ពិធីបុណ្យបញ្ចុះខណ្ឌសីមាឆ្លងសមិទ្ធផលនានាក្នុងវត្តទូលលក្ខរស្មីមានជ័យ(ហៅវត្តទួលពង្រនិងប្រព្រឹត្តទៅនាថ្ងៃខាងមុខដោយមានការចូលរួមពីពុទ្ធបរិស័ទជិតឆ្ងាយច្រើនកុះករ

(ខេត្តបន្ទាយមានជ័យ)ពិធីបុណ្យបញ្ចុះខណ្ឌសីមា ឆ្លងសមិទ្ធផលនានា និងស្រោចស្រពសុគន្ធវារី នៅវត្តទូលលក្ខរស្មីមានជ័យ (ទួលពង្រ) ដែលស្ថិតនៅភូមិទួលពង្រសង្កាត់អូរឫស្សី ក្រុងប៉ោយប៉ែត ខេត្តបន្ទាយមានជ័យ ដោយរៀបចំឡើងពីសំណាក់ព្រះសង្ឃនិងអាចារ្យ គណៈ កម្មការ គណៈសទ្ធា ម្ចាស់វេនទាំង ១៤វេន រូមនិងពុទ្ធបរិស័ទគ្រប់មជ្ឈដ្ឋានទាំងក្នុងនិងក្រៅប្រទេស បានចូលរួមមតិគ្នាជាឯកច្ឆន្ទប្រារព្ធរៀបចំបុណ្យបញ្ចុះខណ្ឌសីមា ឆ្លងសមិទ្ធផលនានា និងស្រោចស្រពសុគន្ធវារី ប្រគេនព្រះចៅអធិការវត្ត

ទួលលក្ខរស្មីមានជ័យ (ទួលពង្រ) អាស្រ័យដូចបានប្រគេន និងជម្រាបជូនខាងលើ សូមអារាធនានិមន្ត ព្រះថេរានុថេរៈគ្រប់ព្រះអង្គ និងគោរពអញ្ជើញ ឯកឧត្តមឧកញ៉ា លោកជំទាវ លោក លោកស្រី នឹង ពុទ្ធបរិស័ទជិតឆ្ងាយ ចូលរួមក្នុងកម្មវិធីបុណ្យនេះឱ្យបានច្រើនកុះករ ហើយអនុមោទនាទទួលយកនូវអានិសង្ស ដែលកើតចេញពីបុណ្យបញ្ចុះខណ្ឌសីមានេះ ជាបុណ្យមួយដ៏កម្រក្នុងព្រះពុទ្ធសាសនា សម្រាប់ព្រះសង្ឃធ្វើនូវសង្ឃកម្មផ្សេងៗ មានកាឋិនកម្មជាដើម ដែលជាបុណ្យមានផល្លានិសង្សច្រើន។

ដូចពុទ្ធវចនៈមួយឃ្លា សុខោ បុញ្ញស្ស ឧច្ចយោ កិរិយាសន្សំនៃបុណ្យ រមែងនាំមកសេចក្ដីសុខ។ដោយកម្មវិធីបុណ្យខាងលើនេះនិងប្រព្រឹត្តទៅនៅថ្ងៃទី ១៦ ខែកុម្ភៈឆ្នាំ ២០២៣ រហូតដល់ថ្ងៃទីថ្ងៃទី ២២ខែឆ្នាំដដែលថ្ងៃខាងមុខនេះទើបបញ្ចប់។កម្មវិធីបុណ្យថ្ងៃព្រហស្បតិ៍ ១១ រោជ ខែមាឃ ឆ្នាំខាលចត្វាស័ក ព.ស ២៥៦៦ ត្រូវនឹងថ្ងៃទី ១៦ ខែកុម្ភៈ ឆ្នាំ ២០២៣ វេលាម៉ោង ១:00 នាទីរសៀល ប្រារព្ធពិធីក្រុងពាលី  វេលាម៉ោង ២:00 រសៀល ប្រារព្ធពិធីដង្ហែដុំនិមិត្តសីមា និងរោងឧបោសថ (ព្រះវិហារថ្មី) ប្រគេនដល់សង្ឃ

វេលាម៉ោង ៣:00 នាទីរសៀល ពិធីស្រោចស្រពសុគន្ធវារី ប្រគេនព្រះភិក្ខុសុវណ្ណបញ្ញា យីនសុវណ្ណា (យ៉ារី) ព្រះគ្រូចៅអធិការវត្តទួលលក្ខរស្មីមានជ័យ (ទួលពង្រ) ឱ្យឡើងទៅជា ព្រះគ្រូសុវណ្ណបញ្ញាមុន្នី តទៅ  វេលាម៉ោង ៤:00 នាទីរសៀល ជួបជុំពុទ្ធបរិស័ទជិតឆ្ងាយទាំងអស់គ្នាដើម្បីធ្វើបទនមស្សកា សមាទានសីល និងនិមន្តព្រះសង្ឃ 

ចម្រើនព្រះបរិត្ត នឹងពុទ្ធាពិសេសព្រះពុទ្ធបដិមាក្នុងព្រះវិហារ ម៉ោង ៥:00 នាទីល្ងាច អញ្ជើញភ្ញៀវកិត្តិយសពិសាភោជនាហារវេលាម៉ោង ៧:00 នាទីយប់ មានបាញ់កាំជ្រួច និងមានចាប៉ីដងវែង ជូនទស្សនាកំសាន្តនាពេលរាត្រី។

ហើយនៅថ្ងៃកម្មវិធីបុណ្យបន្តបន្ទាប់និងមានការសំដែងធម៌ទេសនាគ្រែពីរព្រមទាំងមានការសម្ដែងល្ខោនសិល្បៈនិងការកម្សាន្តផ្សេងៗទៀតរហូតដល់ចប់កម្មវិធីបុណ្យ។ដោយគិតពីថ្ងៃទី ១១ ខែកុម្ភៈឆ្នាំ ២០២៣នេះនៅសល់តែប្រាំថ្ងៃទៀតប៉ុណ្ណោះទើបចាប់ផ្ដើមប្រារព្ធពិធីបុណ្យជាថ្ងៃដំបូង។

អាស្រ័យដូចបានផ្សព្វផ្សាយប្រគេនទូលថ្វាយជូនដំណឹងខាងលើ សូមសម្ដេចទ្រង់ឯកឧត្តម អ្នកឧកញ៉ា លោកឧកញ៉ា លោកជំទាវ លោកស្រីជាពុទ្ធបរិស័ទអញ្ជើញចូលរួមមកលេងកម្សាន្តនិងអនុមោទនាបុណ្យតាមកម្លាំងសទ្ធារៀងៗខ្លួន៕

