អង្គការសម្ព័ន្ធមិត្តសត្វព្រៃ រៀបចំដំណើរទេសចរណ៍ផ្សព្វផ្សាយពីកិច្ចការពារសត្វព្រៃនៅតំបន់ជួរភ្នំក្រវាញ

អង្គការសម្ព័ន្ធមិត្តសត្វព្រៃ(WA) បានរៀបចំដំណើរទេសចរណ៍សត្វព្រៃ ដើម្បីផ្សព្វផ្សាយពីសារសំខាន់នៃព្រៃឈើ និងសត្វព្រៃ តំបន់ជួរភ្នំក្រវាញ ទៅកាន់សាធារណជន សំដៅកាត់បន្ថយការកាប់បំផ្លាញព្រៃឈើ និងដាក់អន្ទាក់ និងបរបាញ់សត្វព្រៃបន្តទៀត។

ដំណើរទេសចរណ៍សត្វព្រៃ បានចាប់ផ្តើមនៅថ្ងៃសុក្រ ទី១០ ខែមីនានេះ ចាប់ពីម៉ោង ១ រសៀល រហូតដល់ម៉ោង៩យប់ នៅឃុំអូសោម ស្រុកវាលវែង ខេត្តពោធិ៍សាត់ មុនចូលទៅដល់ខេត្តកោះកុង និងចុងក្រោយធ្វើនៅក្នុងរាជធានីភ្នំពេញ ដោយក្នុងព្រឹត្តិការណ៍នេះ មានការលេងល្បែងកំសាន្ត ការសម្ដែងសៀកបែបវិទ្យាសាស្ត្រ និងរួមមានការចាប់រង្វាន់ផងដែរ។

សេចក្តីប្រកាសព័ត៌មានរបស់អង្គការសម្ព័ន្ធមិត្តសត្វព្រៃ(WA) បានឱ្យដឹងថា ព្រឹត្តិការណ៍នេះ ប្រារព្ធឡើងដើម្បីអបអរសាទរ និងផ្សព្វផ្សាយពីសារសំខាន់នៃព្រៃឈើ តំបន់ជួរភ្នំក្រវាញចំពោះបរិស្ថាន និងសហគមន៍ ខណៈធនធានព្រៃឈើបានដើរតួនាទីជាបទប្បញ្ញត្តិអាកាសធាតុ បង្កើតជាប្រភពថាមពល និងបានជួយគាំទ្រដល់ជីវភាពរស់នៅរបស់ប្រជាពលរដ្ឋ។

ព្រឹត្តិការណ៍នេះ ផ្តោតសំខាន់លើខ្លឹមសារចម្បងចំនួនបី៖រួមមាន៖ ១. មានព្រៃឈើមានប្រភពទឹក, ២. សត្វខ្លាធំជួយរក្សាលំនឹងប្រព័ន្ធអេកូឡូស៊ី, និង៣. គ្មានអន្ទាក់ គ្មានការបរិភោគសាច់សត្វព្រៃ។

កម្មវិធីដែលធ្វើឡើងក្នុងបរិវេននៅវត្តអូរសោម ប្រព្រឹត្តទៅក្រោមអធិបតីភាពរបស់ឯកឧត្តម សុខខេង នរិន្ទ អនុរដ្ឋលេខាធិការក្រសួងបរិស្ថាន, ឯកឧត្តម សាយ សុជាតិ អភិបាលរងនៃគណៈអភិបាលខេត្តពោធិ៍សាត់, កញ្ញាបណ្ឌិត ស៊ូវ ណ្ណា ហ្គោនឡែត នាយិកាប្រតិបត្តិអង្គការសម្ព័ន្ធមិត្តសត្វព្រៃ(WA) និងភ្ញៀវកិត្តិយសដទៃទៀត។

ព្រឹត្តិការណ៍នេះ រួមបញ្ចូលការសម្ដែងសៀកបែបវិទ្យាសាស្ត្រ ដែលចូលរួមសម្តែងដោយដៃគូ សហការរបស់អង្គការសម្ព័ន្ធមិត្តសត្វព្រៃ(WA)មកពីក្រៅប្រទេស គឺ "Baseet" និង ការសម្តែងដោយតារាចម្រៀងល្បីប្រចាំខេត្តកោះកុង គឺ លោក រាជ វិចិត្រ ដោយបើកឱ្យមានការចូលរួមដោយសេរី។

