុជា​ បានផ្តួចផ្តើមកិច្ចសហប្រតិបត្តិការជាមួយ UnionPay International ដើម្បីស្វែងយល់អំពីសក្តានុពលដ៏ធំនៃការទូទាត់កូដ QR ឆ្លងដែនសម្រាប់ទាំងអ្នកប្រើប្រាស់ម្នាក់ៗ និងពាណិជ្ជករក៏ដូចជាអត្ថប្រយោជន៍របស់ចំពោះសេដ្ឋកិច្ចពិតប្រាកដ។

លោកស្រីបណ្ឌិតបានបន្តទៀតថា​ នៅថ្ងៃទី១០ ខែកក្កដា ឆ្នាំ២០២៣កន្លងទៅភាគីទាំងពីរបានចុះហត្ថលេខាលើអនុស្សរណៈយោគយល់គ្នា ដោយយល់ព្រមរួមគ្នាលើកកម្ពស់ QR ឆ្លងព្រំដែនអន្តរប្រតិបត្តិការកូដរវាងបណ្តាញរបស់ពួកគេ។ បន្ទាប់ពីចុះ MOU ភាគីទាំងពីរបានធ្វើការសិក្សាអំពីលទ្ធភាព ដើម្បីស្វែងយល់ពីគោលនយោបាយ បច្ចេកទេស និងប្រតិបត្តិការតម្រូវការសម្រាប់គម្រោងនេះ​ ហេីយតាមរយៈការខិតខំប្រឹងប្រែង និងកិច្ចសហប្រតិបត្តិការល្អ គម្រោងនេះឥឡូវនេះត្រូវបានអនុវត្តដោយជោគជ័យ។

លោកស្រីបណ្ឌិតបានបន្ថែមថា​ «ចាប់ពីថ្ងៃនេះតទៅ អ្នកកាន់ប័ណ្ណ UnionPay​ នឹងអាចប្រើកាបូបដែលបើក UnionPay របស់ពួកគេដូចជា​ កម្មវិធី UnionPay និងកម្មវិធីធនាគារពាណិជ្ជដែលត្រូវបានបើក​ សម្រាប់ការបង់ប្រាក់ UnionPay QR Code ដើម្បីស្កេន KHQRលេខកូដ​ ដើម្បីបញ្ចប់ប្រតិបត្តិការទូទាត់ ពាណិជ្ជករប្រមាណ១.៨លាននាក់នៅកម្ពុជា។ លើសពីនេះ នៅដើមឆ្នាំ២០២៤ប្រជាពលរដ្ឋកម្ពុជានឹងអាចប្រើប្រាស់កាបូបបាគង​ ដើម្បីធ្វើការទូទាត់នៅ UnionPay QR code ទទួលយកពាណិជ្ជករនៅក្នុងប្រទេសចិន និងនៅទូទាំងពិភពលោកធ្វើឱ្យបទពិសោធន៍នៃការបង់ប្រាក់តាមទូរស័ព្ទកាន់តែប្រសើរឡើង​ ក្នុងអំឡុងពេលធ្វើដំណើរអន្តរជាតិ»។

លោកស្រីបណ្ឌិត​ ជា​ សិរី ជឿជាក់យ៉ាងមុតមាំថា ការដាក់ឱ្យប្រើប្រាស់ការទូទាត់កូដ QR ឆ្លងដែនរវាងធនាគារជាតិនៃកម្ពុជា បាគង និង UnionPay International នឹងលើកកម្ពស់កម្រិតនៃកិច្ចសហប្រតិបត្តិការហិរញ្ញវត្ថុរវាងស្ថាប័នទាំងពីរ តាមរយៈការប្រើប្រាស់បច្ចេកវិទ្យា ដើម្បីផ្តល់អត្ថប្រយោជន៍​ ដល់អ្នកប្រើប្រាស់នៅក្នុងប្រទេសទាំងពីរ និងទូទាំងពិភពលោក។

