ក្រសួងសុខាភិបាល និងអង្គការដៃគូចែករំលែកបទពិសោធន៍ដល់គ្រូពេទ្យកុមារ ក្នុងការថែទាំព្យាបាលជំងឺភ្នែកកុមារ និងទារក ឱ្យទាន់ពេលវេលា បញ្ចៀសឱ្យបាននូវភាពពិការភ្នែក

(ភ្នំពេញ)៖ ក្រសួងសុខាភិបាល និងអង្គការដៃគូ នៅថ្ងៃទី១២ ខែឧសភា ឆ្នាំ២០២៣នេះ បានរៀបចំសិក្ខាសាលាស្តីពី «ការយល់ដឹងអំពីសុខភាពភ្នែកកុមារនិងទារក» ដើម្បីអប់រំ និងផ្តល់ព័ត៌មាន ដល់គ្រូពេទ្យកុមារ គិលានុប្បដ្ឋាក-យិកា និងមន្រ្តីសុខាភិបាល អំពីពិការភាពធ្ងន់ធ្ងរនៃជំងឺភ្នែករបស់កុមារ និងទារក ដែលអាចជៀសវាងបាន និងការបញ្ជូនមកសង្គ្រោះ និងព្យាបាលឱ្យបានទាន់ពេលវេលា។

សិក្ខាសាលានេះបានរៀបចំឡើងក្រោមអធិបតីភាព លោកសាស្រ្តាចារ្យ ស៊ា ហួង រដ្ឋលេខាធិកាក្រសួងសុខាភិបាល, លោក អានដ្រេស សីប្រាស ( Mr Andreas Zurbrugg) ឯកអគ្គរាជទូតរង អូស្ត្រាលីប្រចាំកម្ពុជា, លោក សិត សំអាត មន្ត្រីប្រចាំប្រទេសរបស់អង្គការ Sight For All កម្ពុជា-ឡាវ, សាស្រ្តាចារ្យ ងី ម៉េង ទីប្រឹក្សាក្រសួងសុខាភិបាល ប្រធានកម្មវិធីជាតិសុខភាពភ្នែក និងជានាយក មន្ទីរពេទ្យមិត្តភាពខ្មែរ-សូវៀត និងមន្ដ្រីសុខាភិបាលជាច្រើនរូបទៀត។

លោកសាស្រ្តាចារ្យ ស៊ា ហួង បានឱ្យដឹងថា ជាងពីរទសវត្សកន្លងមកនេះ រាជរដ្ឋាភិបាលកម្ពុជាបានបន្តខិតខំប្រឹងប្រែងយ៉ាងខ្លាំងក្លាក្នុងការពង្រឹងគុណភាព និងពង្រីកវិសាលភាពសុខភាពភ្នែក ក្រោមគោលនយោបាយសមធម៌សុខភាពសាធារណៈរបស់ក្រសួងសុខាភិបាល តាមរយៈកម្មវិធីជាតិសុខភាពភ្នែក។

លោកសាស្ដ្រាចារ្យបន្ដថា កិច្ចប្រឹងប្រែងនេះបានសង្កេតឃើញថាសមត្ថភាពគ្រប់គ្រង និងបង្ការភាពពិការភ្នែកមានការរីកចម្រើនកាន់តែប្រសើរឡើង។ ការប្រើប្រាស់សេវាថែទាំសុខភាពភ្នែក ក៏មានការកើនឡើង ហើយសេវាសុខភាពភ្នែកត្រូវបានដាក់បញ្ចូលទៅក្នុងប្រព័ន្ធថែទាំសុខភាពនៅគ្រប់កម្រិតទាំងអស់។

ជាលទ្ធផលអត្រាប្រេវ៉ាឡង់នៃភាពពិការភ្នែក ក្នុងចំណោមប្រជាជនទូទៅបានធ្លាក់ចុះពី ១,២% ក្នុងឆ្នាំ១៩៩៥ មក ០,៣៨% ក្នុងឆ្នាំ២០០៧ ហើយបានបន្តធ្លាក់ចុះមកត្រឹម ០,៣៧% នៅឆ្នាំ ២០១៩។ ជំងឺត្រាក់កូមមិនមែនជាបញ្ហាសុខភាពសាធារណៈទៀតទេ ហើយជំងឺខ្វាក់មាន់ដែលបណ្តាលមកពីកង្វះជីវជាតិអាត្រូវបានលុបបំបាត់នៅកម្ពុជា។ «តាងនាមឱ្យក្រសួងសុខាភិបាល និងខ្លួនខ្ញុំផ្ទាល់ ខ្ញុំសូមអរគុណ និងកោតសសើរចំពោះកម្មវិធីជាតិសុខភាពភ្នែក ដៃគូអភិវឌ្ឍន៍ និងអង្គការមិនមែនរដ្ឋាភិបាល ដែលបានខិតខំធ្វើឱ្យកម្មវិធីសុខភាពភ្នែកទទួលបានលទ្ធផលល្អប្រសើរនេះ»។ នេះបើតាមការបញ្ជាក់របស់លោក។

លោកសាស្រ្តាចារ្យ ស៊ា ហួង បន្ថែមថា ថ្ងៃនេះបានមកជួបប្រជុំគ្នា ក្នុងសិក្ខាសាលា «ការយល់ដឹងអំពីសុខភាពភ្នែកកុមារ និងទារក» ជាសិក្ខាសាលាមួយដ៏មានសារៈសំខាន់ ។ «ខ្ញុំសង្ឃឹមយ៉ាងមុតមាំថាអ្នកចូលរួមទាំងអស់នឹងទទួលបាននូវចំណេះដឹងថ្មីស្តីពី ពិការភាពធ្ងន់ធ្ងរនៃជំងឺភ្នែករបស់កុមារ និងទារកដែលអាចជៀសវាងបាន និងចូលរួមស្វែងរកដំណោះស្រាយដើម្បីជួយបញ្ជូនកុមារ និងទារកអ្នកដែលមានបញ្ហាភ្នែកធ្ងន់ធ្ងរឱ្យទៅរកសេវាឯកទេសទាន់ពេលវេលា ហើយនេះក៏ជាការចូលរួមការអនុវត្តយុទ្ធសាស្ត្រជាតិលើកទី៣សម្រាប់ការបង្ការ និងត្រួតពិនិត្យភាពពិការភ្នែកឆ្នាំ២០២១-២០៣០ ដែលវាជាការចាំបាច់ខ្លាំងណាស់ដើម្បីធានាលើការពង្រឹងគុណភាព និងពង្រីកវិសាលភាពសុខភាពភ្នែកទូទាំងកម្ពុជា ឈានទៅរកការកាត់បន្ថយអត្រាប្រេវ៉ាឡង់នៃភាពពិការភ្នែកមកត្រឹម ០,៣៥% នៅឆ្នាំ២០៣០»។