សូមបញ្ជាក់ថា អង្គការសម្ព័ន្ធមិត្តសត្វព្រៃអន្តរជាតិ (WA) ត្រូវបានបង្កើតឡើងដោយកញ្ញាបណ្ឌិត ស៊ូវណ្ណា ហ្គោនឡុត ដើម្បីផ្ដល់ការការពារ ដោយ ផ្ទាល់ដល់ព្រៃឈើនិងសត្វព្រៃ តាមរយៈកម្មវិធីអភិរក្សបែបទំនើប។ អង្គការ នេះផ្តល់ជំនួយបច្ចេកទេស និងការត្រិះរិះពិចារណាដល់រាជដ្ឋាភិបាល និងខិតខំឱ្យមានការឯកភាពគ្នារវាងភាគីពាក់ព័ន្ធ ក្នុងការសម្រេចបាននូវដំណោះស្រាយ ចំពោះការគំរាមកំហែងបរិស្ថានជាច្រើនរួមមាន៖ ការជួញដូរសត្វ ការផ្តល់ដីសម្បទានសេដ្ឋកិច្ចសម្រាប់ដំណាំកសិឧស្សាហកម្ម និងការជីកយករ៉ែ និងការទន្ទ្រានយកដីព្រៃ។ អង្គការនេះ គឺជាអ្នកដឹកនាំក្នុងការចាត់វិធានការណ៍ផ្ទាល់នៅក្នុងតំបន់ខ្សែក្រវាត់ត្រូពិចអាស៊ីអាគ្នេយ៍៕

(សូមអានបន្ត)

មន្ទីរសុខាភិបាលខេត្ដសៀមរាប រៀបចំវគ្គបណ្តុះបណ្តាលអំពីការសង្គ្រោះបឋម និងបន្ទាន់ ដល់យុវជនស្ម័គ្រិចិត្ត ត្រៀមសម្រាប់ព្រឹត្តិការណ៍អង្គរសង្ក្រាន្ដ

(សៀមរាប)៖  មន្ទីរសុខាភិបាលខេត្តសៀមរាប សហការជាមួយក្រុមការងារសង្គ្រោះបឋម និងបន្ទាន់ នៃព្រឹត្តិការណ៍អង្គរសង្ក្រាន្ត បានរៀបចំវគ្គបណ្តុះបណ្តាល ដល់សិក្ខាកាមចំនួន៤៥នាក់ អំពីការសង្គ្រោះបឋម និងបន្ទាន់ ត្រៀមក្នុងព្រឹត្តិការណ៍អង្គរសង្ក្រាន្ត ដើម្បីជួយសង្គ្រោះប្រជាពលរដ្ឋ។

លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានលើកឡើងថា គោលបំណង នៃវគ្គបណ្តុះបណ្តាលនេះ គឺដើម្បីផ្តល់នូវចំណេះដឹងសំខាន់ៗ ក្នុងការជួយសង្រ្គោះបឋម និងបន្ទាន់ទៅដល់ប្រជាពលរដ្ឋដែលរំពឹងថា នឹងមកចូលរួមយ៉ាងច្រើនកុះករ នៅក្នុងព្រឹត្តិការណ៍អង្គរសង្ក្រាន្តនាពេលខាងមុខនេះ។ លោកបន្តថា វគ្គបណ្តុះបណ្តាលនេះ ក៏ដើម្បីឲ្យគាត់ចេះដឹងឲ្យបានច្បាស់លាស់ពាក់ព័ន្ធ នឹងការជួយសង្គ្រោះបេះដូង ផ្លូវដង្ហើម ពស់ចឹក ខ្សែភ្លើងឆក់ និងបញ្ហាអ្នកដែលដួលរបួស តើនឹងជួយយ៉ាងដូចម្តេច?។

លោកវេជ្ជបណ្ឌិត ក្រុស សារ៉ាត់ បានបន្តទៀតថា សម្រាប់ក្រុមការងារសង្គ្រោះបឋម និងបន្ទាន់ នៃព្រឹត្តិការណ៍អង្គរសង្ក្រាន្តឆ្នាំ២០២៣ បានបែងចែកជា៣ក្រុម គឺក្រុមទី១ ក្រុមនៅតាមស្តង់ មានចំនួន៩ ក្រុមទី២ គឺក្រុមចល័ត និងក្រុមទី៣ ជាអ្នកជំនាញនៅមន្ទីរពេទ្យបង្អែកខេត្ត។ លោកបានបញ្ជាក់ថា ស្តង់សម្រាប់សង្គ្រោះបឋម និងបន្ទាន់ នៅក្នុងព្រឹត្តិការណ៍អង្គរសង្ក្រាន្ត មានចំនួន៩ មាននៅខាងមុខអង្គរចំនួន២ស្តង់ នៅបាយ័នមានចំនួន២ស្តង់ នៅអង្គរឃ្យូងយូ ចំនួន១ស្តង់ និងសងខាងមាត់ស្ទឹងសៀមរាបមានចំនួន៤ទៀត។