(សូមអានបន្ត)

ក្រសួងទេសចរណ៍ពង្រឹងការគ្រប់គ្រងមណ្ឌលព័ត៌មានទេសចរណ៍តាមរាជធានី-ខេត្ត ដើម្បីជួយទទួលភ្ញៀវពេលស៉ីហ្គេម

(ភ្នំពេញ)៖ ក្រសួងទេសចរណ៍បានប្រជុំបូកសរុបការងារគ្រប់គ្រងមណ្ឌលព័ត៌មានទេសចរណ៍ ដើម្បីជំរុញ និងពង្រឹងគុណភាពសេវាផ្ដល់ព័ត៌មានទេសចរណ៍តាមមណ្ឌលព័ត៌មានទេសចរណ៍ដែលមាននៅតាមរាជធានី-ខេត្ត សំដៅតម្រង់ទិសឆ្ពោះទៅរកបដិសណ្ឋារកិច្ចល្អក្នុងវិស័យទេសចរណ៍ នាឱកាសកម្ពុជាធ្វើជាម្ចាស់ផ្ទះស៊ីហ្គេម និងអាស៊ានប៉ាវ៉ាហ្គេម ឆ្នាំ២០២៣ខាងមុខ។

កិច្ចប្រជុំនេះធ្វើឡើងក្រោមអធិបតីភាពលោក គុជ បញ្ញាសា រដ្ឋលេខាធិការក្រសួងទេសចរណ៍ និងជាប្រធានក្រុមការងារគ្រប់គ្រងមណ្ឌលព័ត៌មានទេសចរណ៍ នាថ្ងៃទី១០ ខែកុម្ភៈ ឆ្នាំ២០២៣ នៅទីស្តីការក្រសួងទេសចរណ៍ ដោយមានសមាសភាពចូលរួមពីសំណាក់រដ្ឋបាលរាជធានី-ខេត្ត (អភិបាលរងរាជធានីខេត្ត) ប្រធានមន្ទីរទេសចរណ៍ទាំង ២៥ រាជធានី-ខេត្ត និងមន្រ្តីជំនាញក្រសួងទេសចរណ៍ និងផ្នែកឯកជនដែលពាក់ព័ន្ធ។

ក្រោយពីបានស្ដាប់នូវខ្លឹមសាររបាយការណ៍វឌ្ឍនភាពការងារគ្រប់គ្រងមណ្ឌលព័ត៌មានទេសចរណ៍ឆ្នាំ២០២២ និងទិសដៅអនុវត្តន៍បន្ដឆ្នាំ២០២៣ រួចមក អង្គប្រជុំបានធ្វើការពិភាក្សារកធាតុចូលសំខាន់ៗមួយចំនួន និងទទួលបានលទ្ធផលជាវិជ្ជមានដូចខាងក្រោម៖

១-ស្នើឱ្យមានការសហការបន្ថែមពីសំណាក់រដ្ឋបាលរាជធានី-ខេត្តក្នុងការផ្ដល់ទីតាំង និងការគ្រប់គ្រងមណ្ឌលព័ត៌មានទេសចរណ៍តាមស្ដង់ដាមណ្ឌលព័ត៌មានទេសចរណ៍កម្ពុជា ដើម្បីឱ្យមានប្រសិទ្ធភាពក្នុងការបម្រើដល់ភ្ញៀវទេសចរ។

២-បន្ដពង្រឹងគុណភាពមណ្ឌលព័ត៌មានទេសចរណ៍ឱ្យបានល្អប្រសើរស្របតាមតម្រូវការភ្ញៀវទេសចរ និងពង្រីកលទ្ធភាពក្នុងការផ្ដល់ព័ត៌មានទេសចរណ៍ទៅកាន់ភ្ញៀវឱ្យកាន់តែទូលំទូលាយតាមគោលដៅទេសចរណ៍ទាំងអស់។

៣-ពិនិត្យមើលលទ្ធភាពបន្ថែមក្នុងការសាងសង់មណ្ឌលព័ត៌មានទេសចរណ៍ ឬបញ្ជរផ្ដល់ព័ត៌មានទេសចរណ៍ថ្មីៗបន្ថែមទៀត ជាមួយគ្នានេះក៏ត្រូវធ្វើការកែសម្រួល និងជួសជុលមណ្ឌលព័ត៌មានទេសចរណ៍ដែលមានស្រាប់មានលក្ខណៈតាមស្ដង់ដាឡើងវិញ។

៤-បន្ដជំរុញ និងស្វែងរកកិច្ចសហការក្នុងភាពជាដៃគូជាមួយផ្នែកឯកជន PPP(s) ឬស្ថាប័នពាក់ព័ន្ធនានាក្នុងការសាងសង់ និងគ្រប់គ្រងមណ្ឌលព័ត៌មានទេសចរណ៍ ស្របតាមយន្ដការរដ្ឋ និងឯកជន ដើម្បីធានានិរន្តរភាពក្នុងការប្រតិបត្តិការមណ្ឌលព័ត៌មានទេសចរណ៍យូរអង្វែង។ ការសាងសង់នេះទៀតសោត ក៏ត្រូវធ្វើការសិក្សា ដោយបត់បែនតាមទីតាំង និងលទ្ធភាពក្នុងការសង់ពីសំណាក់មន្ទីរទេសចរណ៍រាជធានី-ខេត្ត តែមិនត្រូវចាកឆ្ងាយខុសពីស្ដង់ដាមណ្ឌលព័ត៌មានកម្ពុជាដែលកំពុងមាន។

សូមជម្រាបថា កិច្ចប្រជុំដើម្បីពង្រឹងការងារគ្រប់គ្រងមណ្ឌលព័ត៌មានទេសចរណ៍នេះ ក៏ជាការងារស្នូលសំខាន់មួយដែលអនុវត្តស្របតាមផែនទីចង្អុលផ្លូវស្ដីពីការស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩ ឆ្នាំ២០២០-២០២៥ និងវិធានការគោលនយោបាយជំរុញចលនាទេសចរណ៍ផ្ទៃក្នុងឆ្នាំ២០២១-២០២៣។

លើសពីនេះ ក៏ជាការតម្រង់ទិសឆ្ពោះទៅរកបដិសណ្ឋារកិច្ចល្អក្នុងវិស័យទេសចរណ៍ នាឱកាសកម្ពុជាធ្វើជាម្ចាស់ផ្ទះស៊ីហ្គេមលើកទី៣២ និងអាស៊ានប៉ាវ៉ាហ្គេមលើកទី១២ ឆ្នាំ២០២៣ នាពេលខាងមុខនេះ៕