ក្នុងឱកាសនោះ លោកសាស្ដ្រាចារ្យ ងី ម៉េង បានថ្លែងផងដែរថា កម្មវិធីជាតិសុខភាពភ្នែករៀបចំសិក្ខាសាលានេះឡើង ក៏ដើម្បីកំណត់លក្ខខណ្ឌឱ្យបានត្រឹមត្រូវសម្រាប់អ្នកដែលផ្តល់សេវាថែទាំសុខភាពភ្នែកបឋម ដោយរាប់បញ្ជូលទាំងគិលានុបដ្ឋាក-យិកា និងបុគ្គលិកថែទាំសុខភាពសហគមន៍ ដែលតម្រូវឱ្យមានការបណ្តុះបណ្តាលជាក់លាក់ ស្តីអំពីសុខភាពភ្នែកកុមារ និងទារក ដើម្បីលើកស្ទួយសេវាបញ្ជូន និងការថែទាំភ្នែកកុមារ និងទារកឱ្យកាន់តែប្រសើរឡើង។

លោកសាស្ដ្រាចារ្យ ងី ម៉េង «ក្រោយបញ្ចប់សិក្ខាសាលានេះ ថ្ងៃនេះយើងនឹងឈានជំហានថ្មីមូយទៀត ដែលបានមកជួបជុំគ្នាចែករំលែកបទពិសោធន៍ ស្វែងយល់បន្ថែមស្តីពីជំងឺភ្នែកកុមារនិងទារក នឹងចូលរួមសហការ ដើម្បីធ្វើយ៉ាងណាបញ្ជូនកុមារ និងទារក ដែលមានជំងឺភ្នែកធ្ងន់ធ្ងរមកព្យាបាលដោយអ្នកឯកទេសភ្នែកកុមារ និងទារកឱ្យទាន់ពេលវេលា ដើម្បីបញ្ចៀសឱ្យបាននូវភាពពិការភ្នែក»។

ក្នុងសិក្ខាសាលានោះ លោក សិត សំអាត បានបង្ហាញថា ជារៀងរាល់ពេលដែលលោកបានទៅបន្ទប់ពិនិត្យ និងព្យាបាលកុមារនិងទារក លោកសង្កេតឃើញបញ្ហាភ្នែកផេ្សងៗគ្នារបស់កុមារ និងទារកដ ដូចជា៖

*កុមារខ្លះធ្វើភ្នែកព្រឹមៗពេលសម្លឹងវត្ថុអ្វីមួយ និងមើលជិតនិងឆ្ងាយមិនច្បាស់

*កុមារមានភ្នែកស្រលៀងចេញក្រៅ និងស្រលៀងចូលក្នុង (ហៅថាភ្នែកស្រលៀង)

*កុមារខ្លះគំហើញថយចុះ កូនក្រមុំឡើងពណ៌សជាភ្នែកឡើងបាយពីកំណើត

*កុមារខ្លះខ្លាចពន្លឺថ្ងៃខ្លាំង កញ្ចក់ភ្នែកធំ គ្រាប់ភ្នែករីកធំ ទឹកដកក្នុងភ្នែកពីកំណើត

*ក្មេងខ្លះរបួសធ្លាយគ្រាប់ភ្នែក និងក្មេងខ្លះរបួសគ្រាំគ្រាប់ភ្នែក

*ទារកខ្លះកើតមិនគ្រប់ខែ ជំងឺសរសៃបាតភ្នែកទារក

*ទារកខ្លះភ្នែកក្រហមពីកំណើត Opththalmianeonatorum៕

(សូមអានបន្ត)

កីឡាការិនីខ្មែរដំបូង ឈ្នះមេដាយមាសលើវិញ្ញាសា ហែលទឹក និងមេដាយសំរឹទ្ធ១

    ភ្នំពេញ :ថ្ងៃទី១៣ ខែឧសភា ឆ្នាំ២០២៣ កីឡាការិនី កាំង មុយនីន ជាកីឡាការិនីខ្មែរដំបូង ដែលបានឈ្នះមេដាយមាស ប្រភេទ វិញ្ញាសា ហែលទឹក ៤០០ម៉ែត្រ Bi Fins ពាក់ជើងទា ខណៈកីឡាការិនី ឃឺន ប៊ុនពេជ្រមរកត ក៏ដណ្តើមបានមេដាយសំរឹទ្ធមួយគ្រឿងទៀតដែរ នៅក្នុងព្រឹត្តិការណ៍ ប្រកួតកីឡាអាស៊ីអាគ្នេយ៍លើកទី៣២ កាលពីរសៀលថ្ងៃទី១២ ខែឧសភា ឆ្នាំ២០២៣ នៅពហុកីឡដា្ឋនជាតិមរតកតេជោ។

ក្នុងថ្ងៃដដែលនេះដែរ កីឡាករជម្រើសជាតិហែលទឹកពាក់ជើងទាកម្ពុជា ចំនួន ០៤រូបទៀត បានឈ្នះមេដាយសំរឹទ្ធ លើប្រភេទវិញ្ញាសា ហែល 4x200m Surface Relay ក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣នេះផងដែរ។

កីឡាករជម្រើសជាតិទាំងបួនរូបនោះរួមមាន ៖ កីឡាករ លឹម សុខវឌ្ឍន៍នន្ទ កីឡាករ ទួន ទិត្យសត្យា កីឡាករ លឹម កែវឧត្តម និងកីឡាករ ឆោម ច័ន្ទថន។