សិក្ខាកាមចំនួន ៤៥នាក់ ដែលមករៀនវគ្គបណ្តុះបណ្តាលអំពីការសង្គ្រោះបឋម និងបន្ទាន់ នៅក្នុងព្រឹត្តិការណ៍អង្គរសង្ក្រាន្តឆ្នាំ២០២៣ មានដូចជា និសិ្សត មន្រ្តីសុខាភិបាល និងយុវជនស្ម័គ្រចិត្តរបស់សហភាពសហព័ន្ធយុវជនកម្ពុជា ខេត្តសៀមរាប៕

(សូមអានបន្ត)

សម្ដេចតេជោ ហ៊ុន សែន រំពឹងថា កម្ពុជានឹងក្លាយទៅជាប្រទេសមួយនាំមុខ ក្នុងការនាំចេញ ផ្គត់ផ្គង់ទីផ្សារទៅលើ ផ្នែកស្វាយចន្ទី

ភ្នំពេញ: ថ្ងៃទី១០ ខែមីនា ឆ្នាំ២០២៣ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានថ្លែងថា នៅពេលដែលកម្ពុជាមានឧស្សាហកម្មកែច្នៃគ្រប់គ្រាន់នោះ រំពឹងថាកម្ពុជានឹងក្លាយទៅជាប្រទេសមួយនាំមុខ ក្នុងការនាំចេញ ផ្គត់ផ្គង់ទីផ្សារទៅលើ ផ្នែកស្វាយចន្ទី។

ក្នុងខណៈអញ្ជើញជាអធិបតីភាពដ៏ខ្ពង់ខ្ពស់ បើកជាផ្លូវការពិធីបុណ្យទន្លេលើកទី៧ ក្រោមប្រធានបទ «ទន្លេរបស់យើង ដើម្បីបច្ចុប្បន្ន និងអនាគត» នាល្ងាចថ្ងៃទី ០៩ ខែមីនា ឆ្នាំ២០២៣ នៅចំណុចសួនច្បារស្ទឹងសែន ខេត្តកំពង់ធំ សម្ដេចតេជោថ្លែងបន្ត៖ ថា«ផលិតកម្ម ដែលយើងឃើញ នៅតាមស្តង់នានា ដែលបានដាក់តាំង បង្ហាញ នៅក្នុងសហគមន៍ ខ្ញុំពិតជាមានការជក់ចិត្ត នឹកឃើញរឿងអតីតកាល ប្រៀបធៀបជាមួយនឹងបច្ចុប្បន្នកាល ដែលនៅតាមស្តង់នីមួយៗ សុទ្ធតែមានការផលិត ប្រកបដោយការទទួលខុសត្រូវ មានគុណភាពដែលអាចផ្គត់ផ្គង់ទីផ្សារក្នុងស្រុក និងការនាំចេញ»។

សម្តេចតេជោគូសបញ្ជាក់ថា សម្ដេចកំពុងតែស្រមើស្រមៃថា កម្ពុជានឹងក្លាយទៅជាប្រទេស ដែលផលិតនូវស្វាយចន្ទីច្រើនបំផុត នៅលើពិភពលោក ដែលមកដល់បច្ចុប្បន្ននេះ កម្ពុជាបានទៅហួសប្រទេសកូឌីវ័រ ដែលផលិតត្រឹមមួយលាន មួយសែនតោន។ ឥឡូវ កម្ពុជាមានដល់មួយលាន មួយសែនប្រាំបី ម៉ឺនតោន រួចស្រេចទៅហើយ។

សម្ដេចតេជោគូសបញ្ជាក់បន្ថែមថា ករណីស្វាយចន្ទី រាជរដ្ឋាភិបាលបានអនុម័តគោលនយោបាយ ជំរុញដំណាំនេះ នាពេលថ្មីៗ។ ដូច្នេះរំពឹងថា នៅពេលដែលកម្ពុជាមានឧស្សាហកម្មកែច្នៃគ្រប់គ្រាន់ ដែលបច្ចុប្បន្ននៅទូទាំងប្រទេសមានផ្ទៃដីដាំដុះស្វាយចន្ទីរហូតដល់ ៧០ម៉ឺនហិកតានោះ គឺយើងនឹងអាចទៅលើសពី ១លានហិកតា ដែលជាផ្នែកដ៏សំខាន់មួយ។ អាចនិយាយបានថា កម្ពុជាក្លាយទៅជាប្រទេសមួយនាំមុខក្នុងការនាំចេញ ផ្គត់ផ្គង់ទីផ្សារទៅលើផ្នែកស្វាយចន្ទីតែម្ដង។