កិច្ចសហប្រតិបត្តិការនេះ​ នឹងរួមចំណែកយ៉ាងសំខាន់ក្នុងការលើកកម្ពស់ពាណិជ្ជកម្ម សកម្មភាពទេសចរណ៍ និងការដាក់បញ្ចូលហិរញ្ញវត្ថុ។

លោកស្រីបណ្ឌិតបានឱ្យដឹងទៀតថា​ ការលើកកម្ពស់សុវត្ថិភាព និងប្រសិទ្ធភាពនៃផលិតផល និងសេវាកម្មប្រកបដោយភាពច្នៃប្រឌិត គឺជាគោលបំណងចម្បងរបស់ធនាគារជាតិនៃកម្ពុជា ដើម្បីគាំទ្រដល់របៀបវារៈនៃការដាក់បញ្ចូលហិរញ្ញវត្ថុរបស់រាជរដ្ឋាភិបាលកម្ពុជា និងលើកទឹកចិត្តបន្ថែមទៀតលើការទូទាត់តាមប្រព័ន្ធឌីជីថល។

លោកស្រីបណ្ឌិតបានបន្តទៀតថា​ ធនាគារជាតិនៃកម្ពុជាប្តេជ្ញាពង្រឹងបន្ថែមទៀតនូវសុវត្ថិភាព សុវត្ថិភាព និងភាពងាយស្រួលនៃការទូទាត់ឆ្លងដែនខណៈបច្ចុប្បន្ននេះ ធនាគារជាតិនៃកម្ពុជា បានចាប់ផ្តើមដំណើរការទូទាត់ប្រាក់ QR code ឆ្លងដែនដោយជោគជ័យជាមួយប្រទេសថៃ ឡាវ និងវៀតណាម។

សូមជម្រាបថា ធនាគារជាតិនៃកម្ពុជាបានដាក់ឲ្យដំណើរការ ការទូទាត់ឆ្លងដែនតាមប្រព័ន្ធ QR Code ជាមួយប្រទេសថៃប្រកបដោយភាពជោគជ័យ ទាំងទូទាត់នៅក្នុងប្រទេសថៃ និងការទូទាត់នៅកម្ពុជា បន្ដបន្ទាប់ទៅទៀតកម្ពុជានឹងសហការជាមួយប្រទេសឡាវ, ឥណ្ឌា។

ថ្មីៗនេះធនាគារជាតិនៃកម្ពុជា និងធនាគាររដ្ឋវៀតណាមបានដាក់ឱ្យប្រើប្រាស់ជាផ្លូវការ ការទូទាត់ឆ្លងដែនតាម​ QR Code រវាងប្រទេសកម្ពុជា និងប្រទេសវៀតណាម៕

(សូមអានបន្ត)

សម្តេចធិបតី ហ៊ុន ម៉ាណែត ស្នើជប៉ុនជួយពង្រីក និងលើកកម្ពស់កម្រិតគុណភាពផ្លូវជាតិលេខ១ទៅដល់ស្ពានអ្នកលឿង

(ព្រះសីហនុ)៖ សម្តេចមហាបវរធិបតីធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើដល់ភាគីជប៉ុនជួយពង្រីក និងលើកកម្ពស់កម្រិតគុណភាពផ្លូវជាតិលេខ១ទៅដល់ស្ពានអ្នកលឿង។

ការស្នើយ៉ាងដូច្នេះរបស់សម្ដេចធិបតី ហ៊ុន ម៉ាណែត ធ្វើឡើងក្នុងពិធីបើកការដ្ឋានសាង​សង់ចំណតផែកុងតឺន័រទឹកជ្រៅជំហានទី១ ស្ថិតនៅកំពង់ស្វយ័តក្រុង​ព្រះ​សី​ហ​នុ ខេត្តព្រះសីហនុ នាថ្ងៃទី២២ ខែធ្នូ ឆ្នាំ២០២៣។

