សម្តេច ម៉ែន សំអន និងសម្តេច ឃួន សុដារី អញ្ជើញប្រកាសតែងតាំងលោក គង់ សោភ័ណ្ឌ ជាប្រធានគណៈកម្មាធិការគណបក្សប្រជាជនកម្ពុជាខេត្តកណ្តាល ជំនួសលោក ម៉ៅ ភិរុណ

(កណ្ដាល)៖ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងសម្តេចមហារដ្ឋសភាធិការធិបតី ឃួន សុដារី សមាជិកគណៈអចិន្ត្រៃយ៍ គណៈកម្មាធិការកណ្តាលគណបក្សប្រជាជនកម្ពុជា នៅព្រឹកថ្ងៃទី៩ ខែកញ្ញា ឆ្នាំ២០២៣នេះ បានអញ្ជើញប្រកសតែងតាំងលោក គង់ សោភ័ណ្ឌ ជាប្រធានគណៈកម្មាធិការគណបក្សប្រជាជនកម្ពុជាខេត្តកណ្តាល ជំនួសលោក ម៉ៅ ភិរុណ ដែលជាប់ជាសមាជិករដ្ឋសភា និងជាអ្នកតំណាងរាស្ត្រមណ្ឌលកណ្ដាល។

(សូមអានបន្ត)

រដ្ឋមន្ត្រីក្រសួងមុខងារសាធារណៈ គាំទ្រយ៉ាងមុះមុតនូវគោលនយោបាយកែទម្រង់ និងបង្ហាញឆន្ទៈក្នុងការពន្លឿនយន្តការប្រឡងមន្ត្រីរាជការថ្នាក់ជាតិឲ្យសម្រេចឆាប់រហ័ស

(ភ្នំពេញ)៖ លោក ហ៊ុន ម៉ានី រដ្ឋមន្ដ្រីក្រសួងមុខងារសាធារណៈ បានគូសបញ្ជាក់ជំហរគាំទ្រយ៉ាងមុះមុតនូវគោលនយោបាយកំណែទម្រង់ និងបង្ហាញឆន្ទៈខ្ពស់ក្នុងការពន្លឿនយន្ដការប្រឡងមន្ដ្រីរាជការថ្នាក់ជាតិឲ្យសម្រេចឆាប់រហ័ស។

(សូមអានបន្ត)

ឧបនាយករដ្ឋមន្រ្តី សាយ សំអាល់ ជំរុញឱ្យមន្ទីររៀបចំដែនដីគ្រប់រាជធានី-ខេត្ត ពិនិត្យលទ្ធភាពពន្លឿនចុះបញ្ជីអគារសហកម្មសិទ្ធិ និងដីធ្លីដែលនៅសេសសល់ជូនពលរដ្ឋ

(ភ្នំពេញ)៖ ឧបនាយករដ្ឋមន្រ្តី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជំរុញឱ្យមន្ទីររៀបចំដែនដី នគរូបនីយកម្ម សំណង់ និងសុរិយោដី គ្រប់បណ្តារាជធានី-ខេត្ត ត្រូវពិនិត្យលទ្ធភាព ដើម្បីរៀបចំចុះបញ្ជីអគារសហកម្មសិទ្ធិ និងពន្លឿនការចុះបញ្ជី ដីធ្លីដែលនៅសេសសល់ ជូនប្រជាពលរដ្ឋដែលជាតម្លៃនៃទុនវិនិយោគ។
ការជំរុញបែបនេះរបស់ ឧបនាយករដ្ឋមន្រ្តី សាយ សំអាល់ បានធ្វើឡើងនៅព្រឹកថ្ងៃទី៧ ខែកញ្ញា ឆ្នាំ២០២៣ នៅក្នុងកិច្ចប្រជុំជីវភាពរបស់ក្រសួងរៀបចំដែនដី នគរូបនីយកម្ម និងសំណង់ ដើម្បីពិនិត្យនិងវាយតម្លៃវឌ្ឍនភាពការងារ និងទិសដៅអនុវត្តការងារបន្តរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប។
ជាមួយគ្នានេះឧបនាយករដ្ឋមន្រ្តី សាយ សំអាល់ បានបន្ថែមថា ត្រូវគិតគូរបញ្ចូលសេវាសាធារណៈចាំបាច់ របស់ច្រកចេញចូលតែមួយ ជាបណ្តើរៗទៅក្នុងប្រព័ន្ធឌីជីថល ដើម្បីឱ្យប្រជាពលរដ្ឋទទួលបានសេវាលឿនរហ័ស និងជឿទុកចិត្តបាន។
ឧបនាយករដ្ឋមន្រ្តីបានបញ្ជាក់ថា ចំពោះកិច្ចការរៀបចំនគរូបនីយកម្មនៅខេត្តសៀមរាប ត្រូវពិនិត្យមើលការរៀបចំក្រុង ដើម្បីឆ្លើយតបទៅនឹងប៉ូលសេដ្ឋកិច្ចវប្បធម៌ និងទេសចរណ៍ ដែលជាខឿនទ្រទ្រង់សេដ្ឋកិច្ចរបស់ខេត្ត និងគិតគូរយ៉ាងណាឱ្យប្រជាជនអាចរស់នៅបានសុខដុមរមនា ទទួលផ្លែផ្កាពីផែនការរៀបចំទីក្រុងមួយនេះ៕