សម្តេចតេជោបានឱ្យដឹងទៀតថា នេះជាគោលដៅជាអាទិភាពនៃគោលនយោបាយរបស់យើង។ ដូច្នេះសម្ដេចតេជោសង្ឃឹមថា កម្ពុជា នៅពេលអនាគត ដែលមានសន្តិភាព បូកជាមួយនឹងគោល នយោបាយភូមិ ឃុំ មានសុវត្ថិភាព គឺមួយផ្នែកទាក់ទាញទេសចរ ។ ប៉ុន្តែអ្វីដែលសំខាន់ ជាងនេះទៅទៀត ផលិតកម្ម ដែលបម្រើសេចក្តីត្រូវការរបស់ប្រជាជន ក៏ដូចជាផ្គត់ផ្គង់ ទេសចរនោះឯង។

សម្ដេចតេជោនាយករដ្ឋមន្ត្រី ក៏បានមានប្រសាសន៍ស្នើឱ្យស្ថាប័នពាក់ព័ន្ធ ត្រូវបន្តជំរុញការផលិត ដើម្បីផ្គត់ផ្គង់ដល់ទេសចរណ៍ ដែលជាទិសដៅនាំចេញនៅនឹងកន្លែង។ ព្រោះថា ប្រជាពលរដ្ឋរបស់យើងមានឱកាសច្រើនណាស់ ដើម្បីចិញ្ចឹម និងបំពេញតម្រូវការរបស់ភ្ញៀវទេសចរណ៍អន្តរជាតិ ដែលកំពុងត្រឡប់មកវិញជាបណ្ដើរៗ រួមជាមួយទេសចរណ៍ក្នុងស្រុករាប់លាននាក់។ យើងត្រូវខិតខំជំរុញការផលិតឱ្យត្រឹមត្រូវតាមស្តង់ដា បម្រើឱ្យវិស័យទេសចរណ៍ ពិសេសត្រូវបង្កើតឱ្យមានខ្សែក្រវាត់បៃតងក្នុងតំបន់ទេសចរណ៍៕ ដោយ៖ ជឹម ណារី

(សូមអានបន្ត)

សម្ដេចក្រឡាហោម ស ខេង៖ ការបង្កើតប្រព័ន្ធរួមនៃអត្តសញ្ញាណកម្មប្រជាជននឹងរួមចំណែក​ពង្រឹងកិច្ចសហប្រតិបត្តិការ​ក្នុងតំបន់ ប្រឆាំងអំពើជួញដូរមនុស្ស ឧក្រិដ្ឋកម្មឆ្លងដែន

សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានថ្លែងថា ការបង្កើតប្រព័ន្ធរួម នៃអត្តសញ្ញាណកម្មប្រជាជន និងការគ្រប់គ្រងទិន្នន័យ នឹងរួមចំណែកពង្រឹងកិច្ចសហប្រតិបត្តិការក្នុងតំបន់ និងរួមចំណែកដល់ការប្រយុទ្ធប្រឆាំងអំពើជួញដូរមនុស្ស ឧក្រិដ្ឋកម្មឆ្លងដែន។

ថ្លែងក្នុងកិច្ចប្រជុំគណៈកម្មាធិការជាតិដឹកនាំតម្រង់ទិសការងារអត្រានុកូលដ្ឋាន និងអត្តសញ្ញាណកម្ម(គ.ជ.ដ.អ.)នៅទីស្ដីការក្រសួងមហាផ្ទៃ នាព្រឹកថ្ងៃទី០៩ ខែមីនា ឆ្នាំ២០២៣ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិដឹកនាំតម្រង់ទិសការងារអត្រានុកូលដ្ឋាន និងអត្តសញ្ញាណកម្ម(គ.ជ.ដ.អ.) បានមានប្រសាសន៍ថា គោលដៅចម្បងនៃផែនការយុទ្ធសាស្រ្តជាតិស្ដីពី អត្តសញ្ញាណកម្មឆ្នាំ២០១៧-២០២៦ គឺការបង្កើតប្រព័ន្ធរួម នៃអត្តសញ្ញាណកម្មប្រជាជន និងការគ្រប់គ្រងទិន្នន័យ ដើម្បីថែរក្សាសន្តិសុខ និងសណ្ដាប់ធ្នាប់សាធារណៈ។ សម្ដេចក្រឡាហោមបានថ្លែងបញ្ជាក់ថា៖ «គោលដៅចម្បងនៃផែនការយុទ្ធសាស្រ្តជាតិស្ដីពី អត្តសញ្ញាណកម្មឆ្នាំ ២០១៧-២០២៦ គឺការបង្កើតប្រព័ន្ធរួមនៃអត្តសញ្ញាណកម្មប្រជាជន និងការគ្រប់គ្រងទិន្នន័យ ដើម្បីថែរក្សាសន្តិសុខ និងសណ្ដាប់ធ្នាប់សាធារណៈ ព្រមទាំងលើកកម្ពស់ការបម្រើសេវាសាធារណៈនានាជូនប្រជាពលរដ្ឋឱ្យបានកាន់តែប្រសើរឡើង»។

