​យោធិន នៃ​កងរាជអាវុធហត្ថ ដែល​ទើប​ជ្រើសរើស​ថ្មី (​ជាប់​ជា​ស្ថាពរ​) ក្នុង​រាជធានី​ភ្នំពេញ បាន​ចេញដំណើរ ចូល​ទៅ​ហ្វឹកហ្វឺន នៅ​មជ្ឈមណ្ឌល​កងរាជអាវុធហត្ថ ភ្នំ​ជុំ​សែន​រីករាយ​!

នា​ព្រឹក ថ្ងៃទី​២១ ខែ​មេសា ឆ្នាំ​២០២៣ នៅ​បញ្ជាការដ្ឋាន កងរាជអាវុធហត្ថ​រាជធានី​ភ្នំពេញ បាន​រៀបចំ​ពិធី​សំណេះសំណាល និង​ជូន​ដំណើរ​ដល់​យោធិន នៃ​កងរាជអាវុធហត្ថ ដែល​ទើប​ជ្រើសរើស​ថ្មី (​ជាប់​ជា​ស្ថាពរ​) ចំនួន​៥៦​នាក់ ដើម្បី​ចូល​ទៅ​ហ្វឹកហ្វឺន នៅ​មជ្ឈមណ្ឌល​កងរាជអាវុធហត្ថ ភ្នំ​ជុំ​សែន​រីករាយ​ស្ថិត​នៅក្នុង​ភូមិសាស្ត្រ​ភូមិ​ច្រក​កូវ ឃុំ​ពាម ស្រុក​សាមគ្គី​មានជ័យ ខេត្ត​កំពង់ឆ្នាំង ក្រោម​អធិបតីភាព លោក​ឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថ​លើ​ផ្ទៃ​ប្រទេស ជា​មេបញ្ជាការ កងរាជអាវុធហត្ថ​រាជធានី​ភ្នំពេញ និង លោកជំទាវ កែវ សុខ​ពិសី អភិបាលរង នៃ​គណៈ​អភិបាល​រាជធានី​ភ្នំពេញ ដោយ​មាន​ការចូលរួម​ពី លោក​មេបញ្ជាការរង លោកនាយ​សេនាធិការ នាយសេនាធិការ​រង ប្រធាន អនុប្រធាន​មន្ទីរ នាយការិយាល័យ និង​មេបញ្ជាការ​មូលដ្ឋាន​អាវុធហត្ថ​ខណ្ឌ​ទាំង​១៤ ព្រមទាំង សាច់ញាតិ ក្រុមគ្រួសារ បងប្អូន របស់​យោធិន ជាច្រើនរូប​ទៀត​។​

​ក្នុងឱកាស​នោះ​ដែរ លោក​ឧត្តមសេនីយ៍ឯក រ័ត្ន ស្រ៊ាង បាន​មានប្រសាសន៍​ពាំនាំ​នូវ​ការសួរសុខទុក្ខ​និង​ជូនពរ របស់ លោកនាយ​ឧត្តម សេនី​យ៍ សៅ សុខា អគ្គមេបញ្ជាការ​រង កងយោធពល​ខេមរភូមិន្ទ និង​ជា​មេបញ្ជាការ កងរាជអាវុធហត្ថ លើ​ផ្ទៃ​ប្រទេស ជូន​ដល់ យោធិន នៃ​កងរាជអាវុធហត្ថ ទើប​ជ្រើសរើស​ថ្មី​ទាំងអស់ សូមឲ្យ​ទទួលបាន​ជោគ​ជ័យ​គ្រប់គ្នា​។​

​លោក​ឧត្តមសេនីយ៍ឯក ក៏​បាន​ផ្ដាំផ្ញើ​ដល់​ប្អូនៗ យោធិន នៃ​កងរាជអាវុធហត្ថ ដែល​បាន​ប្រឡង​ជាប់​ជា​ស្ថាពរ នៅពេល​ដែល​ចូល​ទៅ​សាលា​ហ្វឹកហ្វឺន ត្រូវ​ប្រឹងប្រែង រៀនសូត្រ គ្រប់​មុខ​វិជ្ជា​ឱ្យបាន​ល្អ​ប្រសើរ ជំនះ​ឲ្យបាន​គ្រប់​ឧបសគ្គ ដើម្បី​ក្លាយខ្លួនជា​ទំពាំង​ស្នង​ឫស្សី​នាពេល​អនាគត​។​

​លោកជំទាវ កែវ សុខ​ពិសី បាន​ថ្លែងថា ក្នុងនាម ឯកឧត្តម ឃួ​ង ស្រេង អភិបាល នៃ​គណៈ​អភិបាល​រាជធានី​ភ្នំពេញ បាន​សម្ដែង​នូវ​ការកោតសរសើរ និង​វាយតម្លៃ​ខ្ពស់​ចំពោះ​អនុគណៈកម្មការ​ជ្រើសរើស​យោធិន នៃ​កងរាជអាវុធហត្ថ ដែល​បាន​រៀបចំ​ការប្រឡង​ជ្រើសរើស យោធិន​កងរាជអាវុធហត្ថ ប្រកបដោយ​តម្លាភាព និង​យុត្តិធម៌ នា​ពេល​កន្លងមក​នេះ​។ ទន្ទឹមនេះ លោកជំទាវ ក៏​សូម​ថ្លែងអំណរគុណ​ចំពោះ មាតា បិតា អាណាព្យាបាល ដែល​បាន​អនុញ្ញាត​ឱ្យ​កូនៗ ចូល​បម្រើ​ក្នុង កងយោធពល​ខេមរភូមិន្ទ បំពេញ​ក្របខ័ណ្ឌ​ឱ្យ​កងរាជអាវុធហត្ថ ដើម្បី​បម្រើ​ប្រទេសជាតិ​មាតុភូមិ និង​ប្រជាពលរដ្ឋ ជាពិសេស​ចូលរួម​ថែរក្សា សន្តិភាព និង ការអភិវឌ្ឍន៍ ក្រោម​ការដឹកនាំ​ដ៏​ឈ្លាសវៃ​របស់ សម្ដេច​អគ្គមហាសេនា​បី​តេជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា​។​