(សូមអានបន្ត)

សម្តេចតេជោ ហ៊ុន សែន ដឹកនាំគណៈប្រតិភូមាតុភូមិនិវត្តន៍ បន្ទាប់បញ្ចប់ដំណើរទស្សនកិច្ច ប្រកបដោយជោគជ័យខ្ពស់ក្នុងប្រទេសចិន

(ប៉េកាំង, ប្រទេសចិន)៖ បន្ទាប់ពីបញ្ចប់ដំណើរប្រកបដោយជោគជ័យ និងផ្លែផ្កាខ្ពស់លើទឹកដី​ប្រទេស​ចិន សម្តេចតេជោ ហ៊ុន សែន នាយក​រដ្ឋ​មន្ត្រីកម្ពុជា បានដឹកនាំគណៈប្រតិភូអញ្ជើញត្រឡប់មកប្រទេសកម្ពុជាវិញហើយ នៅថ្ងៃសៅរ៍ ទី១១ ខែកុម្ភៈ ឆ្នាំ២០២៣នេះ វេលាម៉ោង ៨៖៤៥នាទីព្រឹកម៉ោងនៅរដ្ឋធានីប៉េកាំង ត្រូវនឹងម៉ោង ៧៖៤៥នាទីព្រឹក ម៉ោងនៅកម្ពុជា។

សម្តេចតេជោ ហ៊ុន សែន បានដឹកនាំគណៈប្រតិភូជាន់ខ្ពស់បំពេញទស្សនកិច្ចនៅក្នុងប្រទេសចិន កាលពីថ្ងៃទី០៩ ខែកុម្ភៈ តបតាមការអញ្ជើញរបស់រដ្ឋាភិបាលចិន។ ដំណើរទស្សនកិច្ចចំខួប ៦៥ឆ្នាំនៃចំណងទំនាក់ទំនងកម្ពុជា-ចិន បើទោះបីមានរយៈពេលខ្លី តែលទ្ធផលទទួលបាន​មាន​កម្រិតខ្ពស់គួរឱ្យកត់សម្គាល់។

ថ្ងៃដំបូងនៃដំណើរទស្សនកិច្ចសម្តេចតេជោ ហ៊ុន សែន បានអនុញ្ញាតឱ្យក្រុមហ៊ុនធំៗ​ផ្នែកសាង​សង់​ហេដ្ឋារចនាសម្ព័ន្ធផ្លូវ និងស្ពានរបស់ចិន ចំនួន ៣ក្រុមហ៊ុនចូលជួបសម្តែងការគួរសម។ ក្រុមហ៊ុនទាំង៣នេះ ជាក្រុមហ៊ុនដែលធ្លាប់ទទួលបានសិទ្ធិក្នុងសាងសង់ផ្លូវ​ និងស្ពាននៅក្នុងប្រទេស​កម្ពុជា ហើយក៏បានសិក្សាលើគម្រោងសាងសង់ហេដ្ឋារចនាសម្ព័ន្ធសំ ខាន់ៗមួយចំនួនទៀត​នៅក្នុង​ប្រទេសកម្ពុជា។

ក្នុងជំនួបនោះថ្នាក់ដឹកនាំក្រុមហ៊ុន បានជម្រាបសម្តេចតេជោ ពីការសាងសង់ និងប្រតិបត្តិការផ្លូវ​ល្បឿន​លឿនភ្នំពេញ-ក្រុងបាវិត ដែលត្រូវបានរៀបចំឡើងក្រោមកិច្ចសន្យាភាពជាដៃគូ រវាងរដ្ឋ និងឯកជន (PPP) ដើម្បីឈានទៅអនុវត្តគម្រោងសាងសង់នៅពាក់កណ្តាលឆ្នាំ២០២៣ និងគ្រោងបញ្ចប់នៅឆ្នាំ២០២៧ ស្របគ្នានិងការសាងសង់ផ្លូវល្បឿនលឿន ហូជីមិញ-ម៉ុកបៃ របស់វៀតណាម ដែលគ្រោងបញ្ចប់ការសាងសង់នៅឆ្នាំ២០២៧។

ក្រុមហ៊ុនវិនិយោគចិនទាំងនោះ ក៏បានជំរាបសម្តេចតេជោនាយករដ្ឋមន្ត្រី ពីការវិនិយោគលើការដឹក​ជញ្ជូនផ្លូវទឹកសាប ការវិនិយោគលើការចម្រោះទឹកកខ្វក់នៅខេត្តព្រះសីហនុ និងការសិក្សាពីផ្លូវ​រថ​ភ្លឿងល្បឿនលឿនភ្នំពេញ-ប៉ោយប៉ែត។ ក្រុមហ៊ុន ក៏បានជម្រាបជូនសម្តេចតេជោពីគម្រោង​នៃការវិនិយោគផ្លូវរថភ្លើងល្បឿនលឿនធន់ស្រាល ពីខេត្តសៀមរាប​ទៅកាន់អាកាសយាន​អន្តរ​ជាតិ​ថ្មីនៅជីក្រែង ក្នុងខេត្តសៀមរាប។

ក្នុងជំនួបនោះ សម្តេចតេជោនាយករដ្ឋមន្ត្រី ក៏បានស្នើឱ្យក្រុមហ៊ុនចិន សិក្សាពីគ្រោងវិនិយោគ​ផ្លូវ​ល្បឿនលឿនធន់ស្រាល ពីរាជធានីភ្នំពេញ ទៅអាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើង​ល្បឿនលឿនធន់ស្រាលក្នុងរាជធានីភ្នំពេញ ដែលកំពុងមានចរាចរណ៍មមាញឹក។

នៅថ្ងៃទីពីរនៃដំណើរទស្សនកិច្ច ពោលគឺនៅថ្ងៃទី១០ ខែកុម្ភៈ សម្តេចតេជោ ហ៊ុន សែន និងគណៈប្រតិភូ បានជួបពិភាក្សាការងារទ្វេភាគីជាមួយមេដឹកនាំកំពូលៗរបស់ចិន រួមមាន លោក ស៊ី ជីនពីង ប្រធានាធិបតីចិន, លោក លី សានស៊ូ (Li Zhanshu) ប្រធានសភាប្រជាជនចិន និងលោក លី ខឺឈាង នាយករដ្ឋមន្ត្រីចិន។