សម្ដេចក្រឡាហោមបានឱ្យដឹងទៀតថា សមិទ្ធផលនៃផែនការយុទ្ធសាស្រ្តនេះ ក៏ នឹងរួមចំណែកពង្រឹងកិច្ចសហប្រតិបត្តិការក្នុងតំបន់ និងរួមចំណែកដល់ការប្រយុទ្ធប្រឆាំងអំពើជួញដូរមនុស្ស ឧក្រិដ្ឋកម្មឆ្លងដែន និងការកំណត់មុខសញ្ញាសង្ស័យនានា ទាំងក្នុងប្រទេស ក្នុងតំបន់ និងជុំវិញពិភពលោក។ សម្ដេចក្រឡាហោមបានបន្ថែមថា ទិសដៅការងារដែលត្រូវខិតខំសម្រេចឱ្យបានក្នុងតំណាក់កាលនេះ រួមមាន ការរៀបចំសេចក្ដីព្រាងច្បាប់ និងលិខិតបទដ្ឋាន គតិយុត្តិពាក់ព័ន្ធ ការបង្កើតប្រព័ន្ធរួមអត្តសញ្ញាណកម្មប្រជាជន ប្រព័ន្ទចុះបញ្ជីអត្រានុកូលដ្ឋាន និងស្ថិតិអត្រានុកូលដ្ឋាន ប្រព័ន្ធចុះបញ្ជីស្នាក់នៅ និងប្រព័ន្ធអត្តសញ្ញាណកម្ម។

ជាមួយគ្នានេះដែរ សម្ដេចក្រឡាហោមបានអះអាងថា ជំហានបន្ទាប់គឺភ្ជាប់ប្រព័ន្ធទាំងអស់ទៅក្នុងប្រព័ន្ធមេមួយ ដើម្បីប្រមូលផ្ដុំទិន្នន័យ និងសម្អាតទិន្នន័យសម្រាប់ប្រើប្រាស់ជាប្រយោជន៍សាធារណៈ ខណៈបណ្ដាប្រទេសនានាលើពិភពលោកបាននិងកំពុងយកចិត្តទុកដាក់លើការងារធ្វើទំនើបកម្មប្រព័ន្ធគ្រប់គ្រងអត្រានុកូលដ្ឋាន និងអត្តសញ្ញាណកម្ម ពិសេសការប្ដូរពីការចុះបញ្ជីដោយដៃ ទៅជាការចុះក្នុងប្រព័ន្ធព័ត៌មានវិទ្យា។

តាមរបាយការណ៍បានឱ្យដឹងថា សម្រាប់ឆ្នាំ២០២៣នេះ គណៈកម្មាធិការជាតិដឹកនាំតម្រង់ទិសការងារអត្រានុកូលដ្ឋាន និងអត្តសញ្ញាណកម្ម (គ.ជ.ដ.អ.) ដែលមានអគ្គ នាយកដ្ឋានអត្តសញ្ញាណកម្មនៃក្រសួងមហាផ្ទៃជាសេនាធិការស្នូល នឹងបញ្ជូនសេចក្តី ព្រាងច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ដើម្បីដាក់ឆ្លងកិច្ចប្រជុំពេញអង្គនៅគណៈរដ្ឋមន្ត្រី ព្រមទាំងជ្រើសរើស ឃុំ សង្កាត់ចំនួន៥០០ ដែលមានលក្ខណៈសម្បត្តិគ្រប់គ្រាន់ សម្រាប់ដាក់ឱ្យអនុវត្តន៍យន្តការច្រកចេញ-ចូលតែមួយ សេវា អត្តសញ្ញាណកម្ម ក្នុងជំហានទី១ និងបន្តសហការជាមួយក្រសួងសេដ្ឋកិច្ច និងហិរញ្ញវត្ថុ លើការងារផ្ទៀងផ្ទាត់ទិន្នន័យរវាងប្រព័ន្ធទិន្នន័យអត្តសញ្ញាណកម្ម និងប្រព័ន្ធផ្លាស់ប្តូរទិន្ន ន័យ CamDX៕ដោយ៖ ចាន់ សុធីវង្ស សម្រួលផ្សាយដោយ៖dara

(សូមអានបន្ត)