​ក្រោយ​ពី​សំណេះសំណាល​រួច លោកជំទាវ អភិបាលរង ក៏បាន​នាំយក​ថវិកា​របស់ រដ្ឋបាល​រាជធានី​ភ្នំពេញ ឧបត្ថម្ភ​ដល់ យោធិន នៃ​កងរាជអាវុធហត្ថ ទើប​ជ្រើសរើស​ថ្មី ក្នុង​ម្នាក់ៗ ទទួលបាន​ថវិកា​ចំនួន ២០០,០០០ រៀល និង លោក​ឧត្តមសេនីយ៍ឯក រ័ត្ន ស្រ៊ាង បាន​ឧបត្ថម្ភ ក្នុង​ម្នាក់ៗ ទទួលបាន មី ០១​កេស​, ភេសជ្ជៈ ទឹក​សុទ្ធ ០៣​កេស ផងដែរ​៕

(សូមអានបន្ត)

សម្តេច ម៉ែន សំអន ផ្តល់អនុសាសន៍៤ចំណុច ដល់គ្រូបង្វឹក គ្រូជំនួយជានារី និងកីឡាការិនី ដើម្បីយកជ័យជម្នះក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះ

 (ភ្នំពេញ)៖ សម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានអញ្ជើញជួបសំណេះសំណាលជាមួយគ្រូបង្វឹក គ្រូជំនួយជានារី និងកីឡាការិនីជម្រើសជាតិ កម្ពុជាចំនួន ៣៦៨នាក់ ដែលនឹងត្រូវចូលរួមក្នុងការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

(សូមអានបន្ត)

យុទ្ធនាការ​អន្ទាក់​សូន្យ​លើក​ទី​២​ក្នុង​ខេត្ត​ពោធិ៍សាត់​ចាប់ផ្ដើមជាផ្លូវការ​នៅ​ស្រុក​វាលវែង​នាព្រឹកនេះ

  

ពោធិ៍សាត់: ថ្ងៃទី២២ ខែមេសា ឆ្នាំ២០២៣ ក្រសួង​បរិស្ថាន សហការ​ជាមួយ​អង្គការ​ដៃគូ ក៏ដូចជា​រដ្ឋបាលខេត្ត​ពោធិ៍សាត់​ចាប់ផ្ដើមបើក​យុទ្ធនាការ​អន្ទាក់​សូន្យ​ដំណាក់កាល​ទី​២ លើក​ទី​២ នៅក្នុង​ស្រុក​វាលវែង នៅព្រឹកថ្ងៃ​ទី​២២ ខែ​មេសា ឆ្នាំ​២០២៣​នេះដើម្បី​ជំរុញ និង​ផ្សព្វផ្សាយ​ដល់​សាធារណជន​ឱ្យបាន​យល់ដឹង​ពី​សារៈសំខាន់​របស់​សត្វ​ព្រៃ និង​ដើម្បី​បញ្ឈប់​ការ​ដាក់​អន្ទាក់ បរបាញ់ និង​សម្លាប់​សត្វព្រៃ​គ្រប់​ប្រភេទ​ដែល​រស់នៅ​ក្នុង​តំបន់​ដែន​ជម្រក​សត្វព្រៃ និង​តំបន់ការពារធម្មជាតិ​។​ ជាពិសេសពិធីបើកយុទ្ធនាការអន្ទាក់សូន្យនាថ្ងៃនេះ ក៏ចំថ្ងៃនៃទិវាភពផែនដីផងដែរ។

​ថ្លែង​ក្នុង​សន្និសីទ​ស្ដីពី អន្ទាក់​សូន្យ​ជា​លើក​ទី​២​នៅក្នុង​ខេត្ត​ពោធិ៍សាត់ នៅ​ថ្ងៃ​ទី​២១ ខែ​មេសា ឯកឧត្តម នេត្រ ភ​ក្ត្រា អ្នកនាំពាក្យ​ក្រសួង​បរិស្ថាន បានចាត់ទុកថា យុទ្ធនាការ​អន្ទាក់​សូន្យ​លើក​ទី​២​នេះ នឹង​ចូលរួម​កាត់បន្ថយ​ការសម្លាប់​សត្វព្រៃ​បន្ថែមទៀត​នៅក្នុងខេត្តពោធិ៍សាត់។ ឯកឧត្តមគូសបញ្ជាក់ថា ខេត្ត​ពោធិ៍សាត់​ជា​ខេត្ត​ដែល​មាន​តំបន់ការពារធម្មជាតិ​ដ៏​ធំ​មួយ ជាក់ស្ដែង​គឺ តំបន់​ជួរ​ភ្នំក្រវាញ​តែម្ដង​។​