(សូមអានបន្ត)

ឧត្តមសេនីយ៍ឯក រ័ត្ន ស្រ៊ាង ទទួលស្វាគមន៍ប្រតិភូអនុព័ន្ធនគរបាលភូមិន្ទថៃ ប្រចាំស្ថានទូតថៃ!

(ភ្នំពេញ)៖ ដោយបានការអនុញ្ញាតពីនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស នារសៀល ថ្ងៃទី០៨ ខែកញ្ញា ឆ្នាំ២០២៣ នៅបញ្ជាការដ្ឋាន កងរាជអាវុធហត្ថរាជធានីភ្នំពេញ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ បានទទួលស្វាគមន៍ ប្រតិភូអនុព័ន្ធនគរបាលភូមិន្ទថៃ ប្រចាំស្ថានទូតថៃ ដឹកនាំដោយ លោកវរសេនីយ៍ឯក បិយវឌ្ឍន៍ កៀតកង អនុព័ន្ធនគរបាលអមស្ថានទូតថៃ ចូលមកជួបសំណេះសំណាលសម្តែងការគួរសម និងពិភាក្សាការងារពាក់ព័ន្ធមួយចំនួនដើម្បីពង្រឹងចំណង សាមគ្គីភាព មិត្តភាព កិច្ចសហប្រតិបត្តិការ រវាង កងរាជអាវុធហត្ថរាជធានីភ្នំពេញ និង អនុព័ន្ធនគរបាលភូមិន្ទថៃ ឲ្យកាន់តែល្អប្រសើរឡើង។

ក្នុងនាមអនុព័ន្ធនគរបាលភូមិន្ទថៃ ប្រចាំស្ថានទូតថៃ លោកវរសេនីយ៍ឯក បិយវឌ្ឍន៍ កៀតកង បានសម្តែងនូវគារវកិច្ចចំពោះលោកឧត្តមសេនីយ៍ឯក រ័ត្ន ស៊្រាង និងឆ្លៀតឱកាសថ្លែងអំណរគុណចំពោះរាជរដ្ឋាភិបាលកម្ពុជា កងរាជអាវុធហត្ថលើផ្ទៃប្រទេស និង កងរាជអាវុធហត្ថរាជធានីភ្នំពេញ ចំពោះកិច្ចសហប្រតិបត្តិការដ៏ល្អលើការបង្ក្រាបភេរវកម្មឆ្លងដែន ការជួញដូរមនុស្ស និងបានជួយសង្គ្រោះជនជាតិថៃ ដែលត្រូវបានគេឆបោកឲ្យមកធ្វើការខុសច្បាប់ក្នុងប្រទេសកម្ពុជាកន្លងមកផងដែរ៕

(សូមអានបន្ត)