ឯកឧត្តមបណ្ឌិត ជា ចាន់តូ អញ្ជើញសម្ពោធឧបដ្ឋានសាលា នៅវត្តល្វា

 កំពង់ធំ ថ្ងៃទី០៩ ខែមីនា ឆ្នាំ២០២៣
ឯកឧត្តមបណ្ឌិត ជា ចាន់តូ ទេសាភិបាលធនាគារជាតិនៃកម្ពុជា និងលោកជំទាវ ខៀវ ស៊ីណា បានអញ្ជើញសម្ពោធឧបដ្ឋានសាលា និងពុទ្ធាភិសេកព្រះពុទ្ធរូបថ្មី នៅវត្តល្វា ស្ថិតនៅក្នុងភូមិល្វា ឃុំសំព្រោជ ស្រុកស្ទោង ខេត្តកំពង់ធំ នាថ្ងៃពុធ ២រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៨ ខែមីនា ឆ្នាំ២០២៣។

ពិធីនេះមានការអញ្ជើញចូលរួមពីលោក សាយ គឹមឡម អភិបាលស្រុកស្ទោង មន្ត្រីរាជការកងកម្លាំងប្រដាប់អាវុធ និងពុទ្ធបរិស័ទជាច្រើននាក់។

ក្នុងឱកាសនេះឯកឧត្តមបណ្ឌិត ជា ចាន់តូ បានពាំនាំនូវការផ្តាំសួរសុខទុក្ខរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ដែលសម្តេចទាំងពីរតែងតែនឹករលឹក និងយកចិត្តទុកដាក់ដល់សុខទុក្ខប្រជាពលរដ្ឋគ្រប់មូលដ្ឋាន និងគ្រប់ពេលវេលា។

ឯកឧត្តមបណ្ឌិត ជា ចាន់តូ មានប្រសាសន៍លើកឡើងថា យើងមានឱកាសបានសម្ពោធ និងជួបជុំគ្នាក្នុងពេលនេះ ក៏ដោយសារប្រទេសជាតិយើងមានសុខសន្តិភាពពេញបរិបូរណ៍ ដែលមានសម្តេចតេជោ ហ៊ុន សែន ជាស្ថាបនិក។ ពុទ្ធចក្រ និងអាណាចក្រត្រូវតែនៅជាមួយគ្នា រីកចម្រើនជាមួយគ្នាក្រោមម្លប់សន្តិភាព ហើយប្រជាពលរដ្ឋម្ចាស់ឆ្នោតត្រូវមានភាពវៃឆ្លាតក្នុងការសម្រេចចិត្ត និងបោះឆ្នោតជ្រើសរើសថ្នាក់ដឹកនាំ ដែលប្រកបដោយទសពិធរាជធម៌ ដែលនាំសុខសន្តិភាព ការអភិវឌ្ឍលើគ្រប់វិស័យ ស្ថិតនៅជាមួយប្រជាពលរដ្ឋគ្រប់កាលៈទេសៈ។

ឯកឧត្តមបណ្ឌិត ជា ចាន់តូ បានអំពាវនាវដល់ញាតិញោម ពុទ្ធបរិស័ទចំណុះជើងវត្តទាំងអស់ ត្រូវរួបរួមសាមគ្គីគ្នា កសាងសមិទ្ធផលថ្មីៗ ឱ្យវត្តមានការរីកចម្រើនថែមទៀត ហើយជួយថែរក្សាឧបដ្ឋានសាលាថ្មីនេះឱ្យបានល្អ និងប្រើប្រាស់បានយូរតរៀងទៅ ក៏ដូចជាការសន្សំបុណ្យកុសលកប់ក្នុងពុទ្ធសាសនា ទាំងនៅក្នុងជាតិនេះ និងបរលោក។

គួរបញ្ជាក់ផងដែរថា ឧបដ្ឋានសាលាថ្មីនេះ ធ្វើអំពីថ្មប្រក់ក្បឿងមានទំហំ២៨ម៉ែត្រ គុណ៣២ម៉ែត្រ ចំណាយអស់ប្រាក់សរុប ២៤ម៉ឺន ៦ពាន់ដុល្លារអាម៉េរិក ដែលជាអំណោយដ៏ថ្លៃថ្លារបស់ឯកឧត្តមបណ្ឌិត ជា ចាន់តូ និងលោកជំទាវ ខៀវ ស៊ីណា ៕ដោយស៊ុម វណ្ណា

(សូមអានបន្ត)

អភិបាលរាជធានីភ្នំពេញ យករថយន្តក្រុង៣គ្រឿង ដឹកពលរដ្ឋជាង១០០នាក់ ដែលចាញ់បោកមេខ្យល់នាំទៅកូរ៉េ ត្រឡប់ទៅលំនៅដ្ឋានវិញ