​អ្នកនាំពាក្យ​ដដែល​បានបង្ហាញ​ជំនឿ​ថា តាមរយៈ​យុទ្ធនាការ​អន្ទាក់​សូន្យ​ដំណាក់កាល​ទី​២​នេះ ក៏​នឹង​បន្ត​ចូលរួម​ផ្ដល់​ការយល់ដឹង​ដល់​ប្រជាពលរដ្ឋ និង​ជំរុញ​ឱ្យ​ប្រជាពលរដ្ឋ​បញ្ឈប់​សកម្មភាព​បរបាញ់ ឬ​ដាក់​អន្ទាក់ ដែល​បង្ក​ជា​គ្រោះថ្នាក់​ដល់​សត្វព្រៃ​។ ឯកឧត្តម​កត់សម្គាល់ឃើញថា គិត​ត្រឹម​រយៈពេល​៧០​ឆ្នាំ​ចុងក្រោយ​នេះ បរិមាណ​សត្វព្រៃ​ដែល​រស់នៅ​ក្នុង​ព្រៃ​ធម្មជាតិ​មាន​ការថយចុះ​ប្រមាណ​៦០​ភាគរយ ដោយសារ​ការបាត់បង់​ទីជម្រក ការ​បរបាញ់ និង​ការដាក់​អន្ទាក់​។ យ៉ាងណា ក្រោយ​ទទួលបាន​សុខសន្តិភាព កម្ពុជា​បាន​ស្ដារ​ឡើងវិញ​លើ​ការងារ​អភិរក្ស​សត្វព្រៃ ហើយ​សម្រេច​បាន​ការអភិរក្ស​សត្វព្រៃ​នៅ​កម្ពុជា​ប្រកបដោយ​ប្រសិទ្ធភាព​ឡើងវិញ​។​

អន្ទាក់​គឺជា​ឧបករណ៍​ដែល​បង្ក​គ្រោះ​ថ្នាក់​ខ្លាំង​ចំពោះ​សត្វព្រៃ ខណៈ​បរិមាណ​អន្ទាក់​នៅក្នុង​ព្រៃ​ធម្មជាតិ​នៅតែ​បន្ត​មាន​។ ជា​ដំណោះស្រាយ រាជរដ្ឋាភិបាល​តាមរយៈ​ក្រសួងបរិស្ថា​ន​បាន​ដាក់ចេញ​វិធានការ ក្នុងការ​បង្វែរ​មុខរបរ​របស់​ប្រជា​សហគមន៍​ដែល​នៅ​ជុំវិញ និង​នៅ​ជិត​តំបន់​ដែន​ជម្រក​សត្វព្រៃ ឱ្យ​ពួកគេ​វិល​មក​ប្រកប​របរ​ផ្សេង​ពី​ការ​បរបាញ់ និងដាក់អន្ទាក់ ក្នុងនោះរួមមានដូចជា​៖ មុខរបរ​ធ្វើ​កសិកម្ម​ជាដើម​។​

គួររម្លឹកថា កាលពី​ថ្ងៃ​ទី​០៧ ខែ​មេសា ឆ្នាំ​២០២៣ មន្ត្រី​ក្រសួង​បរិស្ថាន រួម​ជាមួយ​អង្គការ​សង្គម​ស៊ីវិល និង​ក្រុម​អ្នកសារព័ត៌មាន ព្រម​ទាំង​រដ្ឋបាល​ខេត្ត​ពោធិ៍សាត់ និង​មន្ទីរ​ជំនាញ​ពាក់ព័ន្ធ​នឹង​បើក​យុទ្ធនាការ​អន្ទាក់​សូន្យ​ដំណាក់កាល​ទី​២ លើក​ទី​១​នៅក្នុង​ទី​រួម​ខេត្តពោធិ៍សាត់​។ ខេត្ត​ពោធិ៍សាត់​ជា​ខេត្ត​ទី​១​ដែល​នឹង​ចាប់ផ្តើម​យុទ្ធនាការ​អន្ទាក់​សូន្យ​ដំណាក់កាល​ទី​២​។ ខេត្ត​នេះ​មាន​តំបន់ការពារធម្មជាតិ​ចំនួន​៦ រួមមាន​៖ ឧទ្យាន​ជាតិ​ជួរ​ភ្នំក្រវាញ​ខាងត្បូង ឧទ្យាន​ជាតិ​ជួរ​ភ្នំក្រវាញ​កណ្ដាល ដែនជម្រកសត្វព្រៃ​ភ្នំ​សំ​កុស ដែនជម្រកសត្វព្រៃ​ភ្នំ​ឱ​រ៉ា​ល់ តំបន់​ប្រើប្រាស់​ច្រើនយ៉ាង​បឹង​ទន្លេសាប និង​របៀង​អភិរក្ស​ជីវៈចម្រុះ​ប្រព័ន្ធ​តំបន់ការពារធម្មជាតិ មាន​ផ្ទៃដី​សរុប ៦៨៩,២៩៧​ហិកតា​៕ ដោយ៖ គង់ សិរីរ័ត្ន, រូបថត៖ អ៊ុន រិទ្ធី សម្រួលផ្សាយដោយ៖ darä

(សូមអានបន្ត)

ប្រធានក្រុមប្រឹក្សាខេត្ត រម្លឹកដល់អាជ្ញាធរគ្រប់លំដាប់ថ្នាក់ ត្រូវការពារសន្តិសុខ សណ្ដាប់ធ្នាប់សាធារណៈ ឱ្យបានល្អក្នុងការប្រកួតកីឡាស៊ីហ្គេម