អភិបាលខេត្តកណ្ដាល ចែកប្លង់រឹងជូនពលរដ្ឋជាង​ ​២ពាន់ប័ណ្ណដល់អ្នកស្រុកមុខកំពូល និងផ្ដាំផ្ញើរមន្ត្រីពាក់ព័ន្ធសម្រួលភាពងាយស្រួលដល់ពលរដ្ឋកុំឲ្យមានភាពស្មុគស្មាញ

(កណ្តាល)៖ លោក​ គង់ សោភ័ណ្ឌ អភិបាលខេត្តកណ្ដាល​ បានថ្លែងអបអរសាទរ ជាមួយបងប្អូនប្រជាពលរដ្ឋ ក្នុងភូមិអន្លុងស្លែង ឃុំសំបួរមាស ស្រុកមុខកំពូល ដែលទទួលបាននូវវិញ្ញាបនបត្រ សម្គាល់ម្ចាស់អចលនវត្ថុ និងផ្ដាំផ្ញើរដល់គ្រប់អង្គភាពពាក់ព័ន្ធទាំងអស់ ត្រូវខិតខំយកចិត្តទុកដាក់ក្នុងការផ្ដល់សេវា និងសម្រួលដល់ប្រជាពលរដ្ឋឱ្យឆាប់ទទួលបានវិញ្ញាបនបត្រសម្គាល់ម្ចាស់អចលនវត្ថុ បានទាន់ពេលវេលា និងមិនត្រូវបង្កភាពស្មុគស្មាញដល់ប្រជាពលរដ្ឋឡើយ។

(សូមអានបន្ត)

សម្តេចធិបតី ហ៊ុន ម៉ាណែត បានដឹកនាំគណៈប្រតិភូ ត្រឡប់មកដល់កម្ពុជាវិញហើយ ក្រោយបញ្ចប់កិច្ចប្រជុំកំពូលអាស៊ាន លើកទី៤៣ និងកិច្ចប្រជុំកំពូលពាក់ព័ន្ធ នៅហ្សាការតា

 (ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានដឹកនាំគណៈប្រតិភូជាន់ខ្ពស់ ត្រឡប់មកដល់ប្រទេសកម្ពុជាវិញហើយ នៅវេលាម៉ោងជ១១យប់ ថ្ងៃទី០៧ ខែកញ្ញា ឆ្នាំ២០២៣នេះ ក្រោយបញ្ចប់កិច្ចប្រជុំកំពូលអាស៊ាន លើកទី៤៣ និងកិច្ចប្រជុំកំពូលពាក់ព័ន្ធនៅទីក្រុងហ្សាការតា សាធារណរដ្ឋឥណ្ឌូនេស៊ី។

សូមបញ្ជាក់ថា តប​តាមការអញ្ជើញរបស់លោក ចូកូ វីដូដូ ប្រធានាធិបតីឥណ្ឌូនេស៊ី និងជាប្រធានអាស៊ាន នៅ​ថ្ងៃ​ទី៤ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត និងលោកជំទាវ បានដឹក​នាំ​គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញទៅចូលរួមកិច្ចប្រជុំកំពូលអាស៊ាន​លើក​ទី៤៣ និងកិច្ចប្រជុំកំពូលពាក់ព័ន្ធជាច្រើនទៀត។

កិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ គឺជាវេទិកាដ៏មានសារៈសំខាន់សម្រាប់​ប្រ​ទេ​ស​​តំបន់អាស៊ីអាគ្នេយ៍ និងដៃគូសន្ទនា ក្នុងការជជែកដោះស្រាយបញ្ហាទាំងឡាយ។ ជាពិសេស​ការ​​ស្វះស្វែងរកនូវកាលានុវត្តន៍ទាំងផ្នែកនយោបាយ សេដ្ឋកិច្ច និងបញ្ហាសង្គមដទៃទៀត ស្រប​តាម​សសរស្តម្ភទាំង៣របស់អាស៊ានរួមមាន៖ សហគមន៍សន្តិសុខ-នយោបាយ, សហគមន៍​សេដ្ឋ​កិច្ច និងសហគមន៍សង្គម-វប្បធម៌ ដែលមានទំនាក់ទំនង និងជះឥទ្ធិពល​គ្នាទៅ​វិញ​ទៅ​មក។