សូមរម្លឹកដែរថា កាលពីថ្ងៃទី១១ ខែឧសភា ឆ្នាំ២០២៣ កីឡាករ ឈុន ប៊ុនថន ក៏បានឈ្នះមេដាយមាសដំបូងដែរពីប្រភេទកីឡាអត្តពលកម្ម វិញ្ញាសារត់ចម្ងាយ ៨០០ម៉ែត្រ ដែលកម្ពុជាមិនធ្លាប់ឈ្នះមេដាយពីការប្រកួតកីឡាពីរប្រភេទនេះពីមុននោះទេ ហើយកីឡាហែលទឹក និងអត្តពលកម្ម គឺជាកីឡាគោលនៃកីឡាអូឡាំពិក៕ដោយ៖dara

(សូមអានបន្ត)

សម្ដេចក្រឡាហោម សម្ពោធដាក់ឱ្យប្រើប្រាស់អគារសម្តេច នន្ទ ង៉ែត សាខាពុទ្ធិកសាកលវិទ្យាល័យព្រះសីហនុរាជ បាត់ដំបង

បាត់ដំបង: ថ្ងៃទី១២ ខែឧសភា ឆ្នាំ២០២៣ នៅថ្ងៃព្រហស្បតិ៍ ៧រោច ខែពិសាខ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១១ ខែឧសភា ឆ្នាំ២០២៣ សម្ដេចក្រឡាហោម ស ខេង នាយករដ្ឋមន្ត្រីស្តីទី នៃរាជរដ្ឋាភិបាលកម្ពុជា ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម សុខ លូ អភិបាលខេត្ត បានអញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសម្តេចព្រះសុមេធាធិបតី នន្ទ ង៉ែត ១ខ្នង កម្ពស់ ៤ជាន់ មាន១២បន្ទប់ នៃសាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង និងសមិទ្ធផលនានា ស្ថិតក្នុងបរិវេណវត្តដំរីស ភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។

សម្ដេចក្រឡាហោម ស ខេង នាយករដ្ឋមន្ត្រីស្ដីទី បានថ្លែងបញ្ជាក់នូវសេចក្ដីរីករាយជ្រះថ្លាក្រៃលែង ក្នុងការអញ្ជើញមកចូលរួមជាអធិបតី នៃពិធីសម្ពោធដាក់ឱ្យប្រើប្រាស់ជាផ្លូវការអគារសម្តេចព្រះសុមេធាធិបតី នន្ទ ង៉ែត នៃសាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង ក្នុងឱកាសប្រកបដោយភាពដ៏អធិកអធមនាពេលនេះ។

ក្នុងនាមរាជរដ្ឋាភិបាលកម្ពុជា សម្ដេចបានសម្តែងនូវមោទកភាព ចំពោះការរីកចម្រើនជាលំដាប់របស់ពុទ្ធិកសាកលវិទ្យាល័យព្រះសីហនុរាជ រួមទាំងសាខាខេត្តបាត់ដំបង រួមចំណែកបណ្ដុះបណ្ដាលសិស្ស និងនិស្សិតទាំងកម្រិតឧត្តមសិក្សា និងក្រោយឧត្តមសិក្សាជាច្រើនអង្គ/នាក់ ឱ្យក្លាយជាបណ្ឌិតបញ្ញាវ័ន្ដ និងជាធនធានមនុស្សដ៏ចាំបាច់ សម្រាប់ដំណើរការកសាង អភិវឌ្ឍន៍ សង្គមជាតិ ទាំងវិស័យពុទ្ធចក្រ និងអាណាចក្រ។

សម្ដេចក្រឡាហោម បានថ្លែងនូវអំណរគុណយ៉ាងជ្រាលជ្រៅ ចំពោះឯកឧត្តមបណ្ឌិត ជា ចាន់តូ និងលោកជំទាវ និងសប្បុរសជនទាំងអស់ ដែលបានបរិច្ចាគនូវធនធានជាច្រើន ដើម្បីចូលរួមអភិវឌ្ឍន៍វិស័យពុទ្ធសាសនា ក៏ដូចជាវិស័យផ្សេងៗជាច្រើនទៀត ដើម្បីអភិវឌ្ឍន៍ប្រទេសជាតិប្រកបដោយចីរភាព។ ព្រះពុទ្ធសាសនាមានតួនាទីសំខាន់ណាស់ សម្រាប់ការកសាងសង្គមខ្មែរ ទាំងវិស័យពុទ្ធចក្រ និងអាណាចក្រ ក្នុងនោះ រាជរដ្ឋាភិបាល តែងបានខិតខំកសាងអភិវឌ្ឍន៍ហេដ្ឋារចនាសម្ព័ន្ធជាច្រើន ដែលបានផ្តល់ជាប្រយោជន៍ជូនប្រជាជន នៅទូទាំងប្រទេសបានប្រើប្រាស់ ហើយការរីកចម្រើន ពុទ្ធិកសាកលវិទ្យាល័យ ជាផ្នែកមួយនៃការផ្ដល់ឱកាសដល់កូនចៅប្រជាពលរដ្ឋ ក្នុងការទទួលបានចំណេះដឹង ដើម្បីក្លាយជាធនធានមនុស្សពោរពេញដោយសមត្ថភាព។

សម្ដេចក្រឡាហោម បានចាត់ទុកព្រះពុទ្ធសាសនា ថាជាមូលដ្ឋានក្នុងការអប់រំផ្នត់គំនិត និងផ្តល់នូវពុទ្ធិឱ្យមនុស្សប្រព្រឹត្តនូវអំពើជាកុសល យកចិត្តទុកដាក់លើការពង្រឹងឆន្ទៈ គុណធម៌ សីលធម៌ ស្មារតីគោរពច្បាប់ ព្រមទាំងការយល់ដឹងអំពីវប្បធម៌ និងប្រវត្តិសាស្ត្ររបស់ជាតិឱ្យដល់កុលបុត្រ កុលធីតា ជាសមណសិស្ស-និស្សិត ដើម្បីឱ្យពួកគេក្លាយជាមិត្តល្អ កូនល្អ និងពលរដ្ឋល្អ សម្រាប់សង្គមជាតិ ។