       កណ្ដាល៖ ថ្ងៃទី២១ ខែមេសា ឆ្នាំ២០២៣ ថ្លែងនៅក្នុងកិច្ចប្រជុំសាមញ្ញក្រុមប្រឹក្សាខេត្ត លើកទី៤៧ អាណត្តិទី៣ នៅថ្ងៃព្រហស្បតិ៍ ១កើតខែពិសាខ ឆ្នាំថោះ បញ្ចស័ក ព.ស. ២៥៦៦ ត្រូវនឹងថ្ងៃទី២០ ខែមេសា ឆ្នាំ២០២៣ ឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្ដាល បានក្រើនរម្លឹកដល់អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធទាំងបីប្រភេទ ត្រូវត្រៀមលក្ខណៈក្នុងការការពារសន្តិសុខ សណ្ដាប់ធ្នាប់សាធារណៈ ឱ្យបានល្អគ្រប់ជ្រុងជ្រោយ និងត្រូវត្រៀមសហការ ចូលរួមក្នុងកិច្ចការពារសន្តិសុខសណ្ដាប់ធ្នាប់ ក្នុងការប្រកួតកីឡាស៊ីហ្គេម និងប៉ារ៉ាហ្គេម ២០២៣ ដែលព្រះរាជាណាចក្រកម្ពុជាធ្វើជាម្ចាស់ផ្ទះ ដែលនឹងប្រព្រឹត្តទៅនៅខាងមុខនេះឱ្យប្រព្រឹត្តទៅបានជោគជ័យ។

ឯកឧត្តម ប្រធានក្រុមប្រឹក្សាខេត្ត បានមានប្រសាសន៍កោតសរសើរ និងវាយតម្លៃខ្ពស់ទៅលើកិច្ចសហប្រតិបត្តិការ រវាងអាជ្ញាធរគ្រប់លំដាប់ថ្នាក់ និងមន្ទីរជុំវិញខេត្ត ដែលបានខិតខំបំពេញការងារតាមតួនាទី ភារកិច្ចទទួលបានលទ្ធផលល្អ និងមានការទទួលខុសត្រូវខ្ពស់។ ទន្ទឹមនឹងនេះដែរឯកឧត្តម ក៏បានជំរុញ និងលើកទឹកចិត្តដល់បណ្តាមន្ទីរ អង្គភាព និងអាជ្ញាធរគ្រប់លំដាប់ថ្នាក់ ត្រូវបន្តខិតខំបំពេញតួនាទី និងភារកិច្ចរបស់ខ្លួនបន្ថែមទៀត ។ ដើម្បីជួយលើកកម្ពស់ប្រសិទ្ធភាពការងារ និងអនុវត្តន៍សេចក្តីសម្រេចផ្សេងៗ ប្រកបដោយអភិបាលកិច្ចល្អ រវាងក្រុមប្រឹក្សាខេត្ត និងគណៈអភិបាលខេត្ត សំដៅឆ្លើយតបបានតាមតម្រូវការរបស់ប្រជាពលរដ្ឋនៅមូលដ្ឋាន។ ជាពិសេសត្រូវបន្តដោះស្រាយ បញ្ហាប្រឈមនានាដែលនៅសេសសល់ ឱ្យទទួលបានជោគជ័យបន្ថែមទៀត។

ឯកឧត្តម ក៏បានក្រើនរម្លឹកដល់អង្គភាពច្រកចេញ-ចូលតែមួយខេត្ត និងការិយាល័យប្រជាពលរដ្ឋ ត្រូវបន្តខិតខំផ្ដល់សេវាជូនប្រជាពលរដ្ឋ ឱ្យកាន់តែមានប្រសិទ្ធភាពខ្ពស់ តម្លាភាព និងឆាប់រហ័ស តាមរយៈការបង្កើនសមត្ថភាពដល់មន្ត្រីជាប្រចាំ ដើម្បីធ្វើឱ្យការបម្រើសេវានានាជូនប្រជាពលរដ្ឋ កាន់តែមានប្រសិទ្ធភាពខ្ពស់។

សូមជម្រាបផងដែរថា គិតចាប់ពីថ្ងៃទី៣ ខែធ្នូ ឆ្នាំ២០២២ ដល់ថ្ងៃទី២៤ ខែមីនា ឆ្នាំ២០២៣ អង្គភាពច្រកចេញ-ចូលតែមួយរដ្ឋបាលខេត្ត បានផ្ដល់សេវាជូនប្រជាពលរដ្ឋសរុបចំនួន ៩ ៧០៧ សេវា។ ដោយឡែកការិយាល័យប្រជាពលរដ្ឋ បានទទួលពាក្យបណ្តឹង និងព័ត៌មានផ្សេងៗ សរុបចំនួន ៦៦បណ្ដឹង ក្នុងនោះ ទទួលបណ្ដឹងតាមរយៈជួបផ្ទាល់០៦បណ្ដឹង, ប្រអប់សំបុត្រ១៩បណ្តឹង, តាមទូរស័ព្ទ០៨បណ្ដឹង, និងប្រព័ន្ធអេឡិចត្រូនិច៣៣បណ្តឹង។ លទ្ធផលនៃការសម្រុះសម្រួលដោះស្រាយបណ្តឹង សរុបចំនួន ៥១បណ្តឹង ។ ក្នុងនោះបានសម្រុះសម្រួលដោះស្រាយបញ្ចប់ ៣៣បណ្តឹង និងបញ្ជូនទៅស្ថាប័នមានសមត្ថកិច្ច ១៨បណ្ដឹង។ ការផ្ដល់ព័ត៌មានត្រឡប់ តាមរយៈសារអេឡិចត្រូនិក សរុបចំនួន ៣៣ករណី ៕ ដោយ ណយ នឿន (ប្រភព៖រដ្ឋបាលខេត្តកណ្តាល)