វេទិកាដ៏អឺងកងមុនដំណាច់ឆ្នាំនៅតំបន់អាស៊ាននេះ មានរយៈពេលខ្លី តែកិច្ចប្រជុំមានចំនួន​ច្រើន​ ជាហេតុនាំឱ្យមេដឹកនាំប្រទេសសមាជិកអាស៊ាន និងមេដឹកនាំប្រទេសដៃគូសន្ទនារបស់​អា​ស៊ា​ន ជាពិសេសមេដឹកនាំតែប្រទេសសមាជិកអាស៊ានតែម្តង គឺមមាញឹករកពេលដូរអាវស្ទើរតែ​មិន​ទាន់​នោះដែរ។

សម្តេចធិបតី ហ៊ុន ម៉ាណែត ក៏ដូចជាមេដឹកនាំនៃបណ្តាប្រទេសសមាជិកអាស៊ានដទៃទៀតផង​ដែរ គឺមានភាពមមាញឹកខ្លាំងក្នុងរយៈពេលប្រមាណ៤ថ្ងៃនៅលើទឹកដីហ្សាកាតានេះ។ សម្តេច​ធិបតី ហ៊ុន ម៉ាណែត បានអញ្ជើញចូលរួមកិច្ចប្រជុំជាបន្តបន្ទាប់ដែលជារបៀបវារៈរបស់អាស៊ាន រួមមាន៖ ពិធីបើកកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលចង្អៀត​របស់​អាស៊ាន​លើក​ទី៤៣, ពិធីបើកវេទិកាអាស៊ាន-ឥណ្ឌូប៉ាស៊ីហ្វិក ដែលជាវេទិកាថ្មីសម្រាប់អាស៊ាន, កិច្ច​ប្រជុំ​​កំពូលអាស៊ាន-ចិនលើកទី២៦, កិច្ចប្រជុំកំពូលអាស៊ាន-សាធារណរដ្ឋកូរ៉េលើកទី២៤, កិច្ចប្រជុំកំពូលអាស៊ាន-ជប៉ុនលើកទី២៦, កិច្ចប្រជុំកំពូលអាស៊ានបូក៣ (ចិន ជប៉ុន កូរ៉េខាង​ត្បូង) លើកទី២៦, កិច្ចប្រជុំកំពូលអាស៊ាន-សហរដ្ឋអាមេរិកលើកទី១១, កិច្ចប្រជុំកំពូល​អា​ស៊ាន​​កាណាដា, កិច្ចប្រជុំកំពូលអាស៊ាន-ឥណ្ឌាលើកទី២០, កិច្ចប្រជុំកំពូលអាស៊ី​បូព៌ាលើក​ទី​១៨, កិច្ចប្រជុំកំពូលអាស៊ាន-អូស្ត្រាលីលើកទី៣, កិច្ចប្រជុំកំពូល​អាស៊ាន​-អង្គការ​សហប្រជា​ជាតិ​លើកទី១៣ និងពិធីបិទកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ រួម​ជា​មួយការប្រគល់តំណែងប្រធានអាស៊ានទៅប្រទេសឡាវ។

ក្រៅតែពីការអញ្ជើញចូលរួមកិច្ចប្រជុំដែលជារបៀបវារៈរបស់អាស៊ានហើយនោះ សម្តេចធិបតី ហ៊ុន ម៉ាណែត ក្នុងឱកាសបង្ហាញមុខក្នុងបេសកកម្មការទូតលើកដំបូងក្នុងឋានៈជានាយករដ្ឋ​មន្ត្រីរបស់កម្ពុជា ក៏បានឆ្លៀតជួបជាមួយមេដឹកនាំប្រទេសសមាជិកអាស៊ាន និងមេដឹកនាំ​ប្រទេស​ដៃ​គូសន្ទនារបស់អាស៊ានផងដែរ។ ជំនួបនេះ ជាការសម្តែងការគួរសម និងជាការ​ស្វែង រកឱកាសពង្រីកកិច្ចសហប្រតិបត្តិការ និងទំនាក់ទំនងក្នុងឋានៈ​ជា​មេ​ដឹកនាំថ្មីថ្មោងរបស់កម្ពុជា។