(ភ្នំពេញ)៖ ក្រោយប្រជាពលរដ្ឋជាង១០០នាក់ ដែលបានចាញ់បោកមេខ្យល់នាំទៅធ្វើការ នៅឯបរទេសកូរ៉េនោះ នៅថ្ងៃទី៨ ខែមីនា ឆ្នាំ២០២៣ លោក ឃួង ស្រេង អភិបាលរាជធានីភ្នំពេញ បានដឹកនាំក្រុមការងាររួមមាន លោក សុខ ពេញវុធ អភិបាលរងរាជធានី ភ្នំពេញ លោកឧត្តមសេនីយទោ សុង លី ស្នងការរងរាជធានីភ្នំពេញ លោក សក់ ចន្ទ័កញ្ញារិទ្ឋ អភិបាលខណ្ឌ ពោធិ៍សែនជយ័ »បានបន្តចុះត្រួតពិនិត្យផ្ទះសំណាក់ «នាគទេព» ស្ថិតក្នុងភូមិត្រពាំងល្វា១ សង្កាត់កាកាបទី១ ខណ្ឌពោធិ៍សែនជយ័ បានយករថយន្តក្រុងសាលារាជធានីភ្នំពេញ៣គ្រឿងដឹកជញ្ជូនពលរដ្ឋចំនួន១២៥នាក់ ប្រុសចំនួន ៨៧ប្រុស ស្រីចំនួន៣៨នាក់ត្រឡប់ទៅកាន់លំនៅដ្ឋាននៅស្រុកកំណើតតាមបណ្តាខេត្តវិញរួមផ្តល់អាហារនិងថវិការមួយចំនួនផងដែរ។

សូមបញ្ជាក់ថា នគរបាលស្នងការនគរបាលរាជធានីភ្នំពេញ សហការនគរបាលនៃអធិការដ្ឋានខណ្ឌពោធិ៍សែនជ័យ បានធ្វើការចាប់ខ្លួនមេខ្យល់ឆបោកម្នាក់ រួចបន្តស្រាវជ្រាវឃាត់ខ្លួនបក្ខពួក បន្ថែមចំនួន៣នាក់ទៀតដែលបានឆបោកថាប្រជាពលរដ្ឋចំនួន១១២នាក់នាំទៅធ្វើការនៅប្រទេសកូរ៉េ ហើយក្នុងម្នាក់ៗចាញ់បោងអស់លុយជិត១ពាន់ដុល្លារ។

សមត្ថកិច្ច បានឲ្យដឹងថា ការចាប់ខ្លួនមេខ្យល់ខាងលើ បានធ្វើឡើងកាលពីរាត្រី ថ្ងៃទី០៧ ខែមីនា ឆ្នាំ២០២៣ក្រោយប្រជាពលរដ្ឋនាំគ្នាតវ៉ា នៅចំណុចផ្ទះសំណាក់ «នាគទេព» ដែលស្ថិតនៅភូមិត្រពាំងល្វា១ ក្នុងសង្កាត់កាកាបទី១ ខណ្ឌពោធិ៍សែនជ័យ ។ ជនឆោកខាងលើនេះមានឈ្មោះ តាំ ចាន់ទិ ភេទ ប្រុសអាយុ២៧ឆ្នាំ មុខរបរមិនពិតប្រាកដ រស់នៅភូមិត្រពាំងតឹង ឃុំព្រាល ស្រុកកញ្ជៀច ខេត្តព្រៃវែង ។

ក្រោយឃាត់ខ្លួនជនសង្ស័យនៅថ្ងៃទី៨ ខែមីនា ឆ្នាំ២០២៣នេះ សមត្ថកិច្ចបានបន្តការស្រាជ្រាវឃាត់ខ្លួនបក្ខចំនួន៣នាក់បន្ថែមទៀត កម្លាំងជំនាញបានបញ្ជូនជនសង្ស័យទាំង៤នាក់ ខាងលើទៅការិយាល័យប្រឆាំងការជួញដូរផ្លូវភេទ នៃស្នងការដ្ឋាននគរបាលរជធានីភ្នំពេញសាកសួរបន្តតាមនិតិវិធី។

នៅយប់ថ្ងៃទី៧ ខែមីនា ឆ្នាំ២០២៣ មានជនរងគ្រោះទាំង១១២នាក់ ក្នុងនោះមានស្រី មានប្រុស អ្នកខ្លះអាយុ៥០ឆ្នាំ ដែលបានចាញ់បោកមេខ្យល់ខាងលើ សន្យាថា នាំទៅធ្វើការនៅប្រទេសកូរ៉េ ទទួលបានប្រាក់ខែចំនួន១៥០០ដុល្លារក្នុង១ខែ ទៅរយៈពេល៦ខែ ការងារនៅចំការបេះផ្លែឈើត្រូវបានសមត្ថកិច្ចជួយសង្រ្គោះទាន់ពេលវេលា ដោយធ្វើការឃាត់ខ្លួនមេខ្យល់ម្នាក់ផងដែរ។