(សូមអានបន្ត)

ថ្នាក់ដឹកនាំ​ និងមន្រ្តីរាជការគ្រប់លំដាប់ថ្នាក់​ នៃក្រសួងកសិកម្ម​ រុក្ខាប្រមាញ់​ និងនេសាទ​ បរិច្ចាគថវិកា ៥ម៉ឺនដុល្លារ ក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៣

(ភ្នំពេញ)៖ ថ្នាក់ដឹកនាំ​ និងមន្រ្តីរាជការគ្រប់លំដាប់ថ្នាក់​ នៃក្រសួងកសិកម្ម​ រុក្ខាប្រមាញ់​ និងនេសាទ​ បានបរិច្ចាគថវិកាចំនួន ៥ម៉ឺនដុល្លារអាមេរិក ចូលរួមជាមួយកាកបាទក្រហមកម្ពុជា ក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៣។

ថ្នាក់ដឹកនាំ​ និងមន្រ្តីរាជការគ្រប់លំដាប់ថ្នាក់​ នៃក្រសួងកសិកម្ម​ រុក្ខាប្រមាញ់​ និងនេសាទ​ តែងតែចូលរួមបរិច្ចាគថវិកាជារៀងរាល់ឆ្នាំ ជាមួយកាកបាទក្រហមកម្ពុជាក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ហើយក៏តែងតែបានចូលរួមឧបត្ថម្ភថវិកាជួយដល់យុទ្ធនាការផ្សេងៗ របស់ប្រមុខរាជរដ្ឋាភិបាល ព្រមទាំងបានចូលរួមជួយឧបត្ថម្ភដល់កម្មវិធីសប្បុរសជាច្រើនទៀត។

សូមជម្រាបថា សម្រាប់សប្បុរសជនគ្រប់មជ្ឈដ្ឋានដែលមានសទ្ធាជ្រះថ្លាចូលរួមបរិច្ចាគថវិកា ជូនកាកបាទក្រហមក្រហមកម្ពុជា ក្នុងឱកាសខួបលើកទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៣ ដើម្បីឱ្យសមាគមជាតិមួយនេះមានធនធានបន្តផ្តល់សេវាកម្មមនុស្សធម៌ ដោះស្រាយបញ្ហាប្រឈមនានា បន្តពង្រឹងភាពធន់សហគមន៍ និងជួយសម្រាលទុក្ខលំបាកប្រជាពលរដ្ឋរងគ្រោះ និងងាយរងគ្រោះបំផុតតាមគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម។

សូមអញ្ជើញទៅទីស្នាក់ការកណ្ដាលកាកបាទក្រហមកម្ពុជា ឬសូមវេរចូលគណនីធនាគាររបស់កាកបាទក្រហមកម្ពុជា នៅធនាគារពាណិជ្ជកម្មក្រៅប្រទេសនៃកម្ពុជា ដែលមានលេខគណនីដូចខាងក្រោម៖

* ប្រាក់រៀល៖ 100004348127

* ប្រាក់ដុល្លារអាមេរិក៖ 300001709996

ធនាគារវឌ្ឍនៈអាស៊ីចំកាត់ (ABA)៖

* គណនីឈ្មោះ៖ PUM CHANTINIE AND MEN NEARY SOPHEAK AND LIM SAY

* គណនីប្រាក់រៀល៖ 180 255 333

* គណនីប្រាក់ដុល្លារអាមេរិក៖ 180 255 168

ចំពោះព័ត៌មានលម្អិត សូមទំនាក់ទំនង៖

* លោកជំទាវ ពុំ ចន្ទីនី លេខទូរស័ព្ទ៖ ០១២ ៩២១ ១០៥

* លោកជំទាវ មែន នារីសោភ័គ លេខទូរស័ព្ទ៖ ០១២ ៨១០ ៨៥៤

* ឯកឧត្តម ឌួង អេលីត លេខទូរស័ព្ទ៖ ០១៧ ២៤៨ ៨៨៨

(សូមអានបន្ត)

អភិបាលខេត្តព្រះសីហនុ អញ្ជើញសំណេះសំណាល និងជូនដំណើរយោធិន នៃកងរាជអាវុធហត្ថខេត្តព្រះសីហនុ ជ្រើសរើសថ្មី

ខេត្តព្រះសីហនុ : ឯកឧត្តម គួច ចំរើន អភិបាល នៃគណៈអភិបាលខេត្តព្រះសី ហនុ អញ្ជើញសំណេះសំណាល និងជូនដំណើរយោធិន នៃកងរាជអាវុធហត្ថខេត្តព្រះសីហនុ ជ្រើសរើសថ្មីចំនួនៈ ២៣នាក់ ចូលហ្វឹកហ្វឺននៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជំរាយ) ពិធីនេះបានប្រារព្ធធ្វើនៅទីបញ្ជាការកងរាជអាវុធ ហត្ថខេត្តព្រះសីហនុ។