មេដឹកនាំរបស់អាស៊ានដែលមានវត្តមានចូលរួមកិច្ចប្រជុំនៅឥណ្ឌូនេស៊ី គឺត្រូវបានសម្តេចធិបតី ហ៊ុន ម៉ាណែត ជួបសម្តែងការគួរសម និងពិភាក្សាការងារទាំងអស់។ មេដឹកនាំអាស៊ា​ន​ដែល​សម្តេចធិបតីនាយករដ្ឋមន្ត្រី បានជួបដំបូងគេ គឺលោក ចូកូ វីដូដូ ប្រធានាធិបតីឥណ្ឌូនេស៊ី និងជាប្រធានអាស៊ាន។ បន្ទាប់មកជួបមេដឹកនាំអាស៊ានជាបន្តបន្ទាប់រួមមាន៖ ជួបពិសាអាហារ និងពិភាក្សាការងារត្រីភាគី ជាមួយលោក ផាម មីញជីញ នាយករដ្ឋមន្ត្រីវៀតណាម និងលោក សនសៃ ស៊ីផាន់ដន នាយករដ្ឋមន្ត្រីឡាវ, ជួបសម្តែងការគួរសម និងពិភាក្សាការងារ​ជាមួយ​លោក អាន់វ៉ា អ៉ីប្រាហ៉ីម នាយករដ្ឋមន្ត្រីម៉ាឡេស៊ី, ជួបសម្តែងការគួរសម និងពិភាក្សការងារ​ជា​មួយលោក លី សៀនលុង នាយករដ្ឋមន្ត្រីសិង្ហបុរី, ជួបសម្តែងការគួរសម និងពិភាក្សាការងារ​ជាមួយព្រះចៅស៊ុលតង់ ហាជី ហាសាន់ណាល់ ប៊ូគីហ្សាស់ ព្រះមហាក្សត្រនៃប្រទេសព្រុយ​ណេ​ដារ៉ូសាឡឹម, ជួបសម្តែងការគួរសម និងពិភាក្សាការងារជាមួយលោក ហ្វឺឌីណាន់ ម៉ាកូស (Fer​di​​nan​d Romualdez Marcos Jr.) ប្រធានាធិបតីហ្វីលីពីន។

ក្រៅតែពីមេដឹកនាំប្រទេសសមាជិកអាស៊ាន សម្តេចធិបតី ហ៊ុន ម៉ាណែត ក៏បានជួបសម្តែងការ​គួរ​សម និងពិភាក្សាការងារជាមួយលោក លី ឈាង នាយករដ្ឋមន្ត្រីចិន, លោក យូន សុក យ៉ល ប្រធានាធិបតីសា​ធា​រណ​​រដ្ឋកូរ៉េ, លោក គីស៊ីដា ហ្វឺមីអុ (KISHIDA Fumio ) នាយក​រដ្ឋ​មន្ត្រី​ជ​ប៉ុន, លោក កៃ រ៉ាឡា ហ្សាណាណា ហ្គូសម៉ៅ (Kay Rala Xanana Gusmão) នាយករដ្ឋមន្ត្រីទីម័រខាងកើត, លោក ម៉ាក ប្រោន (Mark Brown) នាយករដ្ឋមន្ត្រីកោះឃុក, លោកសាស្រ្តាចារ្យ ក្លូស ស្វប់ ស្ថាបនិក និងជាប្រធានប្រតិបត្តិ នៃវេទិកាសេដ្ឋកិច្ចពិភពលោក និងលោក កៅ គឹមហួន អគ្គលេខាធិការនៃអគ្គលេខា​ធិការ​ដ្ឋាន​អា​ស៊ាន។

ក្រៅតែពីជួបសម្តែងការគួរសម និងពិភាក្សាការងារជាផ្លូវការហើយនោះ ក្នុងឱកាសចូលរួមកិច្ច​ប្រជុំ និងកម្មវិធីនានានៅទីក្រុងហ្សាកាតានេះ សម្តេចធិបតី ហ៊ុន ម៉ាណែត ក៏មានឱកាសស្វា​គមន៍លោកស្រី ខាម៉ាឡា ហារីស (Kamala Harris) អនុប្រធានធិបតីអាមេរិក, លោក អាន់​តូនី អាល់បានីស (Anthony Albanese) នាយករដ្ឋមន្ត្រីអូស្ត្រាលី និងលោក ណារិនដ្រា ម៉ូឌី (Narendra Modi) នាយករដ្ឋមន្ត្រីឥណ្ឌាផងដែរ។