ក្នុងជំនួបទ្វេភាគីរវាងសម្តេចតេជោ និងលោកប្រធានាធិបតីចិន ក៏ដូចជាជំនួបរវាងសម្តេចតេជោ ហ៊ុន សែន និងលោក លី ខឺឈាង បានសម្តែងនូវការពេញចិត្តចំពោះចំណង​មិត្តភាពដ៏រឹងមាំ​រវាង​កម្ពុជា-ចិន ដែលគ្មានកម្លាំងណាមកបំបែកបាន។ ភាគីទាំងពីរ បានបង្ហាញការតាំងចិត្តជាថ្មី​ក្នុង​ការពូនជ្រុំ ពង្រីក និងពង្រឹងចំណងមិត្តភាពដែកថែបឱ្យកាន់តែខ្លាំងក្លាថែមទៀត តាមរយៈការពង្រឹង​ស្មារតីកសាង​ «សហគមន៍តែមួយ ជោគវាសនាតែមួយ» ដោយផ្តោតសំខាន់លើវិស័យចំនួន៦ រួមមាន៖ នយោបាយ និងការទូត, វិស័យសមត្ថភាពផលិត និងវាយភណ្ឌ, កសិកម្ម, ថាមពល,សន្តិសុខ និងទំនាក់ទំនងរវាងប្រជាជន និងប្រជាជន រួមទាំងការលើកកម្ពស់វិស័យ​សុខាភិបាល​នៅកម្ពុជា។

ភាគីទាំងពីរប្រកាសយកឆ្នាំ២០២៣ ដែលជាឆ្នាំខួប៦៥ឆ្នាំនៃទំនាក់ទំនងប្រទេសទាំងពីរនោះ ជាឆ្នាំមិត្តភាព ដោយធ្វើសកម្មភាពនានា ដើម្បីអបអរសាទរខួបទំនាក់ទំនងនេះ។ កម្ពុជា និងចិន ក៏បានដាក់ចេញកិច្ចសហប្រតិបត្តិការថ្មីមួយទៀត ហៅថា «កិច្ចសហប្រតិបត្តិការត្បូងពេជ្រ» ដែលជាកិច្ចសហប្រតិបត្តិការថ្មីមួយទៀត។ កិច្ចសហប្រតិបត្តិការថ្មីនេះ ផ្តោតលើសសរ​ស្តម្ភ​នយោបាយ, ផលិតកម្ម, កសិកម្ម, ថាមពល និងសន្តិសុខ។

ភាគីទាំងពីរ ក៏ឯកភាពបន្តជំរុញការផ្លាស់ប្តូរកម្រិតខ្ពស់គ្រប់ទម្រង់ ដើម្បីការអភិវឌ្ឍទំនាក់​ទំនង​ជា​យុទ្ធសាស្រ្ត និងការជឿជាក់ផ្នែកនយោបាយ។ ភាគីចិន បានប្រកាសជំហរនយោបាយការបរទេសគាំទ្រពេញទំហឹងចំពោះ ១៖ ការជ្រើសរើសមាគ៌ា អភិវឌ្ឍន៍របស់កម្ពុជា ស្របតាមលក្ខខណ្ឌជាតិរបស់ខ្លួន, ២៖ កិច្ចខិតខំប្រឹងប្រែងរបស់កម្ពុជា ក្នុងការការពារអធិបតេយ្យ សន្តិសុខ និងផលប្រយោជន៍អភិវឌ្ឍន៍នានា, ៣៖ ការអភិវឌ្ឍបន្តបន្ទាប់ តាមរបៀបវារៈនយោបាយកម្ពុជា និង៤៖ ប្រឆាំងដាច់ខាតចំពោះ​ការជ្រៀតជ្រែក​ចូលកិច្ចការ​ផ្ទៃ​ក្នុង​របស់កម្ពុជា។

ដោយឡែកកម្ពុជាវិញ បានប្រកាសចេញនូវនយោបាយ ១៖ ប្រកាន់នយោបាយចិនមួយ, ២៖ ប្រឆាំងការជ្រៀតជ្រែកពីខាងក្រៅចូលកិច្ចការផ្ទៃក្នុងរបស់ចិន និង៣៖ គាំទ្រចិន ការពារផល​ប្រយោជន៍​​​ស្នូល ព្រមទាំងការបង្រួបបង្រួមជាតិ។

ក្នុងជំនួបនេះ សម្តេចតេជោ ហ៊ុន សែន បានគាំទ្រគំនិតផ្តួចផ្តើមរបស់លោក ស៊ី ជីនពីង លើការអភិវឌ្ឍន៍កសិកម្ម និងវារីវប្បធម៌នៅតំបន់ជុំវិញបឹងទន្លេសាប ដើម្បីបង្កើតរបៀងមច្ឆជាតិ និងអង្គរនៅភាគពាយ័ព្យរបស់កម្ពុជា។ សម្តេចតេជោ បានសម្រេចបង្កើតប៉ូលសេដ្ឋកិច្ចទី៤ របស់កម្ពុជានៅទិសពាយ័ព្យប្រទេស ដោយគ្របដណ្តប់លើខេត្តពោធិ៍សាត់ បាត់ដំបង បន្ទាយមានជ័យ និងប៉ៃលិន។

ប្រធានាធិបតីចិន លោក ស៊ី ជីនពីង ក៏បានផ្តល់ជំនួយជាង ៤៤លានដុល្លារ សម្រាប់សាងសង់ផ្លូវដែកនៅក្នុងប្រទេសកម្ពុជា។ បន្ថែមពីលើនោះ ប្រទេសទាំងពីរ បានចុះហត្ថលេខាលើឯកសារសំខាន់ៗរហូតដល់ទៅ១២ ដើម្បីពង្រឹងកិច្ចសហប្រតិបត្តិការគ្រប់​ដណ្តប់​លើនយោបាយ សេដ្ឋកិច្ច និងពាណិជ្ជកម្ម។

សម្រាប់ជំនួបជាមួយប្រធានសភាប្រជាជនចិនវិញ សម្តេចតេជោ ហ៊ុន សែន បានស្នើឱ្យមានការពង្រឹងនូវកិច្ចសហប្រតិបត្តិការកាន់តែខ្លាំងថែមទៀត លើស្ថាប័ននីតីបញ្ញត្តិរវាងប្រទេសទាំងពីរ។

ក្រៅតែពីជំនួបខាងលើសម្តេចតេជោ ហ៊ុន សែន បានអញ្ជើញបើក​វេទិកាជំរុញពាណិជ្ជកម្ម វិនិយោគ និងទេសចរណ៍កម្ពុជា-ចិន។ វេទិកានេះ រៀបចំឡើងផ្តោតទៅលើការជំរុញ​ទំនាក់​ទំនង​សេដ្ឋកិច្ច ពាណិជ្ជកម្ម វិនិយោគ និងទេសចរណ៍រវាងកម្ពុជា និងចិន ព្រមទាំងពិភាក្សាអំពីបច្ចុប្បន្ន​ភាពវិស័យសក្តានុពល កាលានុវត្តភាព ក៏ដូចជាគោលនយោបាយលើកទឹកចិត្ត​វិនិយោគ​នៃប្រទេស​ទាំងពីរ។