ជាពិសេស ក្នុងបរិការណ៍ នៃការរីកចម្រើនជឿនលឿនផ្នែកបច្ចេកវិទ្យា ដូចពេលបច្ចុប្បន្ន។ សូមបញ្ជាក់ថា អគារដែលសម្ពោធដាក់ឱ្យប្រើប្រាស់ជាផ្លូវការនៅពេលនេះ ត្រូវបានប្រសិទ្ធនាមថា អគារសម្ដេចព្រះសុមេធាធិបតី នន្ទ ង៉ែត ចាប់ផ្ដើមកសាងនៅថ្ងៃទី១២ ខែវិច្ឆិកា ឆ្នាំ២០២០ និងបញ្ចប់ជាស្ថាពរនៅថ្ងៃទី១៥ ខែវិច្ឆិកា ឆ្នាំ២០២២ មានបណ្ដោយ៣០ម៉ែត្រ ទទឹង២១ម៉ែត្រ កម្ពស់៤ជាន់ មានបន្ទប់សិក្សា១២បន្ទប់ បន្ទប់រង់ចាំ១ សាលប្រជុំ១ និងបន្ទប់ទឹក១ មានបំពាក់សម្ភារទំនើបបម្រើឱ្យដំណើរការបង្រៀន និងរៀនមួយចំនួនទៀត ដោយចំណាយទឹកប្រាក់ប្រមាណ ១លានដុល្លារអាម៉េរិក។

ពុទ្ធិកសាកលវិទ្យាល័យព្រះសីហនុរាជ បានបង្កើតឡើងនៅឆ្នាំ១៩៥៤ ក្រោមព្រះរាជឧបត្ថម្ភរបស់ព្រះបរមរតនកោដ្ឋ និងបានបិទទ្វារនៅឆ្នាំ១៩៧២ រហូតដល់ឆ្នាំ២០០០ ទើបដំណើរការឡើងវិញ ក្នុងឋានៈជាមហាវិទ្យាល័យ និងត្រូវបានដំឡើងជាពុទ្ធិកសាកលវិទ្យាល័យព្រះសីហនុរាជ ដោយមានមហាវិទ្យាល័យចំនួន ៤ រួមមាន៖ មហាវិទ្យាល័យទស្សនវិជ្ជា, មហាវិទ្យាល័យបាលីសំស្ក្រឹត និងភាសាបរទេស, មហាវិទ្យាល័យវិទ្យាល័យវិទ្យាសាស្រ្តអប់រំ និងព័ត៌មានវិទ្យា, និងមហាវិទ្យាល័យអក្សរសាស្រ្តខ្មែរ។ បច្ចុប្បន្ន ពុទ្ធិកសាកលវិទ្យាល័យមានសិស្សកំពុងសិក្សាសរុប ៣ ៧៥៦ អង្គ/នាក់ ទាំងថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ៕ ដោយ ណយ នឿន (ប្រភពៈរដ្ឋបាលខេត្តបាត់ដំបង)  

(សូមអានបន្ត)

ឯកឧត្តម ហ៊ុន ម៉ាណែត៖ ការកើនឡើងនៃការប្រើប្រាស់បច្ចេកវិទ្យាទំនើបៗ និងបច្ចេកវិទ្យាឌីជីថល បង្កើតបាននូវកាលានុវត្តភាពថ្មី

រាជធានីភ្នំពេញ: ថ្ងៃទី១២ ខែឧសភា ឆ្នាំ២០២៣ នៅក្នុងឱកាសសម្ពោធបើកដំណើរការជាផ្លូវការ ក្រុមហ៊ុន BYTE DC Solutions នៅរាជធានីភ្នំពេញ នាថ្ងៃទី១១ ខែឧសភា ឆ្នាំ២០២៣នេះ ឯកឧត្តម បណ្ឌិត ហ៊ុន ម៉ាណែត បានលើកឡើងថា ការកើនឡើងនៃការប្រើប្រាស់បច្ចេកវិទ្យាទំនើបៗ និងបច្ចេកវិទ្យាឌីជីថលក្នុងរយៈពេលប៉ុន្មានឆ្នាំចុងក្រោយនេះ ជាពិសេស ក្នុងអំឡុងពេលនៃការឆ្លងរាលដាលនៃជំងឺកូវីដ-១៩, បច្ចេកវិទ្យាឌីជីថល បានបង្កើតនូវកាលានុវត្តភាពថ្មី ដូចជាការធ្វើពាណិជ្ជកម្មតាមប្រព័ន្ធអេឡិចត្រូនិក និងការប្រើប្រាស់ប្រព័ន្ធទូទាត់អេឡិចត្រូនិក ដែលអនុញ្ញាតឱ្យប្រតិបត្តិការអាជីវកម្មជាច្រើន អាចបន្តដំណើរការបាន ទោះក្នុងកាលៈទេសៈលំបាកយ៉ាងណាក៏ដោយ។ ខណៈដែរក្រសួង-ស្ថាប័នសាធារណៈវិញ ក៏អាចបន្តកិច្ចការងាររបស់ខ្លួនបានផងដែរ តាមរយៈប្រើប្រាស់បច្ចេកវិទ្យាប្រជុំពីចម្ងាយ ដូចជាប្រព័ន្ធ Zoom ជាដើម ដែលជាការកាត់បន្ថយយ៉ាងមានប្រសិទ្ធភាពនូវផលប៉ះពាល់បង្កឡើងដោយបញ្ហាជំងឺកូវីដ-១៩។