លោកឧត្តមសេនីយ៍ ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុបានរាយការណ៍ពីសកម្មភាពជ្រើសរើសថ្មី ដើម្បីបញ្ជូនទៅហ្វឹកហ្វឺ ននៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជំរាយ) សម្រាប់បេក្ខជនគ្រប់លក្ខណៈសម្បត្តិ (ជាប់ជាស្ថាពរ) ២៣នាក់ ត្រូវបានក្រសួងការពារជាតិចេញប្រកាសបញ្ចូលក្របខ័ណ្ឌកងយោធពលខេមរភូមិន្ទ បំពេញឱ្យក្របខណ្ឌកងរាជអាវុធហត្ថ ក្លាយជាយោធិន នៃកងអាវុធហត្ថជាផ្លូវការ និងបានប្រមូលផ្តុំរៀបចំសំណេះសំណាលជូនដំណើរទៅហ្វឹកហ្វឺននៅមជ្ឈមណ្ឌលហ្វឹកហ្វឺនកងរាជអាវុ ធហត្ថ (ភ្នំជំរាយ) នាពេលនេះ។ ដោយទទួលបានគោលការណ៍ពីឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរ ភូមិន្ទ និងជាមេបញ្ជាការអាវុធហត្ថលើផ្ទៃប្រទេស ផ្អែកតាមផែនការលេខ០០១/២០២៣ ផ.ក ចុះថ្ងៃទី២២ ខែមីនា ឆ្នាំ២០២៣ របស់អនុគណៈកម្មការជ្រើសរើសយោធិន នៃកងរាជអាវុធហត្ថខេត្តព្រះសីហនុ ទើបជ្រើសរើសថ្មី ដើម្បីបញ្ជូនទៅហ្វឹក ហ្វឺននៅមជ្ឈមណ្ឌលហ្វឹកហ្វឺនកងរាជអាវុធ ហត្ថ (ភ្នំជំរាយ)។

លោកនាយឯក ឃុតអេង ឆៃអៀង អត្តលេខ ២៦៥៣៩ តំណាងឱ្យយោធិន នៃកងរាជអាវុធ ហត្ថ ទើបជ្រើសរើសថ្មី បានធ្វើការបេ្តជ្ញាចិត្ត៖ ១- ស្មោះត្រង់ដាច់ខាតចំពោះជាតិ សាសនា ព្រះមហាក្សត្រ ២- ខិតខំរៀនសូត្រ រក្សាការសាមគ្គីភាព គោរព វិន័យ បទបញ្ជាផ្ទៃក្នុងរបស់សាលាឱ្យបានម៉ឺងម៉ាត់ ៣- គោរពអនុវត្តម៉ឺងម៉ាត់ ច្បាប់លក្ខន្តិក:ទូទៅចំពោះយោធិន នៃកងយោធពលខេមរភូមិន្ទ និងបទវិន័យទូទៅសម្រាប់កងយោធពោខេមរភូមិន្ទ ៤- គោរពអនុវត្តម៉ឺងម៉ាត់នូវរាល់បទបញ្ជា និងការ ចាត់តាំងរបស់ឯកឧត្តម នាយឧត្តមសេនីយ៍ អគ្គមេបញ្ជាការកងរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ៥- ខិតខំប្រតិបត្តិតួនាទី ភារកិច្ច និងបេសកកម្មកងរាជអាវុធហត្ថ ដែលថ្នាក់ដឹកនាំបានប្រគល់ឪ្យនៅពេលបញ្ចប់វគ្គ ។

ឯកឧត្តម គួច ចំរើន អភិបាលខេត្តព្រះសីហនុ អញ្ជើញសំណេះសំណាល និងជូនដំណើរយោធិននៃកងរាជអាវុធហត្ថទើបជ្រើសរើសថ្មី (ជាប់ជា ស្ថាពរ) ចូលហ្វឹកហ្វឺននៅមជ្ឈមណ្ឌល ហ្វឹកហ្វឺនកងរាជអាវុធហត្ថ (ភ្នំជំរាយ) នាឱកាសនេះ ព្រម ទាំង បានលើកពីប្រវត្តិរបស់ឯកឧត្តម ព្រមទាំងបានធ្វើការចែករំលែកនូវបទពិសោធន៍ នៃជីវិតរបស់ឯកឧត្តម បានឆ្លងកាត់ចូលបំរើកងទ័ព រហូតឈានចូលបំរើការងារក្នុងក្របខណ្ឌក្រសួងមហាផ្ទៃរហូតមកដល់សព្វថ្ងៃនេះ និងសំណូមពរឱ្យយោធិ ន នៃកងរាជអាវុធហត្ថខេត្តព្រះសីហនុ ដែលជ្រើសរើសថ្មីនាពេលនេះ ចូលរួមវគ្គហ្វឹកហាត់ ត្រូវខិតខំចាត់ទុកការហ្វឹកហ្វឺនជាជំនាញចំណេះដឹងថ្មីមួយទៀត សម្រាប់ប្រើប្រាស់ដោយការទទួលខុស ត្រូវ ទើបកងទ័ពរបស់យើងមានភាពរឹងមាំ និងឱ្យរាងកាយ សុខភាពរបស់យើងរឹងមាំ ហើយពេល វេលាហ្វឹកហាត់ជាការវាយតម្លៃ នៃការប្រកួតប្រជែងជ្រើសរើសការតែងតាំង អ្នកដែលរៀនពូកែត្រូវបានតែងតាំងតួនាទី មុខតំណែងជាក់ជាមិន ខាន។ សូមឱ្យពេលបញ្ចប់វគ្គដោយជោគជ័យត្រឡប់មកវិញទាំង ២៣នាក់ ត្រូវបន្តការខិតខំទាំងអស់គ្នា គោរពវិន័យសាលា ចង់ឃើញយោធិន នៃកងរាជអាវុធហត្ថថ្មីទាំង ២៣នាក់ ត្រឡប់មក វិញប្រកបដោយចំណេះជំនាញក្នុងការបំរើអង្គភាពកងរាជអាវុធហត្ថខេត្ត និងជូនពរឱ្យក្លាយជាពលអាវុធហត្ថដែលមានសមត្ថភាព ជំនាញវិជ្ជាជីវៈ។