ក្នុងវេទិកានេះ សម្តេចតេជោនាយករដ្ឋមន្ត្រី បានអំពាវនាវដល់អ្នកវិនិយោគ អ្នកធ្វើធុរកិច្ចរបស់ចិន វិលត្រឡប់មកកាន់កម្ពុជាវិញ ឱ្យដូចមុនពេលជំងឺកូវីដ១៩រាតត្បាត។ សម្តេចតេជោ ហ៊ុន សែន បានប្រកាសគាំពារដល់អ្នកវិនិយោគទាំងនោះ ជាមួយបរិយាកាសវិនិយោគល្អប្រសើរ និងឱកាសទាញផលចំណេញពីនយោបាយពាណិជ្ជកម្មរបស់កម្ពុជា ក៏ដូចជាកិច្ចព្រមព្រៀង​ពាណិជ្ជ​កម្មសេរី ដែលកម្ពុជាបានធ្វើជាមួយប្រទេសនានា។

ក្នុងដំណើរទស្សនកិច្ចនៅប្រទេសចិននាពេលនេះ សម្តេចតេជោ និងគណៈប្រតិភូអញ្ជើញ​ដាក់​កម្រង​ផ្កាគោរពវិញ្ញាណក្ខន្ធ វីរបុរសរបស់ចិន ដែលបានធ្វើពលីកម្មសាច់​ស្រស់ឈាមស្រស់ ក្នុងបុព្វហេតុរំដោះប្រទេស​ពីនឹមអាណា​និគម នៅស្តូបអនុស្សាវរីយ៍​វីរបុរសចិន មុខវិមានធានអានមិន។

ជាមួយអក្សរចារឹកពណ៌មាស នៃការគោរពវិញ្ញាណក្ខន្ធវីរបុរសចិន, សម្តេចតេជោនាយក​រដ្ឋមន្ត្រី និងគណៈប្រតិភូជាន់ខ្ពស់របស់កម្ពុជា បានលំឱនកាយវាចា​ចិត្តគោរពដោយ​ស្មោះ​ស្ម័គ្រ ជូនចំពោះវីរបុរសចិន ដែលបានធ្វើពលីកម្មសាច់ស្រស់ឈាមស្រស់ ក្នុងបុព្វហេតុ​រំដោះជាតិពីអាណានិគម រហូតទទួលបានឯករាជ្យយ៉ាងពេញលេញ រហូតមកដល់បច្ចុប្បន្ន។ ជាពិសេសបានជំរុញល្បឿន​​នៃការអភិវឌ្ឍប្រទេសចិន ក្លាយជាមហាអំណាច​សេដ្ឋកិច្ចធំទី២ នៅលើសាកលលោក៕

(សូមអានបន្ត)

ក្រុមហ៊ុនធំៗចំនួន ៣ របស់ចិន កំពុងពិនិត្យលទ្ធភាពក្នុងការវិនិយោគបន្ថែមទៀតនៅព្រះរាជាណាចក្រកម្ពុជា

ភ្នំពេញ: ថ្ងៃទី០៩ ខែកុម្ភៈ ឆ្នាំ២០២៣ ក្រុមហ៊ុនវិនិយោគធំៗចំនួនបី របស់សាធារណរដ្ឋប្រជាមានិតចិន រួមមានក្រុមហ៊ុនសាងសង់គមនាគមន៍ចិន ក្រុមហ៊ុនសាជីវកម្មស្ពានថ្នល់ចិន និងក្រុមហ៊ុន China Metro Group Limited បានសម្តែងនូវការចាប់អារម្មណ៍ក្នុងការបន្តវិនិយោគលើការសាងសង់ហេដ្ឋារចនាសម្ព័ន្ធគមនាគមន៍នៅក្នុងព្រះរាជាណាចក្រកម្ពុជា បន្ទាប់ពីក្រុមហ៊ុនទាំងនោះបានវិនិយោគលើការសាងសង់ផ្លូវស្ពានប្រមាណជាង ២ពាន់គីឡូម៉ែត្រ ក្នុងប្រទេសកម្ពុជា នារយៈពេលកន្លងមក។

យោងតាមអ្នកឆ្លើយឆ្លងព័ត៌មានពិសេសរបស់ទូរទស្សន៍ជាតិកម្ពុជា ក្រុមហ៊ុនធំៗទាំងបី បានធ្វើការបញ្ជាក់បែបនេះ ខណៈដែលថ្នាក់ដឹកនាំក្រុមហ៊ុនត្រូវបានអនុញ្ញាតឱ្យចូលជួបសម្តែងការគួរសម ជាមួយនឹង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នារសៀលថ្ងៃទី០៩ ខែកុម្ភៈ ឆ្នាំ២០២៣នេះ នៅរដ្ឋធានីប៉េកាំង ក្នុងឱកាសដែលសម្តេចតេជោ ដឹកនាំគណៈប្រតិភូជាន់ខ្ពស់ អញ្ជើញទៅបំពេញទស្សនកិច្ចផ្លូវការនៅប្រទេសចិនរយៈពេល០៣ថ្ងៃ។

សូមបញ្ជាក់ថាក្រុមហ៊ុនសាងសង់គមនាគមន៍ចិន និងក្រុមហ៊ុនសាជីវកម្មស្ពានថ្នល់ចិន គឺជាក្រុមហ៊ុនវិស្វកម្មចិននាំមុខ លើវិស័យហេដ្ឋារចនាសម្ព័ន្ធដឹកជញ្ជូនរួមមាន ការសិក្សាប្លង់ ការសាងសង់ហេដ្ឋារចនាសម្ព័ន្ធដឹកជញ្ជូន ការស្តារផ្លូវទឹក ការផលិតគ្រឿងចក្រធន់ធ្ងន់ និងសេវាកម្មអាហរណ៍ នីហរ័ណ។