ឯកឧត្តម បានគូសបញ្ជាក់ទៀតថានៅក្នុងដំណើរការនៃការអភិវឌ្ឍវិស័យឌីជីថល, រាជរដ្ឋាភិបាលក៏បានកត់សម្គាល់ផងដែរអំពី តួនាទីយ៉ាងសំខាន់របស់វិស័យឯកជន។ ក្នុងន័យនេះ, រាជរដ្ឋាភិបាលបានរៀបចំច្បាប់ ស្តីពីវិនិយោគថ្មី ដើម្បីផ្តល់ការលើកទឹកចិត្ត និងអាទិភាពដល់សកម្មភាពនានាក្នុងវិស័យឌីជីថល និងវិស័យផ្សេងទៀតដែលមានគោលបំណងធ្វើបច្ចុប្បន្នកម្មប្រតិបត្តិការរបស់ខ្លួន តាមរយៈការធ្វើបរិវត្តកម្មឌីជីថល និងការបូកបញ្ចូលនូវបច្ចេកវិទ្យាថ្មីៗទៅក្នុងប្រតិបត្តិការអាជីវកម្ម។

ឯកឧត្តមបណ្ឌិត បានបន្ថែមថា ក្នុងទិសដៅខាងមុខ រាជរដ្ឋាភិបាលកម្ពុជា បានសម្តែងនូវការប្តេជ្ញាចិត្តរួចមកហើយ ក្នុងការគាំទ្រដល់កិច្ចដំណើរការអភិវឌ្ឍវិស័យឌីជីថល និងការលើកទឹកចិត្តឱ្យរាល់សកម្មភាពសង្គម-សេដ្ឋកិច្ចទាំងអស់ ខិតខំប្រឹងប្រែងក្នុងការធ្វើបរិវត្តិកម្មឌីជីថល និងចាប់យកបច្ចេកវិទ្យាឌីជីថលទៅក្នុងប្រតិបត្តិការរបស់ខ្លួន ដើម្បីលើកកម្ពស់ប្រសិទ្ធភាព និងផលិតភាពការងារសម្រាប់ជាប្រយោជន៍របស់អង្គភាពផ្ទាល់ផង និងសង្គមជាតិផង ដោយរាជរដ្ឋាភិបាលនឹងខិតខំប្រឹងប្រែងកសាងបរិយាកាសធុរកិច្ចឱ្យកាន់តែមានភាពអំណោយផលសម្រាប់វិស័យឌីជីថលទាំងមូល និងវិស័យផ្សេងទៀតក្នុងការធ្វើឌីជីថលូបនីយកម្ម និងបរិវត្តកម្មឌីជីថល។

ឆ្លៀតនាឱកាសនោះផងដែរឯកឧត្តម បណ្ឌិត ហ៊ុន ម៉ាណែត បានថ្លែងអំណរគុណចំពោះ ក្រុមហ៊ុន BYTE DC Solutions ដែលមានទំនុកចិត្តលើសក្តានុពលនៃសេដ្ឋកិច្ចកម្ពុជា និងបានប្តេជ្ញាចិត្តចូលរួមគាំទ្រដល់ការអភិវឌ្ឍវិស័យឌីជីថលក្នុងរបត់នៃដំណើរឆ្ពោះទៅរកការអភិវឌ្ឍសេដ្ឋកិច្ចប្រកបដោយភាពរឹងមាំនៅក្នុងយុគសម័យឌីជីថល។ ពិតណាស់ ទន្ទឹមនឹងការប្រែប្រួលនៃរចនាសម្ព័ន្ធសេដ្ឋកិច្ចរបស់កម្ពុជា និងការធ្វើពិពិធកម្មទាំងនៅក្នុងវិស័យកសិកម្ម, ឧស្សាហកម្ម, ទេសចរណ៍, សំណង់ និងហិរញ្ញវត្ថុ, រាជរដ្ឋាភិបាល ដែលមាន សម្តេចតេជោ ជាប្រមុខ ក៏បាននិងកំពុងយកចិត្តទុកដាក់ខ្ពស់លើវិស័យឌីជីថល ដើម្បីបង្កើតឱ្យមាននូវចន្ទល់កំណើនថ្មីមួយបន្ថែមទៀត ក៏ដូចជាដើម្បីគាំទ្រដល់ការធ្វើបរិវត្តកម្មឌីជីថលក្នុងវិស័យដទៃផ្សេងទៀតឱ្យកាន់តែទំនើប, ប្រកបដោយប្រសិទ្ធភាព និងផលិតភាពកាន់តែខ្ពស់។ ប្រាកដណាស់ ជាមួយនឹងបដិវត្តន៍ឧស្សាហកម្មទី៤, វិស័យឌីជីថលនឹងក្លាយជាមូលដ្ឋានដ៏សំខាន់សម្រាប់សេដ្ឋកិច្ចកម្ពុជា ក្នុងការធានាបាននូវភាពប្រកួតប្រជែង និងការអភិវឌ្ឍប្រកបដោយចីរភាព, បរិយាបន្ន និងភាពធន់៕ សម្រួលផ្សាយ៖ ដារ៉ា

(សូមអានបន្ត)

សម្តេចតេជោ ហ៊ុន សែន អញ្ជើញចូលរួមក្នុងពិធីបើកកិច្ចប្រជុំកំពូលអាស៊ានលើកទី៤២ នៅក្រុងឡាប៊ូនបាចូ សាធារណរដ្ឋឥណ្ឌូនេស៊ី

ប្រមុខរដ្ឋ ប្រមុខរដ្ឋាភិបាល នៃប្រទេសអាស៊ាន បានជួបជុំគ្នាក្នុងកិច្ចប្រជុំកំពូលលើកទី៤២ នៅក្រុងលំហែរកាយមាត់សមុទ្ទ ឡាប៊ូនបាចូ សាធារណរដ្ឋឥណ្ឌូណេស៊ី ពេញរយៈពេល២ថ្ងៃ ក្នុងនោះមេដឹកនាំនៃប្រទេសអាស៊ាន បានឈានទៅចេញសេចក្តីថ្លែងការណ៍របស់ប្រធាន នៃកិច្ចប្រជុំកំពូលអាស៊ានលើកទី៤២ ដោយបានបញ្ជាក់នូវការគាំទ្រចំពោះភាពជាប្រធានអាស៊ានរបស់ឥណ្ឌូនេស៊ី ក្រោមមូលបទ "សារៈសំខាន់អាស៊ាន៖ ស្នូលនៃកំណើន និង