ឯកឧត្តម អភិបាលខេត្ត បានធ្វើការផ្តាំផ្ញើរដល់យោធិន នៃកងរាជអាវុធហត្ថទើបជ្រើសរើសថ្មី (ជាប់ជាស្ថាពរ) ទាំង២៣រូប ត្រូវខិតខំហ្វឹកហាត់ រៀនសូត្រ ក្រេបជញ្ជក់យកនូវចំណេះដឹង ចំណេះ ធ្វើពីគ្រូយោធាចារ្យ ត្រូវបង្កើនការយកចិត្តទុកដាក់រៀនសូត្រឱ្យអស់ពីសមត្ថភាពរៀងៗខ្លួន ត្រូវគោរពឱ្យបាននូវវិន័យ បទបញ្ជាផ្ទៃក្នុងរបស់វគ្គ ត្រូវយកអស់កម្លាំងកាយចិត្តខិតខំរៀនសូត្រ ដើម្បីប្រែក្លាយខ្លួនជានាយទាហានដែលមានសមត្ថភាពពេញ លេញ គុណភាព គុណធម៌ជាក់លាក់ ជារបងការ ពារជាតិរឹងមាំនាពេលខាងមុខ។

ក្នុងឱកាសនោះឯកឧត្តម អភិបាលខេត្ត ក៏បាននាំយកអំណោយសម្តេចតេជោ និងសម្តេចកិត្តិព្រឹទ្ធបណ្ឌិតឧបត្ថមជូនយោធិន ២៣នាក់ ក្នុងម្នាក់ទទួលបានសៀវភៅ ១ក្បាល និងថវិកា ២០ម៉ឺនរៀល៕ ដោយ៖ មន្ទីរព័ត៌មានខេត្តព្រះសីហនុ

(សូមអានបន្ត)

ព្រឹកថ្ងៃនេះសម្ដេចតេជោ ហ៊ុន សែន អញ្ជើញសម្ពោធដាក់ឲ្យប្រើប្រាស់នូវអគារសម្ភព នៃមន្ទីរពេទ្យកុមារជាតិ

(ភ្នំពេញ)៖ នៅព្រឹកថ្ងៃព្រហស្បត្ដិ៍ ទី២០ ខែមេសា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញជាអធិបតី ក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិ។ 

 អគារថ្មីនៃមនី្ទរពេទ្យកុមារជាតិនេះ មានទទឹង១៥ម៉ែត្រ និងបណ្តោយ៦០ម៉ែត្រ កម្ពស់៤ជាន់ (E0-E1-E2-E3) និងគ្រែសម្រាប់ទទួលអ្នកជំងឺសម្រាកព្យាបាល ចំនួន១០០គ្រែ។ ជាន់ក្រោមផ្ទាល់ដី មានទទួលផ្នែកពិគ្រោះជំងឺទូទៅកុមារ, ផ្នែកចាក់ថ្នាំបង្ការកុមារ និងដើមខែឧសភាខាងមុខនេះ មនី្ទរពេទ្យបើកដំណើរការផ្នែកពិនិត្យព្យាបាលភ្នែកកុមារ, ផ្នែកពិនិត្យផ្ទៃពោះជូនស្រី្តមុនសម្រាល ផ្នែករោគស្រី្ត ផ្នែកឱសថ។ ជាន់ទី១ ផ្នែកសម្ភព និងសម្រាល, ជាន់ទី២ ផ្នែកទារក និងសម្ភព ដាក់ជាប់គ្នា និងជាន់ទី៣ ផ្នែកសម្ភព និងបន្ទប់សម្រាករួម និងបន្ទប់សម្រាកពីរនាក់ និងសម្រាកដាច់ដោយឡែកផងដែរ។

 អគារថ្មីនេះចាប់ផ្តើមសាងសង់ឡើងនៅខែកុម្ភៈ ឆ្នាំ២០២១ ត្រូវបានបញ្ចប់ការសាងសង់រួចរាល់ជាស្ថាពរ នាខែកញ្ញា ឆ្នាំ២០២២ សមិទ្ធផល នៃអគារមនី្ទរពេទ្យកុមារជាតិនេះ សាងសង់ឡើងដោយថវិការបស់រាជរដ្ឋាភិបាល។ នេះបើតាមការបញ្ជាក់របស់លោកសាស្រ្តាចារ្យ ញឹប អង្កាបុស្ស នាយកមនី្ទរពេទ្យកុមារជាតិ។ សូមជម្រាបថា អគារនេះមានបំពាក់នូវបរិក្ខាពេទ្យទំនើបៗ និងមានប្រើប្រាស់ប្រព័ន្ធឌីជីថលក្នុងការគ្រប់គ្រងទិន្នន័យ និងប្រវត្តិអ្នកជំងឺបានច្បាស់លាស់ងាយស្រួល ក្នុងការផ្ដល់សេវាព្យាបាលអ្នកជំងឺបានលឿនរហ័សប្រកបដោយគុណភាព និងប្រសិទ្ធិភាពខ្ពស់៕

(សូមអានបន្ត)

ក្រសួងអប់រំ ចេញសេចក្ដីណែនាំ ស្ដីពីការរៀបចំ និងការប្រព្រឹត្ដទៅនៃការប្រឡងជ្រើរើសសិស្សពូកែ ប្រចាំរាជធានី ខេត្ដ និងទូទាំងប្រទេស