នៅក្នុងកិច្ចពិភាក្សាគ្នានោះ ក្រុមហ៊ុនចិនទាំងបី បានជម្រាបជូន សម្តេចតេជោនាយករដ្ឋមន្រ្តី ពីការសាងសង់ និងដាក់ឱ្យប្រតិបត្តិផ្លូវល្បឿនលឿន ភ្នំពេញ-បាវិត ដែលត្រូវបានរៀបចំឡើងក្រោមកិច្ចសន្យាភាពជាដៃគូ រវាងរដ្ឋ និងឯកជន (Public-Private Partnerships) ដើម្បីឈានទៅការអនុវត្តគម្រោងសាងសង់ផ្លូវល្បឿនលឿនភ្នំពេញ-បាវិត នៅពាក់កណ្តាលឆ្នាំ២០២៣ និងគ្រោងបញ្ចប់នៅឆ្នាំ២០២៧ ស្របគ្នានឹងការសាងសង់ផ្លូវល្បឿនលឿន ហូជីមិញ-ម៉ុកបៃ ដែលគ្រោងនឹងបញ្ចប់ការសាងសង់នៅឆ្នាំ២០២៧។

ជាមួយនឹងទិសដៅនៃការវិនិយោគ តំណាងក្រុមហ៊ុនចិន បានជម្រាបជូន សម្តេចតេជោនាយករដ្ឋមន្រ្តី បអំពីគម្រោងវិនិយោគលើការដឹកជញ្ជូនផ្លូវទឹកសាប ការវិនិយោគលើការចម្រាញ់ទឹកកខ្វក់នៅខេត្តព្រះសីហនុ និងការសិក្សាពីផ្លូវរថភ្លឿងល្បឿនលឿនភ្នំពេញ-ប៉ោយប៉ែត និងគម្រោងនៃការវិនិយោគផ្លូវរថភ្លើងល្បឿនលឿនធុនស្រាល ពីខេត្តសៀមរាបទៅកាន់អាកាសយានអន្តរជាតិសៀមរាប-អង្គរថ្មី នៅស្រុកជីក្រែង ក្នុងខេត្តសៀមរាប។

ជាកិច្ចឆ្លើយតប សម្តេចតេជោ នាយករដ្ឋមន្រ្តី បានសម្ដែងនូវការវាយតម្លៃខ្ពស់ ចំពោះក្រុមហ៊ុនវិនិយោគទាំងបី ដែលបានប្តេជ្ញារួមគ្នាក្នុងការវិនិយោគហេដ្ឋារចនាសម្ព័ន្ធផ្លូវប្រកបដោយគុណភាព នៅកម្ពុជាសម្រាប់ពេលខាងមុខ។ ទាក់ទិនទៅនឹងការវិនិយោគផ្លូវរថភ្លើងល្បឿនលឿនធុនស្រាល សម្តេចតេជោនាយករដ្ឋមន្រ្តី បានស្នើឱ្យក្រុមហ៊ុន China Metro Group Limited សិក្សាពីគម្រោងវិនិយោគផ្លូវល្បឿនលឿនធុនស្រាល ពីរាជធានីភ្នំពេញទៅកាន់អាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើងល្បឿនលឿនធុនស្រាលក្នុងរាជធានីភ្នំពេញ ដែលកំពុងមានចរាចរណ៍យ៉ាងមមាញឹក។

ជាមួយគ្នានេះ ក្រុមហ៊ុនវិនិយោគទាំងបីរបស់ប្រទេសចិន ក៏បានលើកឡើង ពីគម្រោងក្នុងការសិក្សាលើលទ្ធភាពវិនិយោគថ្មីៗ ក្នុងប្រទេសកម្ពុជាសម្រាប់ពេលខាងមុខ ពិសេសក្រោយលទ្ធផលនៃដំណើរទស្សនកិច្ចផ្លូវការរបស់ សម្តេចតេជោនាយករដ្ឋមន្រ្តី នៅរដ្ឋធានីប៉េកាំង សាធារណរដ្ឋប្រជាមានិតចិន នាពេលនេះ។

នៅក្នុងកិច្ចពិភាក្សាគ្នានោះដែរ ក្រុមហ៊ុនចិន បានជម្រាបជូនសម្តេចតេជោ ពីការបញ្ចប់ការសិក្សាសមិទ្ធិលទ្ធភាពគម្រោងសាងសង់ផ្លូវរថភ្លើងក្រោមដី នៅរាជធានីភ្នំពេញ និងបានដាក់បញ្ចូននូវរបាយការណ៍សិក្សាជូនក្រសួងសាធារណការ និងដឹកជញ្ជូន ដើម្បីពិនិត្យ និងពិភាក្សាបន្ត រួមជាមួយនឹងគម្រោងដឹកជញ្ជូនផ្លូវទឹក និងកំពង់ផែ ដែលក្នុងនោះក្រុមហ៊ុនបានបញ្ចប់ការសិក្សាបឋមគម្រោងស្តារផ្លូវទឹកទន្លេសាប ភ្នំពេញ-សៀមរាប ដែលបានប្រគល់ជូនក្រសួងសាធារណការ និងដឹកជញ្ជូនរួចរាល់ហើយដែរ។

ដោយឡែកសម្រាប់គម្រោងអភិវឌ្ឍន៍ប្រព័ន្ធទឹកកខ្វក់ ក្រុមហ៊ុនបាននិងកំពុងសិក្សាផែនការមេ និងសមិទ្ធិលទ្ធភាពដំបូងសម្រាប់អភិវឌ្ឍន៍ហេដ្ឋារចនាសម្ព័ន្ធបណ្តាញលូសំណង់ស្ថានីយ៍ប្រព្រឹត្តកម្មទឹកកខ្វក់ នៅក្រុងខេមរភូមិន្ទ ខេត្តកោះកុង ក្រុងបាត់ដំបង និងក្រុងកំពង់ចាម។ ជាមួយគ្នានេះ ក្រុមហ៊ុនទាំងបី ក៏បានជម្រាបជូនសម្តេចតេជោ ពីការជួយសាងសង់អគារវិទ្យាស្ថានសម្តេចតេជោសែន សាធារណការ និងដឹកជញ្ជូន ០១ខ្នង កម្ពស់០៤ជាន់ ដែលរួមមានបន្ទប់សិក្សា ការិយាល័យរដ្ឋបាល មន្ទីរពិសោធន៍ និងការបំពាក់សម្ភារសិក្សា និងឧបករណ៍បច្ចេកទេសពិសោធន៍ទំនើបៗ ដែលបានចំណាយថវិកាសរុបប្រមាណ ២លាន៥សែនដុល្លាអាមេរិក។

បន្ថែមពីនេះក្រុមហ៊ុនសាជីវកម្មស្ពាន និងថ្នល់ចិន ក៏បានផ្តល់ថវិកាប្រមាណ ២លានដុល្លាអាមេរិក ដើម្បីជួយសាងសង់អគារមន្ទីរពេទ្យតេជោសែនកោះធំ ស្ថិតនៅស្រុកកោះធំ ខេត្តកណ្តាល។