(សូមអានបន្ត)

ទីបំផុត កីឡាករកម្ពុជា ឈុន ប៊ុនថន ធ្វើបានសម្រេចដូចការប្តេជ្ញាចិត្តហើយ

ភ្នំពេញ :ថ្ងៃទី១១ខែឧសភា ឆ្នាំ២០២៣ កីឡាករកម្ពុជាជម្រើសជាតិ ឈុន ប៊ុនថន បានចូលរួមប្រកួតវិញ្ញាសាររត់ចម្ងាយ ៨០០ម៉ែត្រ កាលពីរសៀលថ្ងៃទី១០ ខែឧសភា ឆ្នាំ២០២៣ នៅក្នុងព្រឹត្តិការណ៍កីឡាស៊ីហ្គេមលើកទី៣២ ដែលកំពុងដំណើរការនៅក្នុងប្រទេសកម្ពុជាជាម្ចាស់ផ្ទះ ហើយកីឡាកររូបនេះធ្វើបានសម្រេចដូចការប្តេជ្ញាចិត្តរបស់គេដើម្បីឡើងទៅកាន់វគ្គផ្តាច់ព្រ័ត្រ។

កីឡាករកម្ពុជាដែលជាម្ចាស់ជើងឯកលេខ១ ក្នុងវិញ្ញាសាររត់ចម្ងាយ ៨០០ម៉ែត្រ និង ១ ៥០០ម៉ែត្រ ក្នុងការប្រកួតកីឡាជាតិលើកទី១ និងលើកទី២ បាននាំមុខគេនៅក្នុងការប្រកួតជម្រុះរត់ចម្ងាយ ៨០០ម៉ែត្រក្នុងក្រុមទី២ ដែលមានកីឡាករ ៨ប្រទេសចូលរួម។

កីឡាករ ឈុន ប៊ុនថន ប្រើថេរៈវេលា ០១:៥២:១៧០ ក្នុងការប្រកួតរត់ចម្ងាយ ៨០០ម៉ែត្រនេះ ដោយនាំមុខគេស្ថិតនៅលេខរៀងទីមួយ ហើយតាមពីក្រោយដោយកីឡាករវៀតណាម Duc Phuoc Luong ដែលប្រើថេរៈវេលា ០១:៥៣:០៨០ និងលេខរៀងបន្ទាប់គឺកីឡាករហ្វីលីពីន Mariano Reduban Masano ដែលប្រើថេរៈវេលា ០១:៥៣:៣៣០។

កាលពីព្រឹកថ្ងៃទី១០ ខែឧសភា កីឡាករឆ្នើមរូបនេះបានប្រាប់ទីភ្នាក់ងារសារព័ត៌មានកម្ពុជា (AKP) ថា រូបគេប្តេជ្ញាចិត្ត និងសង្ឃឹមថានឹងបានឡើងទៅកាន់វគ្គផ្តាច់ព្រ័ត្រសម្រាប់វិញ្ញាសាររត់ចម្ងាយ ៨០០ម៉ែត្រ ហើយគេនឹងព្យាយាមឱ្យអស់ពីសមត្ថភាពដើម្បីយកជ័យជម្នះជូនជាតិ។

តាមការបញ្ជាក់របស់កីឡាករ ឈុន ប៊ុនថន បានឱ្យដឹងថា កីឡារត់ចម្ងាយ ៨០០ម៉ែត្រនេះជាវិញ្ញាសារមួយពិបាកជាងគេក្នុងវិញ្ញាសាររត់ចម្ងាយទាំងអស់ ដោយសារមានកីឡាករខ្លាំងៗច្រើនចូលរួម។ កីឡាកររូបនោះបានបន្ថែមថា ដោយហេតុនេះហើយទើបវិញ្ញាសារនេះត្រូវបែងចែកជា ២ក្រុមសម្រាប់ការប្រកួតជម្រុះដើម្បីឡើងទៅវគ្គផ្តាច់ព្រ័ត្រ៕ដោយ៖ dara

(សូមអានបន្ត)

លោកស្រី ឱ វណ្ណឌីន អំពាវនាវឲ្យបញ្ឈប់ចែកចាយព័ត៌មានខុសបច្ចេកទេស ដែលថា «WHO: មនុស្សពេញវ័យ មានសុខភាពល្អ មិនបាច់ចាក់វ៉ាក់សាំងបន្ថែម»

(ភ្នំពេញ)៖​ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នៅព្រឹកថ្ងៃទី៩ ខែឧសភា ឆ្នាំ២០២៣នេះ បានចេញមកអំពាវនាវសូមបញ្ឈប់ចែកចាយការផ្សាយ ដែលបកស្រាយខុសពីបច្ចេកទេស ដោយនិយាយពីអង្គការសុខភាពពិភពលោក (WHO) បានលើកឡើងថា «មនុស្សពេញវ័យ មានសុខភាពល្អ មិនបាច់ចាក់វ៉ាក់សាំងបន្ថែម»។

លោកស្រី ឱ វណ្ណឌីន បានបញ្ជាក់ថា នេះជាការបកស្រាយខុសបច្ចេកទេស ហើយ WHO មិនបាននិយាយបែបនេះទេ។

លោកស្រីបានអំពាវនាវថា «សូមមេត្តាបញ្ឈប់ចែកចាយការផ្សាយ ដែលបកស្រាយខុសពីបច្ចេកទេសនេះ ដោយ WHO មិននិយាយបែបនេះទេ អ្នកដែលបកស្រាយនេះ មានបំណងមិនល្អសម្រាប់ប្រទេសកម្ពុជាឡើយ។ សូមអរគុណ ! ថ្ងៃទី០៩ ខែឧសភា ឆ្នាំ២០២៣»។