ក្រៅតែពីកម្មវិធីដែលបានរៀបរាប់ខាងលើហើយនោះ ពេលអញ្ជើញទៅដល់ថ្ងៃដំបូងសម្តេច​មហា​បវរធិបតី ហ៊ុន ម៉ាណែត ក៏បានអញ្ជើញចូលរួម និងថ្លែងសុន្ទរកថាគន្លឹះក្នុង​កិច្ចប្រជុំ​កំពូល​ធុរកិច្ច និងវិនិយោគអាស៊ានឆ្នាំ២០២៣។ សម្តេចធិបតីនាយករដ្ឋមន្ត្រីកម្ពុជា ក៏បានអញ្ជើញ​ជា​អធិបតីជាមួយប្រធានាធិបតីជាមួយលោកប្រធានាធិបតីហ្វីលីពិន ក្នុងពិធីចុះហត្ថលេខា​លើ​អនុ​ស្ស​រណៈនៃការយោគយល់គ្នាសម្រាប់ភាពជាដៃគូក្នុងការអភិវឌ្ឍកសិកម្ម និងសហគ្រាស មីក្រូ-ធុនតូច និងមធ្យមកម្ពុជា-ហ្វីលីពីនផងដែរ។ ពិធីនេះចុះហត្ថលេខារវាងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន សម្រាប់កម្ពុជា ជាមួយលោក ចូហ្សេ ម៉ា អេ ខនសិបសិន (JOSE MA. A CONCEPCION III) ប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន សម្រាប់ហ្វីលីន។ អនុស្សារណៈ​យោគ​យល់​គ្នានេះ ផ្តោតជាសំខាន់លើការលើកកម្ពស់វិស័យកសិកម្ម និងការជំរុញកាលានុវត្តភាព​កសិពាណិជ្ជកម្មប្រកបដោយចីរភាព។

ក្នុងបេសកកម្មការទូតជាលើកដំបូងរបស់សម្តេចមហាបវរធិបតី ហ៊ុន ម៉ាណែត ក្នុងវេទិកា​អា​ស៊ាន បាននាំឱ្យមានការចាប់អារម្មណ៍ខ្ពស់ពីសាធារណៈមតិជាតិ និងអន្តរជាតិផងដែរ។ ចាប់​អារម្មណ៍ក៏ព្រោះតែសម្តេចធិបតី ហ៊ុន ម៉ាណែត ជាមេដឹកនាំប្រទេសសមាជិកអាស៊ានថ្មី និង​បង្ហាញវត្តមានលើកដំបូងក្នុងវេទិកាអាស៊ាន ហើយក៏ជាមេដឹកនាំដែលមានវ័យក្មេងជាងគេ ក្នុងចំណោមមេដឹកនាំអាស៊ាន និងមេដឹកនាំដៃគូសន្ទនារបស់អាស៊ាន។

តាមរយៈវេទិកានេះ សម្តេចមហាបវរធិបតី ហ៊ុន ម៉ាណែត បានបង្ហាញឱ្យឃើញពីឥរិយាបថ​នយោ​​បាយការបរទេស និងជំហរនយោបាយនានាសម្រាប់បញ្ហាក្នុងតំបន់ ក៏ដូចជាលើឆាក​អន្តរ​ជាតិ តាមរយៈសុន្ទរកថាគន្លឹះរបស់សម្តេចក្នុងកិច្ចប្រជុំនានានោះ។ ក្នុងនោះតាម​រយៈការ​ថ្លែង​សុន្ទរកថា ជាភាសាអង់គ្លេសក្នុងកិច្ចប្រជុំ​កំពូល​ធុរកិច្ច និងវិនិយោគអាស៊ានឆ្នាំ២០២៣ បានធ្វើ​ឱ្យ​ប្រជាពលរដ្ឋខ្មែរ ជាពិសេសយុវវ័យកោតសរសើរ និងបង្ហាញពីមោទនភាពរបស់ពួកគេចំពោះ​សមត្ថ​ភាពចំណេះដឹងផ្នែកភាសារបស់សម្តេចធិបតីប្រមុខរាជរដ្ឋាភិបាលកម្ពុជា។