ជាចុងក្រោយក្រុមហ៊ុនចិនទាំងបីនេះ ក៏បានសុំការគាំទ្រពីសម្តេចតេជោ ចំពោះការវិនិយោគលើហេដ្ឋារចនាសម្ព័ន្ធដែលក្រុមហ៊ុនបានសិក្សារួច ដើម្បីឱ្យគម្រោងទាំងនោះប្រព្រឹត្តទៅដោយជោគជ័យបំផុត៕

(សូមអានបន្ត)

កាកបាទក្រហមកម្ពុជា ចុះផ្ដល់អំណោយសម្រាលការលំបាករបស់ប្រជាពលរដ្ឋនៅតំបន់ដាច់ស្រយាល ជាង១ពាន់គ្រួសារ ក្នុងខេត្ដមណ្ឌលគិរី

(មណ្ឌលគិរី)៖ កាកបាទក្រហមកម្ពុជា ដែលមាន ហ្លួងម៉ែ នរោត្ដម មុនិនាថ សីហនុ ជាព្រះប្រធានកិត្ដិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន នៅថ្ងៃទី៩ ខែកុម្ភៈ ឆ្នាំ២០២៣នេះ បានរៀបចំពិធីជួបសំណេះសំណាល សួរសុខទុក្ខ និងចែកអំណោយមនុស្សធម៌ជូនប្រជាពលរដ្ឋងាយរងគ្រោះបំផុតចំនួន ១,០៧០គ្រួសារ (ក្នុងនោះមានជនជាតិដើមភាគតិច ៩១០គ្រួសារ) រស់នៅតំបន់ឆ្ងាយដាច់ស្រយាល ក្នុងស្រុកកោះញែក និងស្រុកអូររាំង ខេត្តមណ្ឌលគិរី។

(សូមអានបន្ត)

រដ្ឋមមន្ត្រីក្រសួងបរិស្ថានចាត់ទុកតំបន់អាស៊ីប៉ាស៊ីហ្វិកជាតំបន់ដែលមានការរីកចម្រើនខ្លាំងគួរឱ្យកត់សម្គាល់ ប៉ុន្តែក៏សង្កេតឃើញមានការកើនឡើងកាកសំណល់យ៉ាងខ្លាំង

 សៀមរាប ថ្ងៃទី០៩ ខែកុម្ភៈ ឆ្នាំ២០២៣ ឯកឧត្តម សាយ សំអាល់ រដ្ឋមន្រ្តី ក្រសួងបរិស្ថាន បានលើកឡើងថា តំបន់អាស៊ីប៉ាស៊ីហ្វិកជាតំបន់ដែលមានការរីកចម្រើនខ្លាំង គួរឱ្យកត់សម្គាល់ក្នុងពិភពលោក ប៉ុន្តែយើងក៏សង្កេតឃើញមានការកើនឡើងកាកសំណល់យ៉ាងខ្លាំង រួមទាំងសំណល់ប្លាស្ទិកផងដែរ បញ្ហានេះតម្រូវឱ្យយើង ត្រូវខិតខំប្រឹងប្រែងរួមគ្នាដោះស្រាយបញ្ហានេះ ប្រកបដោយប្រសិទ្ធភាព ។ ការលើកឡើងរបស់ឯកឧត្ដមរដ្ឋមន្រ្ដីនេះ នៅក្នុងពិធីពិសារអាហារពេលល្ងាចស្វាគមន៍ថ្នាក់រដ្ឋមន្រ្តី និងគណៈប្រតិភូទាំង៣៨ប្រទេស នៅក្នុងកិច្ចប្រជុំកម្រិតខ្ពស់ថ្នាក់តំបន់អាស៊ី និងប៉ាស៊ីហ្វិកលើកទី១១ ស្តីពី 3R និងសេដ្ឋកិច្ចចក្រា នារាត្រីថ្ងៃទី០៨ ខែកុម្ភៈ ឆ្នាំ២០២៣ នៅខេត្តសៀមរាប ។

ឯកឧត្តម សាយ សំអាល់ បានមានប្រសសាសន៍ថា នៅក្នុងពីរទស្សវត្សរ៍ ចុងក្រោយនេះ ដោយសារសុខសន្តិភាព ស្ថិរភាពនយោបាយ កម្ពុជាសម្រេចបានការកើនឡើងនៃសេដ្ឋកិច្ចគួរអោយកត់សំគាល់ប្រមាណ ៧ភាគរយ ជាមធ្យម ជារៀងរាល់ឆ្នាំ ប៉ុន្តែយើងទើបតែត្រូវបានរាំងស្ទះដោយសារការផ្ទុះនៃជំងឺកូវីដ១៩។ ឯកឧត្ដមរដ្ឋមន្រ្ដីបញ្ជាក់ថា បើទោះបីជាវិបត្តិសកលនេះបណ្តាលអោយសេដ្ឋកិច្ចប្រទេសទាំងអស់ជុំវិញពិភពលោកធ្លាក់ចុះក៏ពិតមែន ប៉ុន្តែកម្ពុជាបានគ្រប់គ្រងស្ថានភាព និងការស្តារឡើងវិញ នូវសកម្មភាពសេដ្ឋកិច្ចយ៉ាងឆាប់រហ័ស លើសពីការរំពឹងទុក ។

ឯកឧត្ដមបានថ្លែងថា៖ «នេះជាឱកាសដ៏ល្អបំផុតដែលយើងបានយកវេទិកានេះមកពិភាក្សាគ្នា ចែករំលែកចំណេះដឹង និងបទពិសោធន៍ល្អពីគ្នាទៅវិញទៅមកក៏ដូចជា ចំណេះដឹងតាមបែបវិទ្យាសាស្រ្តថ្មីៗ ដែលជាធាតុចូលមួយដ៏សំខាន់ សម្រាប់ការវាយតម្លៃជាគន្លឹះ ផ្តល់ជាជម្រើសដ៏សមស្របសម្រាប់យើងទាំងអស់គ្នាពិចារណាឡើងវិញនូវវិធានការគោលនយោបាយរបស់យើង។ ឆ្លើយតបទៅនឹងបញ្ហាបន្ទាន់ និងអាទិភាពដើម្បីធានាបាននូវការគ្រប់គ្រងសំណល់ប្រកបដោយសុវត្ថិភាពបរិស្ថាន ការបន្ស៊ាំទៅនឹងការប្រែប្រួលអាកាសធាតុ និងការរីកចម្រើនសេដ្ឋកិច្ចប្រកបដោយបរិយាប័ន្ននៅក្នុងតំបន់របស់យើង»។