សូមជម្រាបថា កម្ពុជាកំពុងបន្តយុទ្ធនាការចាក់វ៉ាក់សាំងដូស ជំរុញដល់ប្រជាពលរដ្ឋ។ គិតត្រឹមយប់ថ្ងៃទី០៨ ខែឧសភា ឆ្នាំ២០២៣ ប្រជាពលរដ្ឋចំនួន ១៥,២៨៥,៩៧២នាក់ បានចាក់វ៉ាក់សាំងបង្ការជំងឺកូវីដ១៩។ ជាមួយគ្នានេះអ្នកបានចាក់ដូសទី៣ចំនួន ១០,៦៣៣,២១១នាក់, ចាក់ដូសទី៤ចំនួន ៥,១៨៤,៦២៧នាក់, ចាក់ដូសទី៥ចំនួន ១,៨៣២,១២៧នាក់ និងចាក់ដូសទី៦ចំនួន ៣៨៥,៥៤១នាក់៕

(សូមអានបន្ត)

គម្រោងថ្មីមួយមានទឹកប្រាក់៣លានដុល្លារ ជួយបង្កើនប្រាក់ចំណូលកសិករខ្នាតតូចនៅកម្ពុជា

(ភ្នំពេញ)៖ កម្មវិធីស្បៀងអាហារពិភពលោក របស់អង្គការសហប្រជាជាតិ (WFP) សហការជាមួយសាជីវកម្មសហគមន៍កសិកម្មកម្ពុជា (CACC) កំពុងចាប់ផ្តើមគម្រោងថ្មីមួយ ដែលសំដៅផ្តោតលើ កសិករខ្នាតតូចជាង១,២០០នាក់ និងក្រុមគ្រួសាររបស់ពួកគាត់ នៅក្នុងស្រុកកោះញែក ខេត្តមណ្ឌលគិរី ភាគឦសានប្រទេសកម្ពុជា។

គម្រោងនេះ ទទួលបានមូលនិធិពីកម្មវិធីកសិកម្ម និងសន្តិសុខស្បៀងសកលចំនួន ១.៧៩លានដុល្លារ និងពី CACC ចំនួន១.១លានដុល្លារ ក្នុងគោលបំណងលើកកម្ពស់ ភាពធន់ និងជីវភាពរបស់កសិករ ខ្នាតតូចតាមរយៈកសិកម្មសរីរាង្គ និងលទ្ធភាពចូលទៅកាន់ទីផ្សារ។

គម្រោងនេះ ក៏មានបំណងលើកកម្ពស់ អាហារូបត្ថម្ភនិងសមភាព យេនឌ័រ ផងដែរ តាមរយៈវិធីសាស្រ្តផ្លាស់ប្តូរឥរិយាបថសង្គម ដែលត្រូវបានរៀបចំឡើង ដើម្បីជំរុញឲ្យមានតម្រូវការរបបអាហារសុខភាព និងទប់ទល់ជាមួយទម្លាប់សង្គម ដែលបង្កគ្រោះថ្នាក់។

លោកស្រី គ្លែរ កូណាន់ អ្នកតំណាងរបស់ WFP ប្រចាំនៅកម្ពុជា បានថ្លែងថា «គម្រោងនេះត្រូវបានគ្រោងរៀបចំឡើងក្នុងបរិបទកូវីដ-១៩ ដោយប្រើវិធីសាស្រ្តច្នៃប្រឌិត ដែលកសាងភាពជាដៃគូរវាង វិស័យសាធារណៈ វិស័យឯកជន និងអ្នកផលិតដោយផ្ដោតជាសំខាន់នលើភាពចាំបាច់ ក្នុងការទាញប្រយោជន៍ពីការបណ្ដាក់ទុនលើ វិស័យឯកជន ពង្រឹងកិច្ចសន្ទនាផ្នែកគោលនយោបាយ ធានានូវចំណេះដឹងចាំបាច់ និងគាំទ្រដល់ការអភិវឌ្ឍដែលគិតគូរដល់បរិស្ថាន សមធម៌សង្គម និងសេដ្ឋកិច្ច»។

នាយកប្រតិបត្តិ CACC លោក កាន់ គន្ធី បានថ្លែងថា CACC នឹងបង្កើតខ្សែច្រវ៉ាក់តម្លៃអាហារសរីរាង្គមួយ ដែលប្រកបដោយបរិយាប័ន្ន និងលើកទឹកចិត្តកសិករខ្នាតតូច រួមទាំងស្ត្រីនិងជនជាតិដើមភាគតិច ឲ្យប្តូរមកអនុវត្ដ កសិកម្មសរីរាង្គដោយប្រើតែជី និងថ្នាំកម្ចាត់សត្វល្អិតធម្មជាតិ និងការអនុវត្តដទៃទៀត ដែលឆ្លើយតបនឹងការប្រែប្រួលអាកាសធាតុ។

លោកបានបន្តថា «អាហារសរីរាង្គមានតម្លៃល្អ និងមានស្ថិរភាពជាងតម្លៃទំនិញដែលផលិតទៅតាមទម្លាប់។ វាមានឱកាសចំណេញខ្ពស់ និងមានស្ថិរភាពចំណូល»។ លោកកត់សម្គាល់ថា កសិករខ្នាតតូចក្នុងខេត្តមណ្ឌលគិរី ច្រើនដាំដុះតែស្រូវ ហើយភាគច្រើនធ្វើសិកម្មវិលជុំបែបប្រពៃណី ដែលងាយរងគ្រោះដោយសារអាកាសធាតុ និងវិបត្តិផ្សេងៗ។

លោក គន្ធី បានបន្ថែមថា «គោលដៅរបស់យើង គឺដើម្បីបង្កើនប្រាក់ចំណូលរបស់កសិករ ដែលចូលរួមឲ្យបានរហូតដល់២០ភាគរយ ធៀបនឹងប្រាក់ចំណេញរបស់កសិកម្ម ធម្មតា»។ លោកក៏បញ្ជាក់ថា CACC នឹងជួយសម្របសម្រួលទំនាក់ទំនងទីផ្សារហើយកសិករនឹងអាចប្រើប្រាស់ចំណូលរបស់ខ្លួនក្នុងការទប់ទល់ជាមួយនឹង វិបត្តិផ្សេងៗដែលអាចកើតមាននាពេលអនាគត។