គេក៏អាចវាយតម្លៃពីសន្ទុះនៃការចាប់អារម្មណ៍របស់ប្រជាពលរដ្ឋខ្មែរ ចំពោះសកម្មភាពរបស់​សម្តេច​​ធិប​តី តាមរយៈវីដេអូដែលផ្សព្វផ្សាយលើបណ្តាញផ្សព្វផ្សាយផងដែរ។ រាល់វីដេអូរបស់​សម្តេច​ធិបតី និងលោកជំទាវជាភរិយា ចាប់តាំងពីពេលចេញដំណើរ រហូតដល់ចូលរួមកិច្ចប្រជុំ​នានានៅទីក្រុងហ្សាកាតា មានអ្នកចូលមើលច្រើន ហើយបានបញ្ចេញមតិយោបល់បង្ហាញពីការ​ពេញចិត្ត ស្ញប់ស្ញែង និងកោតសរសើរសម្តេចធិបតីជាខ្លាំង។

ក្នុងនោះលោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី បានបង្ហាញចំណាប់អារម្មណ៍ផ្ទាល់​ខ្លួន រហូតប្រដូចសម្តេចមហាបវរធិបតី ហ៊ុន ម៉ាណែត ជាតារាមួយដួងដែលរះចិញ្ចែងចិញ្ចាច​ក្នុង​វេទិកាអាស៊ានថែមទៀតផង។

លោក ប៉ែន បូណា បានគូសរំលេចថា ចំណុចដែលនាំឱ្យសម្តេចធិបតី ទទួលបានការ​ទាក់​ទាញ​ដោយសារកត្តាចំនួន៤រួមមាន៖

ទី១៖ សម្តេចធិបតី ហ៊ុន ម៉ាណែត គឺជាអវតាររបស់សម្តេចតេជោ ហ៊ុន សែន ដែលជាតួ​អង្គ​អ្នក​នយោបាយដ៏ល្បីល្បាញមួយរូបនៅកម្ពុជា ក៏ដូចជាក្នុងឆាកតំបន់និងអន្តរជាតិ។

ទី២៖ បុគ្គលិកលក្ខណៈដ៏ស័ក្តិសម ភាពស្រស់សង្ហា អាកប្បកិរិយា និងសីលធម៌​ដ៏ល្អសមសួន ព្រមទាំងមានវ័យក្មេងជាងគេក្នុងចំណោមមេដឹកនាំឯទៀត គឺជាចំណុចទាក់ទាញមនុស្សគ្រប់​គ្នា​ឱ្យ​សម្លឹងតួអង្គសម្តេចធិបតី ហ៊ុន ម៉ាណែត មិនដាក់ភ្នែក។

ទី៣៖ សមត្ថភាព និងភាពជឿជាក់លើខ្លួនឯង គឺជាចន្ទល់ដ៏រឹងមាំ​ដែលធ្វើឱ្យសម្តេចធិបតី​អាច​បំពេញបេសកកម្មការទូតបានយ៉ាងល្អលើសពីការស្មាន សូម្បីតែជាការចាប់ផ្តើមលើកដំបូង​ក៏ដោយ។

ទី៤៖ មេដឹកនាំបន្តវេន និងវ័យក្មេងរបស់កម្ពុជា ក៏បានបង្ហាញឱ្យឃើញពីសមត្ថភាពការ​ទូត​ដ៏​ចំណានក្នុងកិច្ចចរចាជាអន្តរជាតិកម្រិតខ្ពស់ ដើម្បីចូលរួមក្នុងកិច្ចការសន្តិភាពសម្រាប់តំបន់ និងពិភពលោក ក៏ដូចជាការទាញយកផលប្រយោជន៍ជូនជាតិមាតុភូមិនិងប្រជាជន៕

(សូមអានបន្ត)