ឯកឧត្ដមរដ្ឋមន្រ្ដីក៏បានអះអាងផងថា តាមរយៈលទ្ធផល នៃវេទិកាដ៏មានសារៈសំខាន់នៅថ្ងៃនេះ យើងសង្ឃឹមយ៉ាងមុតមាំថា យើងនឹងឆ្ពោះទៅរកការធ្វើអោយប្រសើរឡើងការគ្រប់គ្រងសំណល់ និងការបំពុលប្រភពធនធានសេដ្ឋកិច្ចវិលជុំ និងធនធានធម្មជាតិកកើតឡើងវិញ ដើម្បីឆ្ពោះទៅសង្គមគ្មានសំណល់ និងគោលដៅអភិវឌ្ឍន៍ប្រកបដោយចីរភាព ៕ដោយ៖ ប៊ុនរិទ្ធ និង រិទ្ធី, ផ្សាយដោយ៖ dara

(សូមអានបន្ត)

រដ្ឋមមន្ត្រីក្រសួងបរិស្ថានចាត់ទុកតំបន់អាស៊ីប៉ាស៊ីហ្វិកជាតំបន់ដែលមានការរីកចម្រើនខ្លាំងគួរឱ្យកត់សម្គាល់ ប៉ុន្តែក៏សង្កេតឃើញមានការកើនឡើងកាកសំណល់យ៉ាងខ្លាំង

 សៀមរាប ថ្ងៃទី០៩ ខែកុម្ភៈ ឆ្នាំ២០២៣ ឯកឧត្តម សាយ សំអាល់ រដ្ឋមន្រ្តី ក្រសួងបរិស្ថាន បានលើកឡើងថា តំបន់អាស៊ីប៉ាស៊ីហ្វិកជាតំបន់ដែលមានការរីកចម្រើនខ្លាំង គួរឱ្យកត់សម្គាល់ក្នុងពិភពលោក ប៉ុន្តែយើងក៏សង្កេតឃើញមានការកើនឡើងកាកសំណល់យ៉ាងខ្លាំង រួមទាំងសំណល់ប្លាស្ទិកផងដែរ បញ្ហានេះតម្រូវឱ្យយើង ត្រូវខិតខំប្រឹងប្រែងរួមគ្នាដោះស្រាយបញ្ហានេះ ប្រកបដោយប្រសិទ្ធភាព ។ ការលើកឡើងរបស់ឯកឧត្ដមរដ្ឋមន្រ្ដីនេះ នៅក្នុងពិធីពិសារអាហារពេលល្ងាចស្វាគមន៍ថ្នាក់រដ្ឋមន្រ្តី និងគណៈប្រតិភូទាំង៣៨ប្រទេស នៅក្នុងកិច្ចប្រជុំកម្រិតខ្ពស់ថ្នាក់តំបន់អាស៊ី និងប៉ាស៊ីហ្វិកលើកទី១១ ស្តីពី 3R និងសេដ្ឋកិច្ចចក្រា នារាត្រីថ្ងៃទី០៨ ខែកុម្ភៈ ឆ្នាំ២០២៣ នៅខេត្តសៀមរាប ។

ឯកឧត្តម សាយ សំអាល់ បានមានប្រសសាសន៍ថា នៅក្នុងពីរទស្សវត្សរ៍ ចុងក្រោយនេះ ដោយសារសុខសន្តិភាព ស្ថិរភាពនយោបាយ កម្ពុជាសម្រេចបានការកើនឡើងនៃសេដ្ឋកិច្ចគួរអោយកត់សំគាល់ប្រមាណ ៧ភាគរយ ជាមធ្យម ជារៀងរាល់ឆ្នាំ ប៉ុន្តែយើងទើបតែត្រូវបានរាំងស្ទះដោយសារការផ្ទុះនៃជំងឺកូវីដ១៩។ ឯកឧត្ដមរដ្ឋមន្រ្ដីបញ្ជាក់ថា បើទោះបីជាវិបត្តិសកលនេះបណ្តាលអោយសេដ្ឋកិច្ចប្រទេសទាំងអស់ជុំវិញពិភពលោកធ្លាក់ចុះក៏ពិតមែន ប៉ុន្តែកម្ពុជាបានគ្រប់គ្រងស្ថានភាព និងការស្តារឡើងវិញ នូវសកម្មភាពសេដ្ឋកិច្ចយ៉ាងឆាប់រហ័ស លើសពីការរំពឹងទុក ។

ឯកឧត្ដមបានថ្លែងថា៖ «នេះជាឱកាសដ៏ល្អបំផុតដែលយើងបានយកវេទិកានេះមកពិភាក្សាគ្នា ចែករំលែកចំណេះដឹង និងបទពិសោធន៍ល្អពីគ្នាទៅវិញទៅមកក៏ដូចជា ចំណេះដឹងតាមបែបវិទ្យាសាស្រ្តថ្មីៗ ដែលជាធាតុចូលមួយដ៏សំខាន់ សម្រាប់ការវាយតម្លៃជាគន្លឹះ ផ្តល់ជាជម្រើសដ៏សមស្របសម្រាប់យើងទាំងអស់គ្នាពិចារណាឡើងវិញនូវវិធានការគោលនយោបាយរបស់យើង។ ឆ្លើយតបទៅនឹងបញ្ហាបន្ទាន់ និងអាទិភាពដើម្បីធានាបាននូវការគ្រប់គ្រងសំណល់ប្រកបដោយសុវត្ថិភាពបរិស្ថាន ការបន្ស៊ាំទៅនឹងការប្រែប្រួលអាកាសធាតុ និងការរីកចម្រើនសេដ្ឋកិច្ចប្រកបដោយបរិយាប័ន្ននៅក្នុងតំបន់របស់យើង»។

ឯកឧត្ដមរដ្ឋមន្រ្ដីក៏បានអះអាងផងថា តាមរយៈលទ្ធផល នៃវេទិកាដ៏មានសារៈសំខាន់នៅថ្ងៃនេះ យើងសង្ឃឹមយ៉ាងមុតមាំថា យើងនឹងឆ្ពោះទៅរកការធ្វើអោយប្រសើរឡើងការគ្រប់គ្រងសំណល់ និងការបំពុលប្រភពធនធានសេដ្ឋកិច្ចវិលជុំ និងធនធានធម្មជាតិកកើតឡើងវិញ ដើម្បីឆ្ពោះទៅសង្គមគ្មានសំណល់ និងគោលដៅអភិវឌ្ឍន៍ប្រកបដោយចីរភាព ៕ដោយ៖ ប៊ុនរិទ្ធ និង រិទ្ធី, ផ្សាយដោយ៖ dara

(សូមអានបន្ត)