លោកស្រី កូណាន់ បានថ្លែងថា «កំណើនប្រាក់ចំណូលនឹងដើរតួយ៉ាងសំខាន់ក្នុងការសម្រួល ឲ្យមានអាហារូបត្ថម្ភកាន់តែប្រសើរនៅពេលដែលក្រុមគ្រួសារពួកគាត់ អាចទទួលបានអាហារសុខភាពចម្រុះ អាចទប់ទល់នឹងផលអវិជ្ជមានផ្នែកអាហារូបត្ថម្ភ ដែលកើតមានលើក្រុមគ្រួសារពួកគាត់»។

លោកស្រីក៏សម្គាល់ផងដែរថា ជីវភាព និងអាហារូបត្ថម្ភមានសារៈសំខាន់ណាស់ ដោយសារតំបន់គោលដៅនេះ មានកម្រិតនៃភាពក្រីក្រ និងកង្វះអាហារូបត្ថម្ភខ្ពស់៕

(សូមអានបន្ត)

ព្រឹកនេះព្រះរាជពិធីច្រត់ព្រះនង្គ័ល ប្រារព្ធឡើងនៅបរិវេណពហុកីឡដ្ឋានខេត្តកំពង់ធំ ក្រោមព្រះរាជាធិបតីភាពព្រះមហាក្សត្រខ្មែរ

(កំពង់ធំ)៖ បន្ទាប់ខកខានអស់ជាច្រើនឆ្នាំ ព្រោះតែវិបត្តិជំងឺកូវីដ១៩នោះ នៅថ្ងៃព្រឹក​ចន្ទ ៤រោច ខែពិសាខ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៨ ខែ​ឧសភា ឆ្នាំ២០២៣នេះ ព្រះរាជពិធីច្រត់ព្រះនង្គ័ល បានប្រារព្ធឡើងវិញហើយ។

ព្រះរាជពិធីច្រត់ព្រះនង្គ័លនៅឆ្នាំនេះ ត្រូវបានរៀបចំឡើងនៅពហុកីឡដ្ឋាន​ខេត្ត​កំពង់​ធំ ស្ថិតនៅភូមិរូង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ក្រោមព្រះរាជាធិប​តីភាពដ៏ខ្ពងខ្ពស់បំផុតរបស់ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា។

ព្រះរាជពិធីជាព្រះរាជបវេណីខ្មែរនេះ ក៏មានការអញ្ជើញចូលរួមពី​សម្តេចវិបុល​សេនា​ភក្តី សាយ ឈុំ ប្រធានព្រឹទ្ធសភា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ សម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច​ព្រមទាំង​មន្ត្រីជាន់ខ្ពស់នៃស្ថាប័នព្រឹទ្ធសភា រដ្ឋសភា រាជរដ្ឋាភិបាលកម្ពុជា មន្ត្រីអង្គទូតនៃបណ្ដា​ប្រទេសជាមិត្តប្រចាំនៅកម្ពុជា និងមន្ត្រីរាជការ កងកម្លាំងប្រដាប់អាវុធ សិស្សានុសិស្ស ប្រជាពលរដ្ឋជាច្រើនម៉ឺននាក់។

ការប្រារព្ធព្រះរាជពិធីច្រត់ព្រះនង្គ័លជាការប្រកាសប្រាប់ប្រជាពលរដ្ឋដែលប្រកបរបរកសិកម្ម ធ្វើស្រែចម្ការថា ជាការចាប់ផ្តើមចូលដល់រដូវវស្សាហើយ។ ក្នុងព្រះរាជពិធី​បុណ្យច្រត់ព្រះនង្គ័លនៅឆ្នាំនេះ លោក ងួន រតនៈ អភិបាលខេត្តកំពង់ធំ ត្រូវបានព្រះ​មហា​ក្សត្រកម្ពុជាសព្វព្រះរាជហឫទ័យរាជានុញ្ញាតឱ្យធ្វើជាស្តេចមាឃ កាន់នង្គ័ល​ទី២ តំណាងព្រះអង្គ និងភរិយា ជាព្រះមេហួ។

ក្នុងព្រះរាជពិធីនាព្រឹកនេះ ក៏មានការរៀបចំតាំងបង្ហាញនូវផលិតផលកសិផល​មកពី​តាម​បណ្តាក្រសួង និងរាជធានី-ខេត្តផងដែរ។

សូមបញ្ជាក់ថា ព្រះរាជពិធីបុណ្យច្រត់ព្រះនង្គ័ល ជាព្រះរាជបវេណីដ៏សំខាន់ចាត់ទុក​ជាវ​ប្បមង្គលមួយដ៏ប្រសើរ របស់ប្រជាពលរដ្ឋកម្ពុជា ដែលមហាក្សត្រគ្រប់ព្រះអង្គ​តែ​ង​តែ​ដឹកនាំធ្វើពុំដែលខាន តាំងពីបុរាណកាលរៀងមក។

ព្រះរាជពិធីនេះកាលពីដើមឡើយតែងតែប្រារព្ធធ្វើឡើងនៅវាលព្រះមេរុនៅជិតព្រះបរមរាជវាំង តែប៉ុន្មានឆ្នាំចុងក្រោយនេះព្រះរាជពិធីត្រូវព្រះករុណា​ជាអម្ចាស់ជីវិតលើ​ត្បូង ព្រះរាជានុញ្ញាត ឱ្យធ្វើនៅតាមខេត្តវិញម្តង ដើម្បីឱ្យប្រជាពលរដ្ឋខ្មែរបាន​ចូលរួម​ក្នុងព្រះរាជបវេណី​ដ៏សំខាន់មួយនេះ។

ក្នុងព្រះរាជពិធីនេះ ក៏មានការរៀបចំចំណី៧មុខរួមមាន ស្រូវ, ពោត, ល្ង, សណ្តែក, ទឹក, ស្រា និងស្មៅ ជាអាហារឱ្យ «គោឧសភរាជ» បរិភោគ ដើម្បីផ្សងពីផលដំណាំ ដែលមានផលល្អ មិនល្អ ឬមានរោគាផ្សេងៗទៅលើសត្វធាតុរបស់ប្រជាកសិករ៕

(សូមអានបន្ត)