នាឱកាសនោះ សម្ដេចធិបតីបានចាត់ទុកជប៉ុនជាមិត្តដ៏សំខាន់សម្រាប់កម្ពុជា ដែលបាននិងកំពុងចូលរួមចំណែកដល់ការអភិវឌ្ឍប្រទេសកម្ពុជាតាំងពីអតីតកាល បច្ចុប្បន្ន និងបន្តទៅអនាគត។ ជាក់ស្ដែងតាមរយៈទីភ្នាក់ងារកិច្ចសហប្រតិបត្តិការជប៉ុនប្រចាំកម្ពុជា ហៅកាត់ JICA ជប៉ុនបានចូលរួមយ៉ាងសំខាន់ក្នុងការអភិវឌ្ឍវិស័យសាធារណការនិងដឹកជញ្ជូន ក្នុងនោះហេដ្ឋារចនាសម្ពន្ធ ផ្លូវ ស្ពាន និងសំណង់ធំៗជាច្រើនក៏បានលេចឡើងជាបន្តបន្ទាប់ផងដែរ។

សម្ដេចធិបតីនាយករដ្ឋមន្ត្រីក៏បានស្នើដល់ភាគីជប៉ុនតាមរយៈអនុរដ្ឋមន្ត្រីក្រសួងដែនដី ហេដ្ឋារចនាសម្ពន្ធ ដឹកជញ្ជូន និងទេសចរណ៍ជប៉ុន សូមជួយគាំទ្រដល់ការអភិវឌ្ឍហេដ្ឋារចនាសម្ពន្ធផ្លូវស្ពាននៅកម្ពុជាបន្ថែមទៀត ដូចជាគម្រោងពង្រីកកំណាត់ផ្លូវជាតិលេខ១ ពីរាជធានីភ្នំពេញដល់ស្ពានត្សឹបាសា ឬស្ពានអ្នកលឿង និងគម្រោងសាងសង់ស្ពានឆ្លងកាត់ទន្លេមេគង្គ ក្ដីតាកុយ-អរិយក្សត្រ ដែលបច្ចុប្បន្នមានទីភ្នាក់ងារ JICA កំពុងពិនិត្យសំណើរបស់ក្រសួងសាធារណការនិងដឹកជញ្ជូនកម្ពុជា។

សម្ដេចធិបតីបានថ្លែងយ៉ាងដូច្នេះថា «ខ្ញុំសូមស្នើដល់មិត្តជប៉ុនតាមរយៈឯកឧត្តមអនុរដ្ឋមន្ត្រីក្រសួងដែនដី ហេដ្ឋារចនាសម្ពន្ធ ដឹកជញ្ជូន និងទេសចរណ៍ជប៉ុន ជួយពិនិត្យលទ្ធភាពក្នុងការគាំទ្រដល់ការអភិវឌ្ឍហេដ្ឋារចនាសម្ពន្ធផ្លូវស្ពាននៅកម្ពុជាបន្ថែមទៀត ដូចជាគម្រោងពង្រីកកំណាត់ផ្លូវជាតិលេខ១ ពីរាជធានីភ្នំពេញដល់ស្ពានត្សឹបាសា ឬស្ពានអ្នកលឿង»។

សម្ដេចធិបតី ហ៊ុន ម៉ាណែត បានបន្តទៀតថា ដោយសារប្រទេសជប៉ុនជាប្រទេសជឿនលឿនលើវិស័យហេដ្ឋារចសម្ពន្ធផ្លូវស្ពាន ដូច្នេះសម្ដេចធិបតីស្នើឱ្យអនុរដ្ឋមន្ត្រីក្រសួងដែនដី ហេដ្ឋារចនាសម្ពន្ធ ដឹកជញ្ជូន និងទេសចរណ៍ជប៉ុន សូមជួយសម្របសម្រួលរៀបចំឱ្យមានកម្មវិធីផ្លាស់ចំណេះដឹងនិងជំនាញ បទពិសោធន៍ និងបច្ចេកវិទ្យាលើការអភិវឌ្ឍហេដ្ឋារចនាសម្ពន្ធរបស់ប្រទេសជប៉ុន ដើម្បីជំរុញការអភិវឌ្ឍហេដ្ឋារចនាសម្ពន្ធផ្លូវស្ពាននៅកម្ពុជាឱ្យកាន់តែមានភាពប្រសើរឡើង៕

(សូមអានបន្ត)