(ភ្នំពេញ)៖ បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានចេញសេចក្ដីណែនាំ ស្ដីពីការរៀបចំ និងការប្រព្រឹត្ដទៅនៃការប្រឡងជ្រើរើសសិស្សពូកែ ប្រចាំរាជធានី ខេត្ដ និងទូទាំងប្រទេស សម្រាប់ឆ្នាំសិក្សា ២០២២-២០២៣៕

ខាងក្រោមនេះជាសេចក្ដីណែនាំរបស់ក្រសួងអប់រំ៖

(សូមអានបន្ត)

អាជ្ញាធរខេត្តបាត់ដំបង បើកកិច្ចប្រជុំត្រៀមទទួលព្រះអគ្គីកីឡា ដែលនឹងដង្ហែមកដល់ទឹកដីខេត្តបាត់ដំបង នាពេលខាងមុខនេះ

 (បាត់ដំបង)៖ លោក សុខ លូ អភិបាលខេត្តបាត់ដំបង នារសៀលថ្ងៃទី១៨ ខែមេសា ឆ្នាំ២០២៣ បានដឹកនាំកិច្ចប្រជុំពិភាក្សាការងារត្រៀមរៀបចំពិធីដង្ហែព្រះអគ្គីកីឡាឆ្លងកាត់ខេត្តបាត់ដំបង សម្រាប់ព្រឹត្តិការណ៍ការប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលព្រឹត្តិករណ៍ជាប្រវត្តិសាស្ត្រនេះនឹងមកដល់ក្នុងរយៈពេល១៧ថ្ងៃទៀតប៉ុណ្ណោះ។

នាឱកាសនោះ លោកបានថ្លែថា នៅថ្ងៃទី១ ខែឧសភា ឆ្នាំ២០២៣ ក្បួនដង្ហែព្រះអគ្គីរបស់ខេត្តបាត់ដំបង នឹងចាប់ផ្តើមដង្ហែចេញពីចំណុចព្រំប្រទល់រវាងខេត្តបាត់ដំបង និងខេត្តពោធិ៍សាត់ ត្រង់ម្ដុំឃុំស្វាយដូនកែវ តាមផ្លូវជាតិលេខ៥ អមដោយ ក្រុមកីឡាករ កីឡាការិនី ក្រុមកង់ប្រចាំខេត្តបាត់ដំបង រហូតមកដល់រង្វង់មូលលោកតាដំបងគ្រញូង រួចបន្តដំណើរទៅកាន់វេទិកាដែលប្រារព្ធពិធីទទួលនូវព្រះអគ្គីកីឡាក្នុងព្រឹត្តិការណ៍ស៊ីហ្គេម និងប៉ារ៉ាហ្គេមជាផ្លូវការ ស្ថិតនៅមុខសាលាខេត្តចាស់ និងបន្តដង្ហែទៅរក្សាទុកនៅវត្តពោធិ៍វាល ក្នុងក្រុងបាត់ដំបងមួយយប់ ដើម្បីព្រះសង្ឃធ្វើកិច្ចពិធីសាសនា ប្រសិទ្ធិពរ ជ័យមង្គលជូនដល់ប្រជាពលរដ្ឋក្នុងខេត្តបាត់ដំបងទាំងមូល មុននឹងប្រគល់ជូនខាងខេត្តបន្ទាយមានជ័យបន្តទៀត។

លោកអភិបាលខេត្តបានបន្តថា ខេត្តបាត់ដំបងនឹងត្រៀមរៀបចំទង់ជាតិ និងដាក់ភ្លើងរចនាតាមដងផ្លូវ ដើម្បីត្រៀមស្វាគមន៍ព្រះអគ្គីកីឡា និងគណៈប្រតិភូដែលបានចូលរួមទាំងអស់។

លោក សុខ លូ ក៏បានអំពាវនាវដល់មន្ត្រីរាជការ តាមមន្ទីរ អង្គភាព កងកម្លាំងប្រដាប់អាវុធ សាស្ត្រាចារ្យ លោកគ្រូអ្នកគ្រូ សិស្ស និស្សិត ក៏ដូចជាប្រជាពលរដ្ឋទាំងអស់ ក្នុងខេត្តបាត់ដំបង សូមចូលរួមក្នុងព្រឹត្តិការណ៍ទទួលនូវព្រះអគ្គីកីឡា ដែលដង្ហែចូលមកក្នុងខេត្តបាត់ដំបង ឱ្យបានច្រើនកុះករ។

បន្ថែមពីលើនេះ លោកក៏បានអំពាវនាវដល់ប្រជាពលរដ្ឋនៅតាមដងវិថីនៃផ្លូវជាតិលេខ៥ ដូចជាវិថីដែលពាក់ព័ន្ធនឹងក្បួនដង្ហែ សូមជួយសម្អាតបរិស្ថាននៅតាមដងផ្លូវ និងដាក់នៅទង់ជាតិនៅតាមមុខផ្ទះរៀងៗខ្លួន ដើម្បីត្រៀមខ្លួនអបអរសាទរព្រឹត្តិការណ៍ដង្ហែព្រះអគ្គីកីឡាឱ្យមានភាពឱឡារិកអធិកអធម្ម និងជាមោទនភាពដែលមិនអាចកាត់ថ្លៃបានសម្រាប់ខេត្តបាត់ដំបង៕

(សូមអានបន្ត)