ក្រុមជនរងគ្រោះ បានឲ្យដឹងទៀតថា បន្ទាប់ពីមេខ្យល់ដែលបំផុសបំផុលព័ត៌មានដល់ពួកគាត់ តាមរោងចក្រ និងនៅតាមភូមិ ហើយមានខេត្តជាច្រើននៅ ក្នុងនោះផងដែរ ប៉ុន្តែជនរងគ្រោះនៅស្រុកស្អាង ខេត្តកណ្ដាល មានច្រើនជាងគេ គឺមានជាង៥០ភាគរយឯណោះ។

ពលរដ្ឋរងគ្រោះបន្តថា ប្រជាពលរដ្ឋបានប្រគល់លុយសុទ្ធម្នាក់ៗចំនួន៧០០ដុល្លារឡើងទៅ អ្នកខ្លះអស់ជិត១០០០ដុល្លារ ដោយទិញសម្លៀកបំពាក់ និងរបស់របរ ដើម្បីយកទៅរស់នៅប្រទេសកូរ៉េ។ ក្នុងនោះជនឆបោកខាងលើ បាននិយាយទៅកាន់ជនរងគ្រោះទាំង១១២នាក់ថា ពួកគាត់ទៅធ្វើការនៅប្រទេសកូរ៉េតាមរយៈសមាគម តែមិនបានបញ្ជាក់ឈ្មោះសមាគមនោះឡើយ។ ហើយមានវគ្គផ្សេងៗគ្នា និងមានការប្រឡង ឬរៀនវគ្គភាសាកូរ៉េបន្ថែមទៀត។

ជនបរងគ្រោះបន្តទៀតថា ក្នុងនោះវគ្គដំបូងនៅថ្ងៃទី៤ ខែមីនា ឆ្នាំ២០២៣ ដែលមានគ្នា៩៤នាក់ តែមិនបានធ្វើដំណើរទេ ដោយសារមេខ្យល់បានប្រាប់ថា យន្តហោះផ្អាកជើងហោះហើររង់ចាំថ្ងៃទី៧មីនា។ បន្ទាប់មកមេខ្យល់ក៏នាំបងបងប្អូនប្រជាពលរដ្ឋទៅសំរាកនៅផ្ទះសំណាក់ «នាគទេព» ដើម្បីរង់ចាំយប់ថ្ងៃទី៧មីនា ទើបយន្តហោះដឹកពួកគាត់ទៅធ្វើការនៅប្រទេសកូរ៉េ ។

ជនរងគ្រោះ បានបញ្ជាក់ថា មិនត្រឹមតែចាញ់បោកមេ ខ្យល់អស់លុយក្នុងម្នាក់ៗចំនួន៧០០ដុល្លារឡើងទៅទេ គឺថែមទាំងចាញ់បោកមេខ្យល់ ដោយយកលុយខ្មែរទៅប្តូរយកលុយកូរ៉េ ដើម្បីយកទៅចាយនៅប្រទេសកូរ៉េអស់មួយចំនួនទៀត។ លុះនៅវេលាម៉ោងកើតហេតុ ដោយ មានការសង្ស័យ ខ្លាចមិនបានទៅធ្វើការនៅប្រទេសកូរ៉េ ទើបនាំគ្នាប្តឹងសមត្ថកិច្ច និងអាជ្ញាធរខណ្ឌពោធិ៍សែនជ័យ ដើម្បីជួយអន្តរាគមន៍ ឃាត់ខ្លួនជនសង្ស័យជាមេខ្យល់បានម្នាក់ ក្នុងចំណោមបក្សពួកចំនួន៣នាក់ ដើម្បីយកទៅសួរនាំភ្លាមៗតែម្តង។

សមត្ថកិច្ចនគរបាលជំនាញខណ្ឌពោធិ៍សែនជ័យ បន្ទាប់ ពីឃាត់ជនសង្ស័យបានម្នាក់យកទៅសួរនាំនោះ បានបញ្ជាក់ប្រាប់ថា រូបគេមានមេធំ២នាក់ទៀត ហើយរូបគាត់ជាអ្នកទទួលលុយ ពីបងប្អូនប្រជាពលរដ្ឋពិតប្រាកដមែន។ ទោះបីជាយ៉ាងណា ជនសង្ស័យជាមេខ្យល់នេះ មិនបានបញ្ជាក់លំអិតនោះទេ ហើយពេលនេះសមត្ថកិច្ចកំពុងតែសួរនាំបន្តទៀត៕

(សូមអានបន្ត)